കൗരവ-പാണ്ഡവ യുദ്ധത്തെ കുറിച്ച് അറിയാത്തവരായി ആരുമുണ്ടാകില്ല. എന്നാല് കൗരവ പക്ഷത്തെ ദുര്യോധനനു വേണ്ടി ഒരു ക്ഷേത്രമുണ്ട്, എന്നതിനെ കുറിച്ച് അറിയാവുന്നവര് ചുരുക്കമായിരിക്കും. ദക്ഷിണേന്ത്യയിലെ ഏക ദുര്യോധന ക്ഷേത്രം സ്ഥിതി ചെയ്യുന്നത് മറ്റെവിടെയുമല്ല നമ്മുടെ കേരളത്തില് തന്നെയാണ്. കൊല്ലം ജില്ലയിലെ പോരുവഴി എന്ന സ്ഥലത്താണ് പോരുവഴി പെരുവിരുത്തി മലനട ക്ഷേത്രം സ്ഥിതിചെയ്യുന്നത്. ആല്ത്തറയിലെ ഒരു പീഠം മാത്രമാണ് മലനട അപ്പൂപ്പന് എന്ന് നാട്ടുകാര് വിളിക്കുന്ന ദുര്യോധനന്റെ പ്രതിഷ്ഠയായി കണക്കാക്കപ്പെടുന്നത്.
സാധാരണയായി മറ്റു ക്ഷേത്രങ്ങളില് കാണുന്നതു പോലെ വിഗ്രഹമോ, ശ്രീകോവിലോ, ചുറ്റമ്പലമോ ഇല്ല എന്നത് ഈ ക്ഷേത്രത്തിന്റെ ഏറ്റവും വലിയ പ്രത്യേകതയാണ്. ഊരാളി പൂജയാണ് ഇവിടെ നടത്തുന്നത്. വെറ്റിലയും പുകയിലയും പാക്കും ഉപയോഗിച്ച് ഊരാളി അടുക്കു വെച്ച് പൂജിക്കുന്നു. ദേശാടനത്തിന് പുറപ്പെട്ട ദുര്യോധനന് ഈ ദേശത്ത് കൂടി കടന്നു പോകുമ്പോള് അതിയായ ദാഹം തോന്നിയെന്നും ആ സമയം കുടിക്കാനായി ഇത്തിരി വെള്ളം ചോദിച്ചെന്നും അപ്പോള് ശുദ്ധമായ മദ്യമാണ് ലഭിച്ചതെന്നും പിന്നീട് ദുര്യോധനന് ഈ നാട്ടില് സ്ഥിര താമസമായി എന്നുമാണ് ഐതിഹ്യം. അതുകൊണ്ടു തന്നെ ഇവിടത്തെ ഭക്തര്ക്ക് തീര്ത്ഥമായി കൊടുക്കുന്നതും കളള് തന്നെയാണ്.
ഇവിടുത്തെ പ്രധാന വഴിപാട് കള്ളു നിവേദ്യമാണ്. കൂടാതെ കോഴി, പട്ട് , കറുപ്പുകച്ച എന്നിവയും നേര്ച്ചയായി നടക്കല് സമര്പ്പിക്കാവുന്നതാണ്. മീന മാസത്തില് നടത്തുന്ന മലക്കുട മഹോത്സവമാണ് ഇവിടുത്തെ പ്രധാന ഉത്സവം. കാളയും എടുപ്പുകുതിരയുമാണ് ഉത്സവത്തിലെ പ്രധാന കെട്ടുകാഴ്ച. മറ്റൊരു പ്രധാന ചടങ്ങാണ് പള്ളിപ്പാന. ചൂരല് വള്ളികള് ശരീരത്തില് ചുറ്റി ക്ഷേത്രമുറ്റത്തു കൂടി ഉരുളുന്ന ചടങ്ങാണിത്. മുത്തുകുട, അരവണ, ഉണ്ണിയപ്പം, പായസം എന്നിവ മറ്റ് പ്രധാന വഴിപാടുകളാണ്. ചരിത്രത്തില് സ്ഥാനം പിടിച്ച ഒരു ക്ഷേത്രം കൂടിയാണ് ഈ ദുര്യോധന ക്ഷേത്രം.
