ഹൈദരാബാദ്: തെലുങ്ക് സൂപ്പർതാരം നന്ദമൂരി ബാലകൃഷ്ണയ്ക്ക് പുതിയ ചിത്രമായ ‘NBK111’-ന്റെ ചിത്രീകരണത്തിനിടെ പരിക്കേറ്റു. കാക്കിനാഡയിൽ ആക്ഷൻ രംഗം ചിത്രീകരിക്കുന്നതിനിടെയാണ് താരത്തിന് ചെറിയ മസിൽ ടിയർ ഉണ്ടായത്. പൂർണ സുഖം പ്രാപിക്കുന്നതിനായി ചെറിയ ശസ്ത്രക്രിയയ്‌ക്ക് വിധേയനാകുമെന്ന് ചിത്രത്തിന്റെ നിർമ്മാതാക്കൾ അറിയിച്ചു.
നിർമാണ കമ്പനിയായ വൃദ്ധി സിനിമാസ് സാമൂഹിക മാധ്യമങ്ങളിലൂടെയാണ് ആരോഗ്യനില സംബന്ധിച്ച ഔദ്യോഗിക വിശദീകരണം പുറത്തുവിട്ടത്. ഡോക്ടർമാരുടെ നിർദേശപ്രകാരമുള്ള പതിവ് ശസ്ത്രക്രിയ മാത്രമാണിതെന്നും ആശങ്കപ്പെടേണ്ട സാഹചര്യമില്ലെന്നും നിർമാതാക്കൾ വ്യക്തമാക്കി. ബാലകൃഷ്ണയുടെ അർപ്പണബോധവും കഠിനാധ്വാനവും ചിത്രസംഘത്തിന് പ്രചോദനമാണെന്നും അദ്ദേഹം ഉടൻ ചിത്രീകരണത്തിലേക്ക് മടങ്ങിയെത്തുമെന്ന പ്രതീക്ഷയിലാണെന്നും അവർ അറിയിച്ചു.
സംവിധായകൻ ഗോപിചന്ദ് മലിനേനി ഒരുക്കുന്ന ‘NBK111’-ൽ കാജൽ അഗർവാളാണ് നായിക. മഞ്ചു മനോജ്, ശരത് കുമാർ, സമുദ്രക്കനി എന്നിവരും പ്രധാന കഥാപാത്രങ്ങളെ അവതരിപ്പിക്കുന്ന ചിത്രത്തിന് സംഗീതം ഒരുക്കുന്നത് എസ്. തമനാണ്.
പരിക്ക് സംബന്ധിച്ച വാർത്ത പുറത്തുവന്നതോടെ ജൂനിയർ എൻടിആർ, നന്ദമൂരി കല്യാൺ റാം ഉൾപ്പെടെയുള്ള താരങ്ങൾ ബാലകൃഷ്ണയ്ക്ക് വേഗത്തിൽ സുഖം പ്രാപിക്കാൻ ആശംസകൾ നേർന്നു.
