അരനൂറ്റാണ്ടിലധികം പിന്നിട്ടിട്ടും കറുത്തമ്മയും പരീക്കുട്ടിയും മലയാളി മനസ്സുകളില് ഇന്നും മായാതെ നില്ക്കുന്നു. തകഴി ശിവശങ്കര പിള്ളയുടെ ചെമ്മീന് എന്ന പ്രശസ്ത നോവലിനെ അടിസ്ഥാനമാക്കി 1965 ല് രാമു കാര്യാട്ട് സംവിധാനം ചെയ്ത ചിത്രമായിരുന്നു ചെമ്മീന്. കേരളത്തിന് അഭിമാനിക്കാവുന്ന ഒരുപാട് പുരസ്കാരങ്ങള് നേടി തന്ന ചിത്രം. കടപ്പുറത്തെ പശ്ചാത്തലമാക്കി അരയന്മാരുടെ കഥ പറയുന്ന ഈ ചിത്രത്തിലെ ഓരോ കഥാപാത്രങ്ങളും രംഗങ്ങളും ഗാനങ്ങളും മലയാളി മനസ്സില് ഇടം കണ്ടെത്തിയവയാണ്. പ്രണയവും വിരഹവും വേദനയും മത്സ്യ തൊഴിലാളികളുടെ ജീവിതവും ഇടകലര്ന്ന ഒരുപിടി നല്ല രംഗങ്ങളിലൂടെയാണ് ഈ ചിത്രം കടന്നു പോകുന്നത്.
അരയത്തിയായ കറുത്തമ്മയെയും അവളെ സ്നേഹിച്ച അന്യജാതിക്കാരനായ കൊച്ചു മുതലാളിയെയും കുറിച്ചുള്ള കഥയാണ് ഇതിലൂടെ പറഞ്ഞു പോകുന്നത്. പ്രണയവും അതിനൊടുവിലെ മരണവുമാണ് കഥാ തന്തു. മധു, സത്യന്, കൊട്ടാരക്കര ശ്രീധരന് നായര്, എസ് പി പിള്ള, ഷീല, അടൂര് ഭവാനി, ഫിലോമിന തുടങ്ങിയവര് ചിത്രത്തിനു മാറ്റുകൂട്ടാനായി അണി നിരന്നിരുന്നു. അന്പത്തിയഞ്ച് വര്ഷത്തിനിപ്പുറവും ആരാധകരുടെ മനസ്സില് മായായെ കിടക്കുന്ന ചെമ്മീന് ഇന്നും മലയാളികള്ക്ക് ഏറെ പ്രിയപ്പെട്ടതാണ്.
സാങ്കേതികപരമായി കൂടുതല് മികവ് കാഴ്ച വെച്ച ചിത്രമായിരുന്നു ചെമ്മീന്. 1965-ലെ ഏറ്റവും മികച്ച ചലച്ചിത്രത്തിനുള്ള രാഷ്ട്രപതിയുടെ സുവര്ണ്ണ കമലം ചെമ്മീന് സ്വന്തമാക്കി. ഈ അംഗീകാരം ലഭിച്ച ആദ്യ ദക്ഷിണേന്ത്യന് സിനിമയാണിത്. ചിത്രത്തിലെ എല്ലാ ഗാനങ്ങളും കേരളക്കരയാകെ നെഞ്ചോടു ചേര്ത്തവയാണ്. വയലാറിന്റെ വരികള്ക്ക് സലില് ചൗധരിയാണ് സംഗീതം നല്കിയിരിക്കുന്നത്. ബാബു ഇസ്മായില് സേട്ടുവാണ് ചിത്രത്തിന്റെ നിര്മ്മാതാവ്.
