സർവ്വചരാചരങ്ങളെയും ആരാധിക്കുകയും ബഹുമാനിക്കുകയും ചെയ്യുന്ന ഭാരതീയരുടെ പുണ്യ വൃക്ഷമാണ് അരയാൽ . ബുദ്ധമതവിശ്വാസികളും, ഹിന്ദുമതവിശ്വാസികളുമാണ് അരയാലിനെ ഏറ്റവും കൂടുതലായി ആരാധിക്കുന്നത് . ഏഴായിരം വർഷങ്ങൾക്ക് മുൻപുണ്ടായിരുന്ന നാഗരികതയുടെ ഭാഗമായി ഉപയോഗിച്ച് പോന്നിരുന്നു എന്ന് കരുതപ്പെടുന്ന മൺപാത്രങ്ങളിലും മറ്റും അരയാലിന്റെ ചിത്രം ആലേഖനം ചെയ്തിട്ടുള്ളത് കണ്ടെത്തിയിട്ടുണ്ട് . അതിനർത്ഥം യുഗങ്ങൾക്ക് മുൻപ് തന്നെ അരയാൽ വൃക്ഷത്തെ ആരാധിച്ചു പോന്നിരുന്നു എന്നുള്ളതിനുള്ള തെളിവ് കൂടിയാണിത് .
അരയാൽ വൃക്ഷത്തെ നമസ്കരിക്കാനുള്ള ശ്ലോകത്തിൽ , വൃക്ഷത്തിന്റെ വേരിൽ ബ്രഹ്മാവും , മധ്യത്തിൽ വിഷ്ണുവും അഗ്രഭാഗത്തു ശിവ ഭഗവാനും കുടികൊള്ളുന്നു എന്നാണ് അർത്ഥമാക്കുന്നത് .അതിനാൽ ഈ ശ്ലോകം ചൊല്ലി അരയാലിനെ പ്രദക്ഷിണം വെക്കുന്നത് സർവൈശ്വര്യങ്ങളും പ്രധാനം ചെയ്യും എന്നാണ് വിശ്വാസം . കേരളത്തിലെ ഒട്ടു മിക്ക ക്ഷേത്രങ്ങളോട് ചേർന്ന് അരയാൽ ഉള്ളതായി നമ്മുക്ക് കാണാൻ സാധിക്കും . അരയാലിന് ചുറ്റും തറകെട്ടി അവയെ സംരക്ഷിച്ചു പോരുകയും ചെയ്യുന്നു .
ഭാരത്തിലുടനീളം കണ്ടു വരുന്ന ധാരാളം ശിഖരങ്ങൾ ഉള്ള വലിപ്പമേറിയ ഇലകൊഴിയുന്ന വൃക്ഷമാണ് അരയാൽ . പീപ്പലം , അശ്വത്ഥ , അരളി , അരശ് എന്നും അരയാലിന് പേരുകൾ ഉണ്ട് . ശ്രീബുദ്ധൻ ധ്യാനത്തിലിരുന്നത് അരയാലിൻ ചുവട്ടിലായത് കൊണ്ട് ബോധിവൃക്ഷം എന്നും അറിയപ്പെടുന്നു .
രണ്ടായിരം വർഷത്തിന് മേൽ ആയുസ്സുള്ള വൃക്ഷമാണ് അരയാൽ . ശ്രീലങ്കയിൽ ഉള്ള അനുരാധാപുരിയിലെ മഹാബോധിവൃക്ഷം , ശ്രീബുദ്ധൻ ധ്യാനിച്ച ബോധിവൃക്ഷത്തിൽ നിന്ന് മുളപ്പിച്ചെടുത്താണ് എന്ന് കരുതപ്പെടുന്ന ഒന്നാണ് . അതിനാൽ തന്നെ ബുദ്ധമത വിശ്വാസികൾക്കിടയിൽ വളരെയധികം പ്രാധാന്യമുള്ള ബോധിവൃക്ഷമാണ് അനുരാധപുരത്തുള്ളത് .
അരയാലിന്റെ വിത്ത് മുളച്ചാണ് പുതിയ ഒന്ന് വളരുന്നത് . പ്രത്യേകതരം വണ്ടുകൾക്ക് മാത്രമേ അരയാലിൽ പരാഗണം നടത്താൻ സാധിക്കൂ . അരയാലിൽ ഉണ്ടാകുന്ന പുഷ്പങ്ങൾ വളരെ ചെറുതാണ് . ഈ പുഷ്പങ്ങളിൽ നിന്നുണ്ടാകുന്ന ഗന്ധം പെൺവണ്ടുകളെ ആകർഷിക്കുകയും അവ അതിനുള്ളിൽ കടന്നു മുട്ടയിടുകയും , വണ്ട് പ്രവേശിച്ചാലുടൻ പൂവിന്റെ സുഷിരം അടയുകയും തൻമൂലം പെൺവണ്ടു അതിനുള്ളിൽ തന്നെ മരിക്കുകയും ചെയ്യുന്നു. ആദ്യം ആൺവണ്ടുകൾ ഉള്ള മുട്ടയാണ് വിരിയുക. അവ പിന്നെ പെൺവണ്ടുകൾ ഉള്ള മുട്ട പൊട്ടിക്കുകയും പൂവിനുള്ളിൽ വെച്ച് ഇണ ചേരുകയും ചെയ്യും . അടഞ്ഞു പോയ പൂവിന്റെ തോട് പൊട്ടിച്ചു പെൺവണ്ടുകൾപുറത്തു കടക്കുകയും ,പൂവിന്റെ തോട് പൊട്ടുന്ന സമയത്തു ചിതറി വീഴുന്ന വിത്തുകളിൽ നിന്നാണ് പുതിയ ആൽവൃക്ഷം കിളിർക്കുകയും ചെയ്യുന്നത് .
മണ്ണിൽ നിന്ന് മാത്രമല്ല വായുവിൽ നിന്നും അരയാൽ വളരുവാൻ വേണ്ടിയുള്ള പോഷകങ്ങൾ വലിച്ചെടുക്കും . വൃക്ഷത്തിന്റെ ഈ പ്രത്യേകത കാരണമാണ് അരയാലിന്റെ ചില്ലകളിൽ നിന്നും മറ്റും വേരുകൾ വളർന്നു നിൽക്കുന്നത് കാണാൻ സാധിക്കുന്നത് .
അരയാലിൽ ധാരാളം ആൽക്കലോയിഡുകളും , ധാതുക്കളും , വിറ്റാമിനുകളും അടങ്ങിയിരിക്കുന്നതിനാൽ ആയുർവേദ ചികിത്സകളിൽ ഇവ ഉപയോഗിക്കാറുണ്ട് .
Comments