കൊച്ചി: ഫിഫ ലോകകപ്പ് ഫൈനലിന്റെ ആവേശം വിദ്യാര്‍ത്ഥികള്‍ക്കും പൂര്‍ണമായി ആസ്വദിക്കാന്‍ അവസരമൊരുക്കി കൊച്ചിയിലെ ഒരു സ്വകാര്യ സ്‌കൂള്‍. മരടിലുള്ള ഗ്രിഗോറിയന്‍ പബ്ലിക് സ്‌കൂള്‍ ലോകകപ്പ് ഫൈനലിന്റെ പിറ്റേന്ന് വിദ്യാര്‍ത്ഥികള്‍ക്ക് അവധി പ്രഖ്യാപിച്ചു. അര്‍ധരാത്രിയിലാണ് ഫൈനല്‍ മത്സരം നടക്കുന്നത്. മത്സരം കണ്ടശേഷം കുട്ടികള്‍ക്ക് ഉറക്കക്കുറവും ക്ഷീണവും അനുഭവപ്പെടാനും പിറ്റേന്ന് രാവിലെ സ്‌കൂളിലെത്താന്‍ ബുദ്ധിമുട്ടുണ്ടാകാനും സാധ്യതയുള്ളതിനാലാണ് അവധി നല്‍കാന്‍ സ്‌കൂള്‍ മാനേജ്‌മെന്റ് തീരുമാനിച്ചത്.
വിദ്യാര്‍ത്ഥികള്‍ക്ക് ഫുട്‌ബോളിനോടുള്ള വലിയ താല്‍പര്യവും സ്‌കൂള്‍ നിരവധി ഇന്റര്‍ സ്‌കൂള്‍ ഫുട്‌ബോള്‍ മത്സരങ്ങളില്‍ പങ്കെടുക്കുന്നതുമാണ് ഈ തീരുമാനത്തിന് പിന്നിലെ പ്രധാന കാരണങ്ങളെന്ന് സ്‌കൂള്‍ പ്രിന്‍സിപ്പല്‍ സൂസന്‍ ബാരിഡ് പറഞ്ഞു. ലോകകപ്പിനോടനുബന്ധിച്ച് ജൂലൈ 10-ന് സ്‌കൂളില്‍ പ്രത്യേക ആഘോഷങ്ങളും സംഘടിപ്പിച്ചിരുന്നു.
പഠനത്തിന് മാത്രമല്ല, കുട്ടികളുടെ കായിക താല്‍പര്യങ്ങള്‍ക്കും പ്രാധാന്യം നല്‍കണമെന്ന സമീപനത്തിന്റെ ഭാഗമായാണ് അവധി പ്രഖ്യാപിച്ചതെന്നും അവര്‍ വ്യക്തമാക്കി. അവധി പ്രഖ്യാപിച്ച ശേഷം നിരവധി രക്ഷിതാക്കള്‍ സ്‌കൂളിനെ വിളിച്ച് തീരുമാനത്തെ അഭിനന്ദിച്ചതായും പ്രിന്‍സിപ്പല്‍ അറിയിച്ചു. വിദ്യാര്‍ത്ഥികളുടെ താല്‍പര്യങ്ങളും മാനസിക സന്തോഷവും പരിഗണിച്ചുള്ള ഈ തീരുമാനം സമൂഹമാധ്യമങ്ങളിലും ശ്രദ്ധ നേടുകയാണ്.
