കൊളംബോ: 2018 അണ്ടര്-19 ലോകകപ്പ് ഫൈനലില് സെഞ്ചുറി നേടി ഇന്ത്യയെ കിരീടത്തിലേക്ക് നയിച്ച മുന് ഇന്ത്യന് യുവതാരം മഞ്ജോത് കല്റ ലങ്ക പ്രീമിയര് ലീഗില് കോഴ വാഗ്ദാന കേസില് അറസ്റ്റില്. ജാഫ്ന കിങ്സ് ടീമിന്റെ സഹഉടമയായ കല്റയെ ടൂര്ണമെന്റിന്റെ ഉദ്ഘാടന മത്സരത്തിന് മണിക്കൂറുകള് മുമ്പാണ് ശ്രീലങ്ക പൊലീസിന്റെ സ്പോര്ട്സ് അഴിമതി വിരുദ്ധ പ്രത്യേക അന്വേഷണ വിഭാഗം കസ്റ്റഡിയിലെടുത്തത്.
കളിക്കാര്ക്ക് പണം വാഗ്ദാനം ചെയ്ത് മത്സരഫലം സ്വാധീനിക്കാന് ശ്രമിച്ചെന്നാണ് 27-കാരനായ കല്റയ്ക്കെതിരായ ആരോപണം. ടൂര്ണമെന്റിന് ഏകദേശം പത്ത് ദിവസം മുമ്പ് തന്നെ ചില താരങ്ങളെ അദ്ദേഹം സമീപിച്ചിരുന്നുവെന്നാണ് അന്വേഷണ ഉദ്യോഗസ്ഥര് പറയുന്നത്. ശ്രീലങ്കന് ദേശീയ താരങ്ങളായ ഭാനുക രാജപക്സ, അവിഷ്ക ഫെര്ണാണ്ടോ, ദുനിത് വെല്ലാലഗെ എന്നിവരാണ് പരാതി നല്കിയതെന്നാണ് റിപ്പോര്ട്ട്. ഇവര് ജാഫ്ന കിങ്സ് ടീമിലെ അംഗങ്ങളുമാണ്.
പരാതിയെ തുടര്ന്ന് രഹസ്യനിരീക്ഷണം ആരംഭിച്ച അന്വേഷണ സംഘം, കൊളംബോയിലെ ഒരു ഹോട്ടലില് വെച്ച് ഒരു താരത്തിന് 95 ലക്ഷം ശ്രീലങ്കന് രൂപ (ഏകദേശം 28,700 യുഎസ് ഡോളര്) കൈമാറാന് ശ്രമിക്കുന്നതിനിടെയാണ് കല്റയെ പിടികൂടിയതെന്ന് പൊലീസ് അറിയിച്ചു. സംഭവത്തിന് പിന്നാലെ അദ്ദേഹത്തെ മജിസ്ട്രേറ്റിന് മുന്നില് ഹാജരാക്കി. ഈ അറസ്റ്റ് ആറാം പതിപ്പ് ലങ്ക പ്രീമിയര് ലീഗിന് വലിയ തിരിച്ചടിയായിരിക്കുകയാണ്. അഞ്ച് ടീമുകള് പങ്കെടുക്കുന്ന ടൂര്ണമെന്റ് ഓഗസ്റ്റ് 8 വരെയാണ് നടക്കുന്നത്.
അതേസമയം, ടൂര്ണമെന്റിനെ ചുറ്റിപ്പറ്റിയുള്ള അഴിമതി വിവാദങ്ങള് ഇതാദ്യമല്ല. ഈ വര്ഷം ആദ്യം ദംബുള്ള തണ്ടേഴ്സ് ടീമിന്റെ ഉടമ തമീം റഹ്മാന് കളിക്കാരനെ സ്വാധീനിക്കാനും വാതുവെപ്പ് സംഘടിപ്പിക്കാനും ശ്രമിച്ചതായി കുറ്റസമ്മതം നടത്തിയതിനെ തുടര്ന്ന് നാല് വര്ഷത്തെ സസ്പെന്ഡഡ് തടവും 2.4 കോടി ശ്രീലങ്കന് രൂപ പിഴയും ലഭിച്ചിരുന്നു. സംഭവത്തില് പ്രതികരിച്ച ശ്രീലങ്ക ക്രിക്കറ്റ്, അഴിമതിക്കെതിരെയുള്ള അന്വേഷണവുമായി പൂര്ണമായി സഹകരിക്കുമെന്നും വ്യക്തമാക്കി. ടൂര്ണമെന്റ് മുന് നിശ്ചയിച്ച പ്രകാരം തുടരുമെന്നും ബോര്ഡ് അറിയിച്ചു.
2018 അണ്ടര്-19 ലോകകപ്പ് ഫൈനലില് ഓസ്ട്രേലിയക്കെതിരെ പുറത്താകാതെ 101 റണ്സ് നേടി പ്രിഥ്വി ഷായുടെ നേതൃത്വത്തിലുള്ള ഇന്ത്യയ്ക്ക് കിരീടം സമ്മാനിച്ച താരമായിരുന്നു മഞ്ജോത് കല്റ. എട്ട് വര്ഷങ്ങള്ക്ക് ശേഷം അതേ താരം ഇപ്പോള് ലങ്ക പ്രീമിയര് ലീഗിന്റെ ചരിത്രത്തിലെ ഏറ്റവും വലിയ അഴിമതി വിവാദങ്ങളിലൊന്നിന്റെ കേന്ദ്രബിന്ദുവായിരിക്കുകയാണ്.
