ഉത്തരാഖണ്ഡ് സംസ്ഥാനത്തെ വടക്കൻ ചമോലിയിലും പിത്തോറഗഡിലും സ്ഥിതിചെയ്യുന്ന ഇന്ത്യൻ ദേശീയ ഉദ്യാനമാണ് വാലി ഓഫ് ഫ്ലവേഴ്സ് നാഷണൽ പാർക്ക് അഥവാ പൂക്കളുടെ താഴ്വര . ഏഷ്യാറ്റിക് കറുത്ത കരടി, സ്നോ ലേപാർഡ് , കസ്തൂരി മാൻ, തവിട്ട് കരടി, ചുവന്ന കുറുക്കൻ , നീല ആടുകൾ എന്നിവയുൾപ്പെടെ അപൂർവവും വംശനാശഭീഷണി നേരിടുന്നതുമായ വന്യജീവികളാൽ സമ്പന്നമാണ് ഈ പ്രദേശം .
പ്രശസ്തരായ പർവ്വതാരോഹകരാലും , സസ്യശാസ്ത്രജ്ഞരാലും , സാഹിത്യങ്ങളിലും എല്ലായ്പ്പോഴും പരാമർശിക്കപ്പെടുകയും , അംഗീകരിക്കപ്പെടുകയും ചെയ്യുന്ന ഹിമാലയത്തിലെ ഏറ്റവും ഉയർന്ന താഴ്വരകളിൽ ഒന്നാണ് വാലി ഓഫ് ഫ്ലവേഴ്സ് എന്നറിയപ്പെടുന്ന പൂക്കളുടെ താഴ്വര . കാലാകാലങ്ങളായി സന്യാസി വര്യന്മാർ തപസ്സനുഷ്ഠിക്കുവാൻ വേണ്ടി തിരഞ്ഞെടുക്കുന്ന പ്രദേശമാണ് പൂക്കളുടെ താഴ്വര . ഇന്ന് ലോക പൈതൃക പ്രദേശങ്ങളിലിൽ ഉൾപ്പെടുന്ന ഒന്നായ പൂക്കളുടെ താഴ്വരയിൽ കാലചക്രം മാറുന്നതനുസരിച്ചു നിറങ്ങളിൽ വ്യത്യാസം വരുന്ന വിവിധയിനം പൂക്കൾ ഉണ്ടാകുന്ന ചെടികളാൽ സമ്പന്നമാണ് .
പടിഞ്ഞാറൻ ഹിമാലയത്തിൽ കാണപ്പെടുന്ന ആൽപൈൻ കുറ്റിച്ചെടികളുടെ വംശത്തിൽ പെട്ട ധാരാളം ആൽപൈൻ സസ്യജാലങ്ങളുടെ ഉറവിടമായത് കൊണ്ടാണ് പൂക്കളുടെ താഴ്വര ലോക ശ്രദ്ധയാകർഷിച്ചത് . പൂക്കളുടെ താഴ്വരയിൽ കാണപ്പെടുന്ന ചില സസ്യങ്ങൾ വംശനാശ ഭീഷണി നേരിടുന്നവയാണ് . ഇവയിൽ പലതും ഉത്തരാഖണ്ഡിന് വെളിയിൽ കാണാൻ പോലും സാധിക്കുന്നവയല്ല . മറ്റു ഇന്ത്യൻ ഹിമാലയൻ സംരക്ഷണ മേഖലകളിൽ ഉള്ളതിനേക്കാൾ കൂടുതൽ വംശനാശ ഭീഷണി നേരിടുന്ന ഔഷധ സസ്യങ്ങൾ ഇവിടെയാണ് കാണാൻ സാധിക്കുക .
എത്തിച്ചേരാൻ വഴികൾ ഇല്ലാതിരുന്ന പ്രദേശമായതിനാൽ പുറം ലോകത്തേക്ക് 1931 വരെ അറിയപെടാതിരുന്ന താഴ്വരയാണിത് . കാമറ്റ് പർവ്വതം കയറുന്നതിൽ വിജയം കൈവരിച്ച കുറച്ചു പർവ്വതാരോഹകർ വഴി തെറ്റിയാണ് ഈ താഴ്വരയിൽ എത്തിയത് . ഇവിടെ എത്തിയ അവർ ദർശിച്ചത് മനോഹരമായ പൂക്കളാൽ സമ്പന്നമായ താഴ്വരെയാണ് . അങ്ങിനെയാണ് ഈ താഴ്വരക്ക് പൂക്കളുടെ താഴ്വര എന്ന പേര് ലഭിച്ചത് .
സംരക്ഷിത മേഖലയിൽ ഉൾപ്പെടുത്തിയിരിക്കുന്നതിനാൽ ഇവിടേക്കുള്ള പ്രവേശനം പരിമിതമാണ് . ഭൂരിഭാഗം സമയങ്ങളിലും മഞ്ഞിനാൽ മൂടപ്പെട്ടു കിടക്കുന്ന താഴ്വരയിലേക്ക് പ്രവേശനം ജൂൺ മുതൽ ഒക്ടോബർ മാസം വരെ മാത്രമാണ് .
Comments