എവിടെ നോക്കിയാലും പാവകൾ മാത്രം, അതും പേടിപ്പിക്കുന്ന തരത്തിലുള്ള രൂപങ്ങൾ. ഇവിടെ ഇത്രയധികം പാവകളോ എന്ന് ചിന്തിച്ചുപോകും. മരത്തിലെ ചില്ലകളിലെല്ലാം ഇത്തരത്തിലുള്ള പാവകൾ ആണ് തൂങ്ങികിടക്കുന്നത്. ഈ സ്ഥലം മറ്റെവിടെയുമല്ല, മെക്സിക്കോയിലെ ഒരു ദ്വീപിലാണ് ഇത്തരത്തിൽ കാണാൻ സാധിക്കുക.
സഞ്ചാരികൾക്ക് ഏറെ പ്രിയപ്പെട്ട ഈ സ്ഥലത്തിന്റെ വിശേഷങ്ങളിലേക്ക്. ഒരേ സമയം കൗതുകവും ഭയവും നിറയ്‌ക്കുന്ന ഈ പ്രദശത്തിന്റെ ഏതൊരു കോണിലും വിചിത്രരൂപത്തിലുള്ള പാവക്കുട്ടികളെ കാണാൻ സാധിക്കും.
പാവകളെ നമ്മൾ കാണാത്തത് ഒന്നുമല്ല. പക്ഷെ ഇത്തരത്തിലുള്ള ഭയപ്പെടുത്തുന്ന പാവകളെ സിനിമകളിൽ മാത്രമായിരിക്കും കാണാൻ സാധ്യത. തല അടർന്നു പോയതും ഒടിഞ്ഞ കയ്യും കാലും ഉള്ളതും കണ്ണുകൾ തുറിച്ചുനിൽക്കുന്നതോ ഇല്ലാത്തതോ ആയ പാവകളാണ് ഇവിടെ കൂടുതലായും ഉള്ളത്.മരകൊമ്പുകളിൽ തൂങ്ങിയാടുന്ന ഈ പാവകൾക്ക് പിറകിൽ ഒരു കഥയുണ്ട്. ഈ കഥയും വിചിത്രമായി തോന്നിയേക്കാം.
പാവകളുടെ ദ്വീപിന്റെ കഥയ്‌ക്ക് തുടക്കമാവുന്നത് 1970ലാണ്. ഈ ദ്വീപിന്റെ ഉടമസ്ഥൻ സന്റാന ബരാന എന്ന കലാകാരൻ ആണ്. കാമുകിയുമായി പിണങ്ങിയ ഇദ്ദേഹം ഈ ദ്വീപിൽ ഒറ്റക്ക് താമസിക്കാൻ തീരുമാനിച്ചു. ദ്വീപിൽ സ്വയം കൃഷി ചെയ്ത പച്ചക്കറികളും പൂക്കളും പട്ടണത്തിൽ കൊണ്ടുപോയി വിൽക്കുകയായിരുന്നു പതിവ്. അങ്ങനെ ദ്വീപിൽ സുഖജീവിതം നയിച്ചുകൊണ്ടിരുന്ന ബരാനയുടെ ജീവിതത്തിൽ അത് സംഭവിക്കുകയായിരുന്നു. എവിടെ നിന്നോ ഒഴുകി വന്ന ഒരു പെൺകുട്ടിയുടെ ജഡത്തിനൊപ്പം ഒരു പാവകുട്ടിയും. ഈ പാവകുട്ടിയാണ് ഈ ദ്വീപിലെ ആദ്യത്തേത്. പെൺകുട്ടിയുടെ ആത്മാവ് പാവയിലുണ്ടെന്ന് വിശ്വസിച്ച ബരാന അവളെ സന്തോഷിപ്പിക്കുവാനായി കുറെ പാവകളെ ദ്വീപിലേക്ക് കൊണ്ടുവന്നു. ഇതറിഞ്ഞ മറ്റാളുകളും പാവകളെ ദ്വീപിലേക്ക് കൊണ്ടുവരാൻ ആരംഭിച്ചു. അങ്ങനെയാണ് ഈ ദ്വീപ് പാവകളാൽ നിറഞ്ഞത്.
ഈ പാവകളെ സംബന്ധിച്ച് നിരവധി കഥകൾ ഉണ്ട്. പാവകൾ രാത്രിയിൽ സംസാരിക്കാറുണ്ടെന്നും അതുപോലെ തന്നെ ആളുകളെ തുറിച്ച് നോക്കാറുണ്ടെന്നുമൊക്കെയാണ് കഥകൾ. എന്നാൽ ചിലർ ഇതെല്ലാം തള്ളിക്കളയാറുണ്ട്.
ദ്വീപിൽ സഞ്ചരിക്കുമ്പോൾ പാവകളുടെ കണ്ണുകൾ തങ്ങളെ പിന്തുടരുന്നു എന്നാണ് ഇവിടം സന്ദർശിച്ചവർ പറയുന്നത്.
