‘മണിച്ചിത്രത്താഴ്’ എന്ന സൂപ്പർ ഹിറ്റ് സിനിമയിലെ ‘ഒരു മുറൈ വന്തു പാർത്തായ’ എന്ന ഗാനം മലയാളികൾക്ക് മറക്കാനാവില്ല. ചിത്രത്തിലെ ക്ലൈമാക്സ് രംഗത്തിൽ വരുന്ന ഈ പാട്ടിലൂടെയാണ് നായികയുടെ നാഗവല്ലി വേർഷൻ പ്രേക്ഷകരിൽ എത്തിക്കുന്നത്. വർഷങ്ങൾക്ക് മുൻപ് കൊല്ലപ്പെട്ട നാഗവല്ലി എന്ന നർത്തകി താനാണെന്ന് തെറ്റിധരിച്ച് തന്റെ കാമുകനോടൊപ്പം നൃത്തം ചെയ്ത്, ഒടുവിൽ പ്രതികാരദാഹിയായി മാറുന്ന ശോഭനയുടെ അഭിനയമികവ് ഇന്നും ജനങ്ങൾക്ക് ഒരാശ്ചര്യമാണ്. ചിത്രത്തിലെ ആ ഒരു രംഗത്തെ പ്രേക്ഷക മനസ്സിൽ ആണിയടിച്ചു കയറ്റിയതിൽ ‘ഒരു മുറൈ വന്തു പാർത്തായ’ എന്ന ഗാനത്തിന് വലിയ പങ്കുണ്ട്. ചിത്രം ഇറങ്ങി ഇരുപത്തിയേഴ് വര്ഷം പൂർത്തിയാകുമ്പോഴും ഈ പാട്ടിനോടുള്ള ആരാധന വീണ്ടും വീണ്ടും കൂടിവരികയാണ്.
അങ്ങനെയിരിക്കുമ്പോഴാണ് മണിച്ചിത്രത്താഴിലെ ഈ പാട്ടിന്റെ റെക്കോർഡിങ് ഓർമ്മകൾ ഉണർത്തുന്ന ചിത്രം ഗായിക സുജാത മോഹൻ സോഷ്യൽ മീഡിയയിൽ പങ്കുവെയ്ക്കുന്നത്. ചിത്രത്തിന്റെ സംവിധായകൻ ഫാസിലും, സംഗീതസംവിധായകൻ എം ജി രാധാകൃഷ്ണനും ഉൾപ്പെടെ പാട്ടിന്റെ പിന്നിൽ പ്രവർത്തിച്ച എല്ലാവരെയും ഫോട്ടോയിൽ കാണാം. സിനിമയിലെ ‘ഒരു മുറൈ വന്തു പാറായോ’ എന്ന ഗാനം സുജാത മോഹനും, പാട്ടിന്റെ മറ്റു പതിപ്പായ ‘ഒരു മുറൈ വന്തു പാർത്തായ’ എന്ന ഗാനം കെ എസ് ചിത്രയും, കെ ജെ യേശുദാസും ചേർന്നാണ് ആലപിച്ചത്..
ഇങ്ങനെയൊരു പൂർവകാല ചിത്രം സമ്മാനിച്ചതിന് സംവിധായകൻ ഫാസിലിന്റെ മാനേജറായ ബാബുവിന് നന്ദി അറിയിച്ചുകൊണ്ടാണ് ഈ അപൂർവസുന്ദര ചിത്രം സുജാത സോഷ്യൽ മീഡിയയിൽ പങ്കുവെച്ചത്. മലയാള സിനിമ ചരിത്രത്തിലെ മികച്ച സൃഷ്ടികളിൽ ഒന്ന് തന്നെയാണ് മണിച്ചിത്രത്താഴ്. കഥയും, സംവിധാനവും, സംഗീതവും, അഭിനയവും എല്ലാം ഒത്തിണങ്ങി വന്ന ഒരത്ഭുത സൃഷ്ടി.
Comments