ആരും കൊതിക്കും ഇങ്ങനെ ഒരു അമ്മയെ കിട്ടാന് അത്രയ്ക്ക് മികവുറ്റതാണ് കവിയൂര് പൊന്നമ്മ മലയാളികള്ക്കു നല്കിയ എല്ലാ അമ്മ കഥാപാത്രങ്ങളും. മലയാളത്തിലെ മുന്നിര നായകന്മാരുടെയെല്ലാം അമ്മയായി എത്തിയ കവിയൂര് പൊന്നമ്മയെ മലയാളികള് സ്വന്തം അമ്മയായി തന്നെ നെഞ്ചിലേറ്റി. പതിനാലാമത്തെ വയസ്സില് തോപ്പില് ഭാസിയുടെ മൂലധനം എന്ന നാടകത്തിലൂടെയായിരുന്നു കവിയൂര് പൊന്നമ്മ തന്റെ കലാജീവിതത്തിന് തുടക്കം കുറിച്ചത്. തുടര്ന്ന് പല നാടക വേദികളിലായുളള മികച്ച പ്രകടനത്തിലൂടെ സിനിമയിലേക്കെത്തി. 1962 ല് പുറത്തിറങ്ങിയ ശ്രീരാമ പട്ടാഭിഷേകം എന്ന സിനിമയിലൂടെയാണ് കവിയൂര് പൊന്നമ്മ മലയാള സിനിമയിലേയ്ക്കു കാലെടുത്തു വയ്ക്കുന്നത്.
പിന്നീട് ഒരു പിടി നല്ല കഥാപാത്രങ്ങളിലൂടെ മലയാളി പ്രേക്ഷകര്ക്കു മുന്നിലെത്തിയ കവിയൂര് പൊന്നമ്മ 1964 ല് പുറത്തിറങ്ങിയ കുടുംബിനി എന്ന ചിത്രത്തിലെ അമ്മ വേഷത്തിലൂടെയാണ് ജന ശ്രദ്ധ നേടിയത്. ആ അഭിനയ മികവു കൊണ്ടാകണം കവിയൂര് പൊന്നമ്മയ്ക്ക് പിന്നീട് ലഭിച്ചതെല്ലാം അമ്മ വേഷമായായിരുന്നു. താന് ചെയ്ത അമ്മ വേഷങ്ങളിലൂടെ മലയാളിയുടെ അമ്മയായി മാറിയ കവിയൂര് പൊന്നമ്മ നാനൂറിലധികം സിനിമകളില് അഭിനയിച്ചിട്ടുണ്ട്. അഭിനേത്രി എന്നതിനു പുറമേ ഒരു ഗായിക കൂടിയാണ് കവിയൂര് പൊന്നമ്മ.
വെച്ചൂര് എസ് സുബ്രഹ്മണ്യയ്യര്, എല് പി ആര് വര്മ്മ എന്നിവരുടെ കീഴില് നിന്നു സംഗീതം പഠിച്ച പൊന്നമ്മ ഡോക്ടര് എന്ന നാടകത്തിലാണ ആദ്യമായി പാടുന്നത്. പിന്നീട് തീര്ത്ഥയാത്ര എന്ന സിനിമയും പാടിയിട്ടുണ്ട്. ടി പി ദാമോദരന്റേയും ഗൗരിയുടേയും മകളായി 1945 സെപ്തംബര് 10 ന് പത്തനംതിട്ടയിലെ കവിയൂരാണ് പൊന്നമ്മ ജനിച്ചത്. കുടുംബത്തിലെ മൂത്ത കുട്ടിയായിരുന്ന പൊന്നമ്മയുടെ താഴെ ആറു സഹോദരങ്ങള് ഉണ്ടായിരുന്നു. സഹോദരിയായ കവിയൂര് രേണുകയും സിനിമാ രംഗത്ത് എത്തിയിരുന്നു. നിര്മ്മാതാവായ മണിസ്വാമിയായിരുന്നു ഭര്ത്താവ്. ഏക മകള് ബിന്ദു ഭര്ത്താവിനൊപ്പം അമേരിയ്ക്കയിലാണ്.
Comments