ന്യൂഡല്ഹി : ഇന്ത്യയുടെ സുവര്ണ്ണ ശരങ്ങളായ റഫേല് വിമാനങ്ങള് വ്യോമസേനയുടെ ഭാഗം. റഫേല് വ്യോമസേനയുടെ ഭാഗമാകുന്ന ഔദ്യോഗിക ചടങ്ങ് പൂര്ത്തിയായി. ഹരിയാനയിലെ അംബാല വ്യോമതാവളത്തില് വെച്ച് നടന്ന ചടങ്ങില് പ്രതിരോധ മന്ത്രി രാജ്നാഥ് സിംഗ് ആണ് വ്യോമസേനയ്ക്ക് വിമാനങ്ങള് ഔദ്യോഗികമായി കൈമാറിയത്.
ഫ്രഞ്ച് പ്രതിരോധമന്ത്രി ഫ്ളോറന്സ് പാര്ലിയുടെ സാന്നിദ്ധ്യത്തിലായിരുന്നു വിമാനങ്ങളുടെ കൈമാറ്റം. ഫ്രാന്സിലെ മറ്റ് ഉന്നത നേതൃത്വങ്ങളും ഫ്രഞ്ച് റഫേലിന്റെ സാങ്കേതിക ഗവേഷണ രംഗത്തെ കമ്പനികളുടെ പ്രതിനിധികളും ചടങ്ങില് സാന്നിദ്ധ്യമറിയിച്ചിട്ടുണ്ട്. പ്രതിരോധ മന്ത്രി രാജ്നാഥ് സിംഗിനെ പ്രതിരോധ സെക്രട്ടറിയും, വിവിധ സേനകളിലെ മേധാവിമാരും അനുഗമിച്ചു.
രാവിലെ 10.30 ഓടെയാണ് അംബാലയില് ഔദ്യോഗിക ചടങ്ങുകള്ക്ക് തുടക്കം കുറിച്ചത്. സര്വ്വധര്മ്മ പൂജയ്ക്ക് ശേഷമായിരുന്നു വിമാനങ്ങളുടെ കൈമാറ്റം. ചടങ്ങില് പങ്കെടുക്കാന് ഇരു രാജ്യങ്ങളിലെയും പ്രതിരോധമന്ത്രിമാര് 10 മണിയോടെതന്നെ അംബാലയില് എത്തിയിരുന്നു.
ഇന്ത്യന് പ്രതിരോധ മേഖലയുടെ കരുത്ത് ഇരട്ടിയാക്കുന്നതിനായി അഞ്ച് റഫേല് വിമാനങ്ങളാണ് ഇന്ത്യ ഫ്രാന്സില് നിന്നും വാങ്ങിയത്. ജൂലൈ 29 ന് വിമാനങ്ങള് അംബാലയിലെ വ്യോമ താവളത്തില് പറന്നിറങ്ങി. ആകെ 36 വിമാനങ്ങളാണ് ഫ്രാന്സില് നിന്നും ഇന്ത്യ വാങ്ങാന് ഒരുങ്ങുന്നത്. ഇതിന് ആയി 59,000 കോടി രൂപയുടെ കരാറിലാണ് ഇരു രാജ്യങ്ങളും ഒപ്പുവെച്ചിരിക്കുന്നത്.
അധികം വൈകാതെ ബാക്കിയുള്ള വിമാനങ്ങള് കൂടി ഇന്ത്യയ്ക്ക് ഫ്രാന്സ് കൈമാറുമെന്നാണ് വിവരം.
Comments