ലോക്ക്ഡൗൺ തുടങ്ങിയതിൽപ്പിന്നെ ശരീരഭാരം കൂടാത്തവർ വളരെ ചുരുക്കമാണ്. കൂടിയ ശരീരഭാരം വളരെ കഷ്ടപ്പെട്ടാണ് ആളുകൾ കുറയ്ക്കാൻ ശ്രമിക്കാറുള്ളത്. ഭക്ഷണ നിയന്ത്രണമാണ് അമിതവണ്ണം കുറയ്ക്കാൻ ആളുകൾ തിരഞ്ഞെടുക്കുന്ന പ്രധാന രീതി. എന്നാൽ ഇത് ശാശ്വതമായ പരിഹാരമല്ല. ഭക്ഷണ നിയന്ത്രണം ആരോഗ്യത്തെ മോശമായി ബാധിക്കാൻ സാധ്യതയുണ്ട്. പകരം നല്ല ആരോഗ്യശീലങ്ങൾ ജീവിതശൈലിയുടെ ഭാഗമാക്കുന്നത് വഴി അമിതവണ്ണം വരാതെ നോക്കുവാൻ കഴിയുമെന്നാണ് ആരോഗ്യ വിദഗ്ധർ പറയുന്നത്. അതുകൊണ്ട് ആരോഗ്യകരമായ ജീവിതത്തിന് വ്യായാമം തന്നെയാണ് ഏറ്റവും നല്ല പോംവഴി.
രാവിലെയുള്ള നടത്തം, യോഗ ചെയ്യൽ തുടങ്ങിയവ മനുഷ്യരെ ശാരീരികമായും മാനസികമായും ഊർജസ്വലരാക്കാൻ സഹായിക്കുന്നു. അതുപോലെ രാവിലെയുള്ള സൂര്യപ്രകാശം ഏൽക്കുകയാണെങ്കിൽ വിറ്റാമിൻ ഡി ശരീരത്തിന് ലഭിക്കും. അവയവങ്ങളുടെ പ്രവർത്തനങ്ങൾക്കും, ആരോഗ്യകരമായ ശരീരഭാരം നിലനിർത്തുന്നതിനും വിറ്റാമിൻ ഡി സഹായിക്കും. ഒപ്പം ,രാവിലെയുള്ള വ്യായാമം ശരീരത്തിന്റെ മെറ്റബോളിസം നിരക്ക് കൂട്ടുകയും, എൻഡോർഫിൻ ഹോർമോണിന്റെ അളവ് ഉയർത്തുകയും ചെയ്യും. അതുപോലെ രാവിലെ പൊതുവെ തണുത്ത വെള്ളത്തിൽ കുളിക്കാനുള്ള മടി കാരണം ചൂടുവെള്ളം ഉണ്ടാക്കി കുളിക്കുന്ന പതിവ് നിർത്തണം. കാരണം തണുത്ത വെള്ളത്തിലുള്ള കുളി ശരീരത്തിലെ മെറ്റബോളിസം പ്രവർത്തനങ്ങൾക്ക് നല്ലതാണ്.
പ്രഭാത ഭക്ഷണം ഓരോ വ്യക്തികളുടെയും ആരോഗ്യത്തെ സംബന്ധിച്ച് വളരെ പ്രധാനപ്പെട്ടതാണ്. അതിനാൽ പ്രോടീനും, ഫൈബറും അടങ്ങുന്ന പ്രഭാത ഭക്ഷണം ഒരു ശീലമാക്കണം. മുട്ട, പാൽ, നട്സ്, ഓട്സ്, പഴവർഗ്ഗങ്ങൾ തുടങ്ങിയവ പ്രഭാത ഭക്ഷണത്തിൽ ധാരാളമായി ഉൾക്കൊള്ളിക്കുക. പ്രഭാത ഭക്ഷണം ഒരിക്കലും ഒഴിവാക്കരുത്. അത് ആരോഗ്യത്തെ ദോക്ഷമായി ബാധിക്കാൻ ഇടയാക്കും. എന്നാൽ ആരോഗ്യമുണ്ടാക്കാൻ കൂടുതൽ ഭക്ഷണം കഴിക്കുന്നതിൽ അർത്ഥമില്ല. മറിച്ച് നല്ല ഭക്ഷണം ആവശ്യത്തിന് കഴിക്കുക എന്ന ശീലം പ്രാവർത്തികമാക്കുക. പച്ചക്കറികൾ പരമാവധി ഭക്ഷണക്രമത്തിൽ ഉൾക്കൊള്ളിക്കുക. ഇത്തരം ശീലങ്ങൾ ജീവിതത്തിൽ പ്രവർത്തികമാക്കുന്നതോടെ അമിതവണ്ണം ഒഴിവാക്കി ആരോഗ്യമുള്ള ജീവിതം വീണ്ടെടുക്കാം.
