പുതിയ തട്ടകത്തില്‍ മികച്ച പ്രകടനം കാഴ്ചവെയ്‌ക്കാന്‍ തയ്യാറെടുക്കുകയാണ് ഇന്ത്യന്‍ സ്പിന്നറായ അശ്വിന്‍. ഐപിഎല്ലിന്റെ കഴിഞ്ഞ രണ്ടു സീസണുകളിലും കിംഗ്സ് ഇലവന്‍ പഞ്ചാബിന്റെ ക്യാപ്റ്റനായിരുന്ന അശ്വിന്‍ ഇക്കുറി കളിക്കുന്നത് ഡല്‍ഹി ക്യാപിറ്റല്‍സിനു
വേണ്ടിയാണ്.
സെപ്തംബര്‍ 19 ന് അബുദാബിയില്‍ നടക്കുന്ന ഉദ്ഘാടന മത്സരത്തില്‍ നിലവിലെ ചാമ്പ്യന്മാരായ മുംബൈ ഇന്ത്യന്‍സും റണ്ണേഴ്സ് അപ്പായ ചെന്നൈ സൂപ്പര്‍ കിംഗ്സും തമ്മിലാണ് പോരാട്ടം. ഇന്ത്യന്‍ സമയം 3.30 നും 7.30 നുമാണ് ആരാധകര്‍ കാത്തിരിക്കുന്ന മത്സരങ്ങള്‍ നടക്കുക. ഐപിഎല്ലിന്റെ ഇത്തവണത്തെ മത്സരങ്ങള്‍ ദുബായിലും(24), അബുദാബിയിലും (20), ഷാര്‍ജയിലു(12) മായാണ് നടത്താന്‍ തീരുമാനിച്ചിരിക്കുന്നത്. പ്ലേ ഓഫുകളുടെ വേദികളും സമയവും പിന്നീട് അറിയിക്കും.
കഴിഞ്ഞ സീസണില്‍ രാജസ്ഥാന്‍ റോയല്‍സ് താരം ജോസ് ബട്‌ലറെ അശ്വിന്‍ മങ്കാദിങിലൂടെ പുറത്താക്കിയത് ഏറെ വിവാദം സൃഷ്ടിച്ചിരുന്നു. ഈ പോരാട്ടത്തിന് കച്ച മുറുക്കി തന്നെയാണ് താരം കളത്തിലിറങ്ങാന്‍ തീരുമാനിച്ചിരിക്കുന്നത്.വലം കൈ സ്പിന്നറും ബാറ്റ്സ്മാനുമായ അശ്വിന്‍ ഇപ്പോള്‍ ഇടംകൈ ബൗളിംഗ് പരീക്ഷിക്കാനൊരുങ്ങിയിരിക്കുകയാണ്. ഇടംകൈ കൊണ്ട് പരിശീലനം നടത്തുന്നതിന്റെ വിഡിയോ അശ്വിന്‍ തന്നെയാണ് സോഷ്യല്‍ മീഡിയ വഴി പങ്കുവച്ചത്.
വിഡിയോ വളരെ പെട്ടന്നു തന്നെ വൈറലാവുകയും ചെയ്തു. 2018 ല്‍ നടന്ന ഐപിഎല്‍ ലേലത്തില്‍ 7.6 കോടി രൂപയ്‌ക്കാണ് അശ്വിനെ കിംഗ്സ് ഇലവന്‍ പഞ്ചാബ് സ്വന്തമാക്കിയത്. പഞ്ചാബില്‍ എത്തുന്നതിന് മുന്‍പ് ചെന്നൈ സൂപ്പര്‍ കിംഗ്സ്, പൂനെ സൂപ്പര്‍ ജയന്റ്സ് ടീമുകള്‍ക്ക് വേണ്ടിയും അശ്വിന്‍ കളിച്ചിട്ടുണ്ട്.
2018 ല്‍ ഏഴാമതായും 2019 ല്‍ ആറാമതുമായാണ് കിംഗ്സ് ഇലവന്‍ ഫിനിഷ് ചെയ്തത്. കിംഗ്സ് ഇലവന്‍ പഞ്ചാബിന്റെ ക്യാപ്റ്റനായിരുന്ന അശ്വിന്‍ 28 മത്സരങ്ങളില്‍ നിന്നായി 25 വിക്കറ്റുകള്‍ സ്വന്തമാക്കിയിട്ടുണ്ട്.
