പ്രകൃതിയുടെ ഭംഗി തൊട്ടറിഞ്ഞ ഒരുപാട് വിനോദ സഞ്ചാര കേന്ദ്രങ്ങള് ഉണ്ട് നമ്മുടെ കേരളത്തില്. അതു പോലെ ഒരിടമാണ് മലപ്പുറം ജില്ലയിലെ പാലൂര്കോട്ട. ഇവിടുത്തെ പ്രകൃതി ഭംഗി അധികമൊന്നും ആരും ആസ്വദിച്ചു കാണില്ല. ഒരു വിനോദസഞ്ചാര കേന്ദ്രത്തിനു വേണ്ടത്ര പ്രചാരവും സജീകരണങ്ങളും ഇവിടെ ഇല്ല എന്നതു തന്നെയാണ് അതിന്റെ പ്രധാന കാരണം. എങ്കിലും ദിനംപ്രതി നിരവധി ആളുകളാണ് പ്രകൃതിയുടെ ഭംഗി ആസ്വദിക്കാനായി ഇവിടെ എത്തുന്നത്.
പാലൂര്കോട്ട എന്ന് കേള്ക്കുമ്പോള് നമ്മുടെ മനസ്സില് വരുന്നത് ഒരു കോട്ടയാണ്. എന്നാല് ഇത് ഒരു വെള്ളച്ചാട്ടമാണ്. മലപ്പുറം നഗരത്തില് നിന്നും 17 കിലോമീറ്ററും പെരിന്തല്മണ്ണയില് നിന്നും 13 കിലോമീറ്റര് താണ്ടിയാല് പാലൂര്കോട്ടയില് എത്താം.
കടുങ്ങപുരം വഴിയും കുളത്തൂര് വഴിയും എത്തി ചേരാവുന്ന പുഴക്കാട്ടിരി പഞ്ചായത്തിലാണ് ഈ വെള്ളച്ചാട്ടം. ഏകദേശം 500 അടി താഴ്ചയിലാണ് പാലൂര്കോട്ട . തൊട്ടടുത്ത് ആണെങ്കിലും ഈ സുന്ദരമായ വെള്ളച്ചാട്ടം കാണാത്തവര് ഒരുപാടുണ്ട് ഈ നാട്ടില്. ചരിത്രപരമായ ബന്ധം പാലൂര്കോട്ടയ്ക്കുണ്ട്. ഈ വെള്ളച്ചാട്ടത്തിന് ഇങ്ങനെയൊരു പേര് വരാന് കാരണവും ആ ബന്ധം തന്നെയണ്. ടിപ്പുസുല്ത്താന്റെ കാലത്ത് പാലക്കാട് നിന്നും പടയോട്ടം കഴിഞ്ഞ് മലബാറിലേക്ക് പാകുംവഴി വഴി ടിപ്പു സുല്ത്താന് ഇവിടെ ഇടത്താവളമാക്കിയിരുന്നു എന്നും പാലൂര്കോട്ടയ്ക്ക് മുകളില് ഒളിസങ്കേതം ഉണ്ടാക്കി താമസിച്ചിരുന്നു എന്നും പറയുന്നു.
ഈ കോട്ടയുടെ മുകളില് നിന്നു നോക്കിയാല് മലബാര് മുഴുവനായും കാണാന് സാധിക്കും എന്ന ഒരു പ്രത്യേകത കൂടിയുണ്ട്. അതുകൊണ്ടു തന്നെ ശത്രുക്കളുടെ വരവ് ഇവിടെ നിന്നും അറിയാന് സാധിക്കുന്നതിനാല് കുറച്ചുകാലം ടിപ്പു ഇവിടെ താവളമാക്കുകയും ചെയ്തിരുന്നു. ജൂണ്, ജൂലൈ മാസത്തില് മഴ ശക്തമാകുന്നതോടെ വെള്ളച്ചാട്ടത്തിന്റെ ഒഴുക്കും കൂടുന്നു. ഓഗസ്റ്റ് മാസത്തിലാണ് ഇവിടെ കൂടുതല് ആളുകള് എത്തുന്നത്. ആരും നോക്കി നിന്നു പോകും പ്രകൃതിയുടെ ഈ സൗന്ദര്യത്തെ, അത്രയ്ക്കും മനോഹരമാണ് പാലൂര് കോട്ടയിലെ കാഴ്ച.
