ഭൂപ്രകൃതിയാൽ അനുഗ്രഹീതയാണ് കേരളം അതിനാൽ തന്നെ വിനോദ സഞ്ചാരികളുടെ പ്രിയപ്പെട്ട സ്ഥലം കൂടിയാണ് ദൈവത്തിന്റെ സ്വന്തം നാട് എന്നറിയപ്പെടുന്ന നമ്മുടെ ഈ കൊച്ചു കേരളം . കേരള ടൂറിസം എന്ന് പറയുമ്പോഴും , കേൾക്കുമ്പോഴും , ആലോചിക്കുമ്പോഴും മനസിലേക്ക് കടന്ന് വരുന്നത് മൂന്നാറും , തേക്കടിയും , വയനാടും, കോവളവും ഒക്കെയാണ് . എന്നാൽ ഇതേ സ്ഥലങ്ങളിൽ തന്നെ ഇനിയും നാം കാണാത്ത സ്ഥലങ്ങൾ ഉണ്ട് എന്ന് നമ്മെ ബോധ്യപ്പെടുത്തുന്ന മനോഹരമായ ഒരു കോഫി ടേബിൾ പുസ്തകമാണ് “കേരളം അൺടോൾഡ് “.
കൊച്ചി ആസ്ഥാനമായി പ്രവർത്തിക്കുന്ന ഫ്രണ്ട് ഏൻഡ് മീഡിയയുടെ വിനോദ സഞ്ചാരികൾക്ക് വേണ്ടിയുള്ളതും വിനോദ സഞ്ചാരത്തെക്കുറിച്ചുള്ളതും യാത്രകൾ ഇഷ്ടപെടുന്നവർക്കുമായി പ്രസിദ്ധീകരിക്കുന്ന നാലാമത്തെ പ്രസിദ്ധീകരണമാണ് “കേരളം അൺടോൾഡ് “. ഒരു വർഷത്തോളം എടുത്ത് ഫ്രണ്ട് ഏൻഡ് മീഡിയയുടെ എഡിറ്റർ വിനു വി നായരും കൂട്ടരും പതിനാല് ജില്ലകളിലൂടെയും സഞ്ചരിച് ,പ്രകൃതിയെ അറിഞ്ഞും അനുഭവിച്ചും ചിത്രങ്ങൾ പകർത്തിയും രൂപകൽപന ചെയ്ത മനോഹരമായ ഒരു ആവിഷ്കാരമാണ് “കേരളം അൺടോൾഡ് “.
പ്രകൃതി സൗന്ദര്യം കനിഞ്ഞു നൽകിയ എന്നാൽ സഞ്ചാരികളുടെ കണ്ണെത്താത്ത സ്ഥലങ്ങളിലൂടെ സഞ്ചരിച്ചു കൊണ്ട് എടുത്ത അതിമനോഹരമായ ചിത്രങ്ങളാണ് കേരളം അൺടോൾഡ് എന്ന കോഫി ടേബിൾ പുസ്തകത്തിന്റെ മറ്റൊരു പ്രത്യേകത . ഈ പുസ്തകത്തിൽ പറഞ്ഞിരിക്കുന്ന സ്ഥലങ്ങൾ കേരളത്തിൽ തന്നെയുള്ളതാണോ എന്ന് അതിശയം തോന്നിപ്പിക്കുന്ന വിധം മനോഹരമാണ് ഇതിൽ കൊടുത്തിരിക്കുന്ന ചിത്രങ്ങൾ .
കേരളത്തിൽ അധികമാരും കേട്ടിട്ടില്ലാത്ത മനോഹരമായ സ്ഥലങ്ങളാണ് പാണ്ടിപ്പത്ത് , വരയാട്ടുമൊട്ട , മങ്കയം , മണ്ണീറ വെള്ളച്ചാട്ടം , അടവി , മാർമല വെള്ളച്ചാട്ടം , പണ്ടലൂർ മല , നെടുകയം മലക്കാട് എന്നിവ . അധികമാരും ചെന്നിട്ടില്ലാത്ത ഈ പ്രദേശങ്ങൾ ഒക്കെ തന്നെ പ്രകൃതി സൗന്ദര്യം കരകവിഞ്ഞൊഴുകുന്ന സ്ഥലങ്ങളാണ് . ഈ സ്ഥലങ്ങളിൽ എങ്ങിനെ എത്തി ചേരാം എന്നുള്ളതും , സഞ്ചാരികൾക്ക് താമസിക്കാൻ പറ്റുന്ന റിസോർട്ടുകളെ കുറിച്ചും ഈ പുസ്തകത്തിൽ വിവരിക്കുന്നു .
കേരള തമിഴ് നാട് അതിർത്തിയിൽ സ്ഥിതി ചെയ്യുന്ന വന പ്രദേശമാണ് പാണ്ടിപ്പത്ത് അത് പോലെ കോട്ടയം ജില്ലയിലെ ഈരാറ്റുപേട്ടക്ക് സമീപം തീക്കോയി എന്ന സ്ഥലത്ത് സ്ഥിതി ചെയ്യുന്ന മനോഹരി ആണ് മാർമല വെള്ളച്ചാട്ടം. കോന്നി അടവി ഇക്കോ ടൂറിസത്തിന്റെ അടുത്ത് തന്നെ സ്ഥിതി ചെയ്യുന്ന ഒന്നാണ് മണ്ണീറ വെള്ളച്ചാട്ടം. ഈ പ്രദേശങ്ങൾ എല്ലാം തന്നെ ഇന്നും പലർക്കും അറിയാത്ത പ്രദേശങ്ങളാണ് .
കൊറോണ കാലം കവർന്നെടുത്ത ടൂറിസം മേഖല വീണ്ടും ഉയിർത്തെഴുനേൽക്കുമ്പോൾ , സഞ്ചാരം ഇഷ്ടപ്പെടുന്നവർക്ക് , പ്രകൃതി സൗന്ദര്യത്തിന്റെ മടിയിൽ സമയം ചിലവഴിക്കാൻ ആഗ്രഹിക്കുന്നവർക്ക് പോകുവാൻ കഴിയുന്ന സഥലങ്ങൾ മനോഹരമായി വർണ്ണിച്ചിരിക്കുന്നു കേരളം അൺടോൾഡ് .
വരൂ കാണാം കാണാത്ത കേരളത്തെ കേരളം അൺടോൾഡ് എന്ന കോഫി ടേബിൾ പുസ്തകത്തിലൂടെ .
