രാജ്ഞിയെ പോലെ താമസിക്കാൻ കൊട്ടാരം വാടകയ്ക്ക് , ബ്രിട്ടനിലെ പാർക്ക് ഡീൻ റിസോർട്സ് കമ്പനിയാണ് ഈ ഓഫർ നൽകുന്നത്. ഒരു കോടി രൂപ മുടക്കിയാണ് കാരവൻ കൊട്ടാരമാക്കിയിരിക്കുന്നത്. സ്കാർബോ പ്രവിശ്യയിലെ കെയ്റ്റൺ ബേയിലാണ് 1500 രൂപ നൽകി രാജ്ഞിയാവാനുള്ള അവസരം ഒരുക്കിയിരിക്കുന്നത്. ഒരാൾക്ക് ഒരു ദിവസം താമസിക്കാനുള്ള ചിലവ് ആണിത്.
ഒരു കാരവനിലെ കൊട്ടാരമല്ലേ, അത്രക്കൊന്നും ആഢംബരം ഉണ്ടാകില്ല എന്നാണ് കരുതുന്നതെങ്കിൽ നിങ്ങൾക്ക് തെറ്റി. ബ്രിട്ടീഷ് രാജകുടുംബത്തിന്റെ ഔദ്യോഗിക വസതിയായ ബക്കിങ്ങാം കൊട്ടാരത്തിന്റെ അതേ മാതൃകയിൽ നിർമ്മിച്ചിരിക്കുന്ന ഈ കാരവൻ കൊട്ടാരത്തിൽ ആഢംബരത്തിന് ഒരു കുറവും ഇല്ലായെന്ന് തന്നെ പറയാം.
ബക്കിങ്ങാം കൊട്ടാരത്തിലേത് പോലെ സിംഹാസനങ്ങളും സ്വർണം പൂശിയ അക്വേറിയവും കാരവൻ കൊട്ടാരത്തിലുണ്ട്. ഒരു വിസിറ്റേഴ്സ് റൂം, രണ്ട് കിടപ്പുമുറികൾ, മട്ടുപ്പാവ്, അടുക്കള എന്നിവയ്ക്കുപുറമേ സ്വർണം പൂശിയ പാത്രങ്ങളും നിങ്ങളുടെ വളർത്തുനായകൾക്കുള്ള സൗകര്യങ്ങളും സ്വർണം പൂശിയ കക്കൂസുകളും എടുത്ത് പറയേണ്ടത് തന്നെ. സാധാരണയായി കോർഗി ഇനത്തിൽ പെടുന്ന നായയെ ആണ് രാജകുടുംബങ്ങൾ വളർത്താറുള്ളത്. അതിനാൽ തന്നെ അതനുസരിച്ച് ആണ് ഇവിടെ എല്ലാം ഒരുക്കിയിരിക്കുന്നത്. നായകൾക്കുള്ള ഭക്ഷണം നൽകുന്നത് സ്വർണം പൂശിയ പാത്രങ്ങളിൽ തന്നെയാണ്.
കൊട്ടാരത്തിലേത് പോലെ എല്ലാ മുറികളും പ്രകാശപൂരിതവും ആയിരിക്കും ഇവിടെയും. വെൽവെറ്റ്, സ്വർണം, സിൽക്ക് എന്നിവ ഉപയോഗിച്ച് നിർമ്മിച്ചിരിക്കുന്ന വസ്തുക്കൾ ആണ് കാരവൻ കൊട്ടാരത്തിൽ നിങ്ങൾക്ക് കാണാൻ സാധിക്കുക.
കൊട്ടാരത്തിൽ എത്തുമ്പോൾ തന്നെ ലഭിക്കുന്ന രാജകീയമായ പാനീയവും വൈകുന്നേരങ്ങളിൽ മട്ടുപ്പാവിൽ ഇരുന്ന് കഴിക്കാനുള്ള ഷാംപെയിനുമായി ഈ കാരവൻ കൊട്ടാരം പുതിയ രാജ്ഞിക്കും രാജാവിനും വേണ്ടി ഓരോ ദിവസവും കാത്തിരിക്കുകയാണ്.
ലോകത്തിലെ തന്നെ ആദ്യ കാരവൻ കൊട്ടാരം ആണ് ഇതെന്ന് പറയപ്പെടുന്നു. ഒരു പക്ഷെ പലർക്കും ഇതൊരു തമാശയായി തോന്നാമെങ്കിലും ഒരു ദിവസമെങ്കിലും രാജാവോ രാജ്ഞിയോ ആയി സുഖസുന്ദരമായി ജീവിക്കണം എന്ന ആഗ്രഹം ഉള്ളവർക്ക് ഈ കാരവൻ കൊട്ടാരം വലിയൊരു കാര്യം തന്നെയായിരിക്കും.
‘ലിവ് ലൈക് ദി ക്യൂൻ’ എന്ന വാചകത്തോടെ വന്ന പരസ്യം ഇതിനകം തന്നെ വൈറൽ ആയിക്കഴിഞ്ഞു.
കൊട്ടാരത്തിലെ ആഢംബരത്തിൽ നിന്ന് ഒരു തരി പോലും ആഢംബരം കുറയ്ക്കാതെ തന്നെയാണ് കമ്പനി കാരവൻ കൊട്ടാരം നിർമ്മിച്ചിരിക്കുന്നത്.
