ധാര്മ്മിക അടിത്തറയുള്ള കുടുംബാംഗങ്ങളാണ് ഏതൊരു രാജ്യത്തിന്റെയും സമ്പത്ത്. നല്ല വ്യക്തികളിലൂടെയാണ് നല്ല കുടുംബങ്ങള് രൂപം കൊള്ളുന്നത്. നല്ല കുടുംബങ്ങളിലൂടെയാണ് നല്ല സമൂഹം രൂപം കൊള്ളുന്നത്. നല്ല സമൂഹത്തിലൂടെയാണ് നല്ല രാഷ്ട്രം രൂപം കൊള്ളുന്നത്. എന്നാല് ഒരു രാഷ്ട്രത്തിന്റെ നിലനില്പ്പിനും പുരോഗതിക്കും അത്യന്താപേക്ഷിതമായ കുറച്ചു കാര്യങ്ങളുണ്ട്.
പ്രധാനമായും ആറ് കാര്യങ്ങളാണ് ഒരു രാഷ്ട്രത്തിനുണ്ടായിരിക്കേണ്ടത്. സമ്പന്നര്, സൈനികര്, പണ്ഡിതന്മാര്, രാജാവ്, വൈദ്യന്, നദി. സമ്പന്നര് ഉള്ള രാജ്യത്ത് മാത്രമെ വ്യാപാരവും വ്യവസായവും വളരുകയുള്ളു. ഇതിലൂടെ തൊഴില് സാധ്യതകള് വര്ദ്ധിക്കുകയും അങ്ങനെ ജനങ്ങള് സാമ്പത്തിക സുസ്ഥിരത നേടുകയും ചെയ്യും.
രാജാവ് എന്നത് കൊണ്ട് ഇവിടെ ഉദ്ദേശിക്കുന്നത് ഭരണാധികാരിയാണ്. ഒരു രാഷ്ട്രത്തിന് ക്രമസമാധാനം ഉറപ്പുതരുന്നവരാണ് ഭരണാധികാരിയും സൈനികരും. ജനങ്ങള് ഭയരഹിതരായി ജീവിക്കണമെങ്കില് ഇവര് രണ്ടു പേരും ഉണ്ടായിരിക്കേണ്ടത് അത്യാവശ്യമാണ്.
ഒരു രാഷ്ട്രത്തെ സംസ്ക്കാര സമ്പന്നമാക്കുന്നത് അവിടത്തെ ജനങ്ങളുടെ വിദ്യാഭ്യാസമാണ്. അതുകൊണ്ട് തന്നെ രാജ്യത്തെ ജനങ്ങളെ വിദ്യാസമ്പന്നരാക്കാന് പണ്ഡിതന്മാര് ഉണ്ടായിരിക്കണം. ആരോഗ്യമുള്ള ജനതയും ഒരു രാഷ്ട്രത്തിന്റെ സമ്പത്താണ്. എത്രയൊക്കെ കരുതലുകളെടുത്താലും രോഗം എന്നും മനുഷ്യര്ക്കൊപ്പമുണ്ട്. അതുകൊണ്ട് തന്നെ രോഗങ്ങളെ നേരിടുന്നതിനായി വൈദ്യന്റെ സാന്നിദ്ധ്യം അത്യന്താപേക്ഷിതമാണ്. അവസാനമായി ഒരു രാജ്യത്ത് ഉണ്ടായിരിക്കേണ്ടത് ജലമാണ്. ഒരു രാജ്യത്തിന്റെ നിലനില്പ്പിന്റെ അടിസ്ഥാന ഘടകം കൂടിയാണ് നദി. ജലസമൃദ്ധി ഭൂമിയെ ഫലപുഷ്ടി ഉള്ളതാക്കി സമൃദ്ധമായ വിളവ് നല്കുക വഴി ജനങ്ങള്ക്ക് പട്ടിണിയെ ഭയപ്പെടാതെ ജീവിക്കാം. ഇതോടെ രാജ്യം ഐശ്വര്യപൂര്ണമാകുന്നു.
ഈ ആറ് കാര്യങ്ങളില്ലാത്ത ഒരു രാജ്യത്ത് ജീവിക്കുക എന്നത് ദുഷ്ക്കരമായിരിക്കും. അങ്ങനെയുള്ള ഒരു രാജ്യത്ത് അധിവസിക്കാന് ജനങ്ങള്ക്ക് കഴിയില്ല. അതുകൊണ്ട് നാം നമ്മളില് ഒതുങ്ങിക്കൂടാതെ നമ്മുക്ക് ചുറ്റുമുള്ള കാര്യങ്ങളില് കൂടി അവബോധരായിരിക്കുക. രാജ്യത്തിന്റെ നല്ല നടത്തിപ്പിനായി പൗരന് എന്ന നിലയില് ഓരോ വ്യക്തിക്കും ചെയ്യാനാവുന്ന ചെറുതും വലുതുമായ കാര്യങ്ങള് ചെയ്യുക. നല്ലൊരു രാഷ്ട്രത്തെ കെട്ടിപ്പടുക്കുക.
