ന്യൂഡല്ഹി: ഐപിഎല്ലിന്റെ 13-ാം സീസണ് ഇന്ന് കൊടിയേറും. ആദ്യ മത്സരത്തില് നിലവിലെ ചാമ്പ്യന്മാരായ മുംബൈ ഇന്ത്യന്സ് ധോണിയുടെ ചെന്നൈ സൂപ്പര് കിംഗ്സിനെ നേരിടും. അബുദാബിയിലെ സ്റ്റേഡിയത്തില് ഇന്ത്യന് സമയം രാത്രി 7.30നാണ് മത്സരം ആരംഭിക്കുക.
ഐപിഎല്ലില് അഞ്ചാം കിരീടം ലക്ഷ്യമിട്ടാണ് മുംബൈ ഇന്ത്യന്സ് ഇറങ്ങുന്നത്. മുംബൈ ഇന്ത്യന്സിന്റെ സ്വപ്നങ്ങള്ക്ക് കരുത്തേകാന് പോന്നൊരു ടീമിനെയാണ് ഇത്തവണ അണിനിരത്തിയിരിക്കുന്നത്. രോഹിത് ശര്മ്മ നയിക്കുന്ന ബാറ്റിംഗ് നിരയ്ക്ക് ക്വിന്റണ് ഡി കോക്കിനൊപ്പം ക്രിസ് ലിനും സൂര്യകുമാര് യാദവും ഇഷാന്ത് കിഷനും ഹര്ദ്ദിക് പാണ്ഡ്യയും കരുത്ത് പകരും.
ലസിത് മലിംഗയുടെ അസാന്നിദ്ധ്യത്തെ മറികടക്കാന് മികച്ച പേസ് നിരയെ തന്നെയാണ് മുംബൈ സജ്ജമാക്കിയിട്ടുള്ളത്. ജസ്പ്രീത് ബൂമ്രയും ട്രെന്ഡ് ബോള്ട്ടും കൂട്ടര്നൈലും മക്ലീനഗനും ഒപ്പം ജയിംസ് പാറ്റിന്സനും ധവാല് കുല്ക്കര്ണിയും ഏത് ബാറ്റിംഗ് നിരയ്ക്കും വെല്ലുവിളി ഉയര്ത്താന് കഴിയുന്നവരാണ്. ഓള് റൗണ്ടര്മാരായി കീറോണ് പൊള്ളാര്ഡും ഹര്ദ്ദിക് പാണ്ഡ്യയും ഷെര്ഫെയ്ന് റൂഥര്ഫോഡും കൃണാല് പാണ്ഡ്യയും. സ്പിന് നിരയില് ജയന്ത് യാദവും രാഹുല് ചാഹറും ഇറങ്ങും. മഹേല ജയവര്ദ്ധനയുടെ പരിശീലന മികവില് ടീം മികച്ച പ്രകടനം തുടരുമെന്നാണ് ആരാധകരുടെ പ്രതീക്ഷ.
അതേസമയം, ഐപിഎല്ലില് ഏറ്റവും സ്ഥിരതയാര്ന്ന പ്രകടനം കാഴ്ചവയ്ക്കുന്ന ടീമാണ് ചെന്നൈ സൂപ്പര് കിംഗ്സ്. മൂന്ന് ഐപിഎല് കിരീടങ്ങള്. അഞ്ച് തവണ റണ്ണര് അപ്പ്. രാജ്യാന്തര ക്രിക്കറ്റിനോട് വിടചൊല്ലിയ ധോണിയുടെ പ്രകടനം തന്നെയാണ് ലോകമെമ്പാടുമുള്ള ക്രിക്കറ്റ് പ്രേമികള് കാത്തിരിക്കുന്നത്. സുരേഷ് റെയ്നയും ഹര്ഭജന് സിംഗും മഞ്ഞക്കുപ്പായത്തില് ഇല്ലെങ്കിലും ചെന്നൈയുടെ കരുത്ത് കുറയുന്നില്ല. ബാറ്റിംഗ് നിരയില് ഷെയ്ന് വാട്സനും ഫാഫ് ഡുപ്ലസിയും അമ്പാട്ടി റായിഡുവും കേദാര് ജാദവും. ഓള് റൗണ്ട് മികവുമായി ഡ്വെയ്ന് ബ്രാവോയും സാം കറനും രവീന്ദ്ര ജഡേജയും മിച്ചല് സാന്റനറും.
സ്പിന് നിരയില് ഇമ്രാന് താഹിറും കരണ് ശര്മയും പിയുഷ് ചവ്ലയും അണിനിരക്കും. ഹെയ്സല് വുഡും ലുംഗി എങ്കിഡിയും ദീപക് ചഹറും ഷാര്ദൂല് താക്കൂറും ഉള്പ്പെട്ട പേസ് നിരയില് മലയാളി താരം ആസിഫുമുണ്ട്.
Comments