കേരളത്തിലെ പത്തനംത്തിട്ട ജില്ലയിൽ പന്തളത്തിനടുത്തുള്ള ഉളനാട് എന്ന പ്രദേശത്ത് സ്ഥിതി ചെയ്യുന്ന പ്രസിദ്ധമായ ക്ഷേത്രമാണ് ഉളനാട് ശ്രീകൃഷ്ണ സ്വാമി ക്ഷേത്രം .ഉദ്ദിഷ്ട കാര്യസിദ്ധിക്കായി ഉറി വഴിപാടായി സമർപ്പിക്കുന്ന കേരളത്തിലെ ഒരേ ഒരു ക്ഷേത്രം കൂടിയാണ് ഉളനാട് ക്ഷേത്രം . എല്ലാ രോഹിണി നാളിലും ക്ഷേത്രത്തിൽ നടക്കുന്ന മഹാ സുദർശന ലക്ഷ്യ പ്രാപ്തി പൂജയിൽ ഉറി വഴിപാടായി നേർന്നാൽ ഉദിഷ്ടകാര്യം സാധിക്കും എന്നാണ് വിശ്വാസം .
ബാലരൂപത്തിൽ ഭഗവാന്റെ പ്രതിഷ്ഠയുള്ള അപൂർവം ചില ക്ഷേത്രങ്ങളിൽ ഒന്നാണ് ഉളനാട് ക്ഷേത്രം . 1195 മാണ്ടിൽ മീനമാസത്തിലെ രോഹിണി നാളിലാണ് ക്ഷേത്രത്തിൽ പ്രതിഷ്ഠ നടത്തിയത് . ഈ പ്രദേശത്തുണ്ടായിരുന്ന ആചാര്യന്മാരും സാമുദായിക നേതാക്കളും തങ്ങൾക്ക് ആരാധിക്കുവാൻ വേണ്ടി ഒരു ക്ഷേത്രം വേണമെന്ന് തീരുമാനിക്കുകയും , വിശാലമായ പോളച്ചിറ ജലാശയത്തിന്റെ കരയിൽ ക്ഷേത്രം പണിയുവാനായി ഉചിതമായ സ്ഥലം കണ്ടെത്തുകയും ചെയ്തു . ക്ഷേത്രത്തിനകത്ത് പ്രതിഷ്ഠ ചെയ്യുവാനുള്ള വിഗ്രഹം പണിതത് ചെങ്ങന്നൂരുള്ള പരമ്പരാഗത ശിൽപികൾ ആണ് .
ക്ഷേത്രം പണി കഴിഞ്ഞു പ്രതിഷ്ഠ നടക്കുന്ന സമയത്തു ഇടിയോട് കൂടി മഴ പെയ്തതും , ക്ഷേത്രത്തിന് മുകളിലൂടെ കൃഷ്ണപ്പരുന്ത് വട്ടമിട്ടു പറന്നതും ഭഗവാന്റെ സാന്നിധ്യം അവിടെ ഉണ്ട് എന്നുള്ളതിന്റെ തെളിവായി വിശ്വാസികൾ കാണുന്നു . വർഷങ്ങൾക്കു ശേഷം ക്ഷേത്രം പുനർനിർമ്മിക്കുവാനായി താഴികക്കുടം ഇളക്കിയപ്പോൾ ആദ്യ പ്രതിഷ്ഠ സമയത്ത് വെച്ചിരുന്ന വെറ്റില ഉണങ്ങാതെ തന്നെ ഇരുന്നത് ഇന്നും അത്ഭുതമായി തന്നെ തുടരുന്നു .
അതുകൊണ്ട് തന്നെയാണ് ഉദ്ദിഷ്ടകാര്യത്തിനായി രോഹിണി നാളുകളിൽ നടത്തുന്ന മഹാ സുദർശന ലക്ഷ്യ പ്രാപ്തി പൂജയിൽ ലക്ഷകണക്കിന് ആളുകൾ ആണ് പങ്കെടുക്കുന്നതും ഉറി വഴിപാടായി സമർപ്പിക്കുന്നതും . ഉദ്ദിഷ്ടകാര്യ സാധ്യത്തിനു മാത്രമല്ല ക്ഷേത്രത്തിന് പ്രസിദ്ധിയുള്ളത് . നഷ്ടപ്പെട്ട് പോയ സാധനങ്ങൾ തിരികെ കിട്ടാനായി ഭഗവാന് പാൽപ്പായസം വഴിപാടായി നേർന്നു പ്രാർത്ഥിച്ചാൽ തിരികെ കിട്ടും എന്നുള്ളതും അനുഭവ സാക്ഷ്യം .രോഹിണി നാളിൽ നടക്കുന്ന ചടങ്ങിൽ പങ്കെടുത്താൽ വിവാഹ തടസ്സം , ജോലി തടസ്സം എന്നിവ മാറി പോകും എന്നും കുട്ടികൾ ഇല്ലാത്തവർക്ക് സന്താനലബ്ധി ഉണ്ടാവും എന്നതുമാണ് വിശ്വാസം .
ചിങ്ങം ഒന്ന് , ഉത്രാടം , തിരുവോണം , വിനായക ചതുർഥി , അഷ്ടമിരോഹിണി , നവരാത്രി മഹോത്സവം , മീനത്തിലെ രോഹിണി നാളിലെ പ്രതിഷ്ഠദിനം എന്നിവ ഈ ക്ഷേത്രത്തിലെ പ്രധാന ദിനങ്ങൾ ആണ് . ക്ഷേത്രത്തിൽ ഉപദേവതകളായി രക്ഷസ്സ് , ദുർഗ്ഗ , നാഗങ്ങൾ , ഗണപതി എന്നിവരും കുടികൊള്ളുന്നു . തുലാമാസത്തിലെ ആയില്യം നാളിൽ നാഗങ്ങൾക്ക് നൂറും പാലും വഴിപാട് കഴിക്കുന്നതും ക്ഷേത്രത്തിലെ പ്രധാന വഴിപാടുകളിൽ ഒന്നാണ് .
