ന്യൂഡല്‍ഹി: ആഗോള തലത്തിലെ ഇന്ത്യയുടെ വിശ്വാസ്യതയും കാര്യക്ഷമതയും സുരക്ഷാ കൗണ്‍സില്‍ അംഗത്വ സാദ്ധ്യത കൂട്ടിയെന്ന് ഇന്ത്യന്‍ വിദേശകാര്യവകുപ്പ്. നിലവിലെ സ്ഥിരാംഗങ്ങളായ നാലു പ്രമുഖരാജ്യങ്ങളുടേയും പ്രഥമ പരിഗണനയിലുള്ളത് ഇന്ത്യയാണെന്ന് വിദേശകാര്യ സഹമന്ത്രി വി.മുരളീധരന്‍ വ്യക്തമാക്കി. ലോകസഭയിലെ ചോദ്യത്തിന് മറുപടിയാണ് മുരളീധരന്‍ നല്‍കിയത്.
ഇന്ത്യയിന്ന് ആഗോളതലത്തിലെ ഏറ്റവും സുതാര്യവും കാര്യക്ഷമവുമായ രാജ്യമായി മാറിയിരിക്കുന്നു. അതിനാല്‍ത്തന്നെ നിലവിലെ സ്ഥിരാംഗങ്ങളായ അഞ്ചില്‍ നാലുപേര്‍ക്കും ഇന്ത്യ സുരക്ഷാ കൗണ്‍സിലില്‍ വേണമെന്ന ആവശ്യത്തില്‍ യാതൊരു അഭിപ്രായ വ്യത്യാസവുമില്ല. വര്‍ഷങ്ങളായി ഇന്ത്യ നടത്തിക്കൊണ്ടിരിക്കുന്ന ശാന്തിയുടേയും സമാധാനത്തിന്റേയും മാര്‍ഗ്ഗങ്ങളാണ് ഇന്ത്യയ്ക്ക് ലോകസമ്മതി നേടിത്തന്നതെന്നും മുരളീധരന്‍ പറഞ്ഞു.
2015ല്‍ ചൈനയെക്കൂടി വിശ്വാസത്തിലെടുത്ത് പ്രധാനമന്ത്രി നരേന്ദ്രമോദി ഐക്യരാഷ്ട്ര സഭയില്‍ നടത്തിയ പ്രസംഗം മുരളീധരന്‍ ഓര്‍മ്മിപ്പിച്ചു. വിശാലവും വികസന ശീലതയുമുള്ള അയല്‍രാജ്യമെന്ന നിലയില്‍ ഇന്ത്യയുടെ ആശയും വിശാല വീക്ഷണവും ചൈന ആഗോള വേദികളില്‍ പിന്തുണയ്‌ക്കുമെന്ന പ്രത്യാശയും അന്ന് പ്രകടിപ്പിച്ചിരുന്നുവെന്നും മുരളീധരന്‍ ചൂണ്ടിക്കാട്ടി.
നിലവില്‍ 5 സ്ഥിരാംഗങ്ങളും 10 താല്‍ക്കാലിക അംഗങ്ങളുമാണ് സുരക്ഷാ സമിതിയിലുള്ളത്. ഇത്തവണ ഇന്ത്യ സുരക്ഷാ കൗണ്‍സിലേയ്‌ക്ക് വിളിക്കപ്പെട്ടത് സര്‍വ്വസമ്മതിയോടെയാണ്. 2021 ജനുവരി മുതല്‍ ഇന്ത്യ സമ്മേളനങ്ങളുടെ ഭാഗമാകും. ഏഷ്യന്‍ മേഖലയിലെ സമാധാന പരിശ്രമങ്ങള്‍ക്കും ആഗോളതലത്തിലെ കൊറോണ പ്രതിരോധത്തിനും മറ്റ് ലോകരാജ്യ ങ്ങള്‍ക്ക് ബഹിരാകാശ-പ്രതിരോധ ഗവേഷണ സഹായം നല്‍കുന്ന കാര്യത്തിലും ഇന്ത്യ കാണിക്കുന്ന വിശാലമനസ്സാണ് എല്ലാ ലോകരാഷ്‌ട്രങ്ങളുടേയും പ്രശംസ പിടിച്ചുപറ്റുന്നത്.
