എല്ലാ സിനിമകളിലും ഒരു നായകനും നായികയും ഉണ്ടാവും എന്നത് തീർച്ചയുള്ള കാര്യമാണ് . എന്നാൽ അവരിൽ ചിലർ നല്ല സഹതാരങ്ങൾ എന്നതിലപ്പുറം വെള്ളിത്തിരയിലെ മികച്ച പ്രണയജോഡികൾ ആയി മാറുന്നു എന്നുള്ളത് ഏറ്റവും ശ്രദ്ധേയമായ കാര്യമാണ് . അങ്ങിനെ പ്രേക്ഷകഹൃദയം കീഴടക്കിയ പത്തു പ്രണയജോഡികൾ ഇവരൊക്കെയാണ്
1 . പ്രേം നസീർ – ഷീല
മലയാള സിനിമയിലെ നിത്യ വസന്തമായ പ്രേം നസീറും ഷീലയും നൂറ്റി മുപ്പത് സിനിമകളിൽ പ്രണയജോഡികളായി അഭിനയിക്കുകയും , ഗിന്നസ്സ് ബുക്ക് ഓഫ് വേൾഡ് റെക്കോർഡ്സിൽ ഇടം നേടുകയും ചെയ്തിട്ടുണ്ട് . ഇന്നും പ്രേക്ഷകർ ഏറ്റവും കൂടുതൽ ഇഷ്ടപെടുന്ന പ്രണയജോഡികളാണിവർ .
2 . സത്യൻ – ശാരദ
സത്യന്റെ ഏറ്റവും മികച്ച ജോഡിയായിരുന്നു ശാരദ . സ്ത്രീ , മനസ്വിനി , യക്ഷി , അടിമകൾ തുടങ്ങി നിരവധി സിനിമകളിൽ സത്യനും ശാരദയും ജോഡികളായി എത്തിയിട്ടുണ്ട് . എക്കാലത്തെയും മികച്ചതും പക്വതയുള്ളതുമായ പ്രണയജോഡികളായി സത്യനെയും – ശാരദയെയും ഇന്നും മലയാള സിനിമ ലോകം കരുതി പോരുന്നു .
3 . മധു – ശ്രീവിദ്യ
മലയാള സിനിമയിലെ മറ്റൊരു ഹിറ്റ് ജോഡിയാണ് മധുവും ശ്രീവിദ്യയും.അറുപതോളം സിനിമകളിൽ അവർ ഒരുമിച്ചഭിനയിച്ചിട്ടുണ്ട് . മലയാള സിനിമാലോകത്തെ തന്റെ ഏറ്റവും മികച്ച സുഹൃത്താണ് മധു എന്ന് ശ്രീവിദ്യ എന്നും അഭിപ്രായപ്പെട്ടിരുന്നു .
4 . ജയൻ – സീമ
മലയാള സിനിമയിലെ ഏറ്റവും മികച്ച ജോഡികളിൽ ഒന്നാണ് ജയനും സീമയും . ഇരുവരും ജോഡികളായി എത്തിയ ഒട്ടേറെ ഹിറ്റ് സിനിമകൾ മലയാള ചലച്ചിത്രലോകത്ത് പിറവിയെടുത്തിട്ടുണ്ട് .”കണ്ണും കണ്ണും” എന്ന മലയാള സിനിമ ഗാനം , ജയനും സീമയും ഒരുമിച്ചഭിനയിച്ച് പ്രേക്ഷകർ ഇന്നും മൂളുന്ന ഏറ്റവും മനോഹരമായ ഗാനങ്ങളിൽ ഒന്നാണ് .
5 . മോഹൻലാൽ – ശോഭന
മലയാള പ്രേക്ഷക മനസ്സുകൾ ഇന്നും ഒരുമിച്ച് കാണാൻ ആഗ്രഹിക്കുന്ന മലയാള സിനിമയിലെ ഏറ്റവും മികച്ച ജോഡികളാണ് മോഹൻലാലും ശോഭനയും .ഇവർ ഒരുമിച്ചു വെള്ളിത്തിരയിൽ എത്തുമ്പോൾ പിറവിയെടുക്കുന്നത് അഭിനയമുഹൂർത്തങ്ങൾ അല്ല മറിച്ചു ജീവിതം തന്നെയാണ് . തേന്മാവിന്കൊമ്പത്ത് , മിന്നാരം തുടങ്ങിയ ചിത്രങ്ങൾ അന്നും ഇന്നും ഇനി എന്നും ഒരുപോലെ പ്രേക്ഷകർ കാണാൻ ആഗ്രഹിക്കുകയും ആസ്വദിക്കുകയും ചെയ്യുന്ന ചിത്രങ്ങളായിരിക്കും .
6 . മമ്മൂട്ടി – സുഹാസിനി
മമ്മൂട്ടിയും സുഹാസിനിയും വെള്ളിത്തിരയിൽ പ്രേക്ഷകർ കാണാൻ ഇഷ്ടപെടുന്ന മറ്റൊരു ഹിറ്റ് ജോഡിയാണ് . വെറും എട്ട് സിനിമകളിൽ മാത്രമേ അവർ ഒരുമിച്ചഭിനയിച്ചിട്ടുള്ളൂ എങ്കിലും ഇന്നും പ്രേക്ഷകർ വീണ്ടും കാണാൻ ആഗ്രഹിക്കുന്ന ജോഡികളാണിവർ .മണിവത്തൂരിലെ ആയിരം ശിവരാത്രികൾ എന്ന സിനിമയും “നെറ്റിയിൽ പൂവുള്ള ” എന്ന ഗാനവും ഇന്നും പ്രേക്ഷകർ ഓർക്കുന്നു എങ്കിൽ ഈ ജോഡികൾ അത്രയധികം അവരെ ആകർഷിച്ചിട്ടുണ്ട് എന്നുള്ളത് വ്യക്തമായ തെളിവാണ് .
7 . ജയറാം – ഉർവശി
ജയറാമിന്റെയും ഉർവ്വശിയുടെയും ജോഡി പ്രേക്ഷകർ വളരെയധികം ഇഷ്ടപെടുന്ന ഒന്നാണ് പ്രത്യേകിച്ച് അവർ ഒന്നിച്ചെത്തുന്ന കോമഡി രംഗങ്ങൾ . കടിഞ്ഞൂൽ കല്യാണം എന്ന ഒറ്റ സിനിമ മാത്രം മതി അവർ ഏറ്റവും മികച്ച വെള്ളിത്തിരയിലെ ജോഡികളാണ് എന്ന് തിരഞ്ഞെടുക്കുവാൻ .മാളൂട്ടി , മഴവിൽക്കാവടി തുടങ്ങി നിരവധി ചിത്രങ്ങളാണ് ഇവർ മലയാള സിനിമക്ക് വേണ്ടി സംഭാവന ചെയ്തിരിക്കുന്നത് .
8 . കുഞ്ചാക്കോ ബോബൻ – ശാലിനി
അനിയത്തിപ്രാവ് എന്ന ഫാസിൽ ചിത്രത്തിലൂടെയാണ് കുഞ്ചാക്കോ ബോബനും ശാലിനിയും നായിക നായകന്മാരായി വെള്ളിത്തിരയിൽ അരങ്ങേറുന്നത് . ബാലതാരമായി ആളുകളുടെ പ്രിയങ്കരി ആയിരുന്ന ശാലിനി നായികയായി എത്തിയത് ഇരു കയ്യും നീട്ടിയാണ് പ്രേക്ഷകർ സ്വീകരിച്ചത് . അന്ന് മുതൽ അവർ ഒരുമിച്ചഭിനയിച്ച ചിത്രങ്ങൾ എല്ലാം തന്നെ പ്രേക്ഷക പ്രശംസ ഏറ്റുവാങ്ങിയവയായിരുന്നു . പ്രണയത്തിന്റെ പുതിയ ഒരു മുഖമാണ് അനിയത്തിപ്രാവ് എന്ന സിനിമയിലൂടെ കുഞ്ചാക്കോ ബോബനും ശാലിനിയും പ്രേക്ഷകർക്ക് മുന്നിൽ കാഴ്ച വെച്ചത് .
9 . ദിലീപ് – കാവ്യ മാധവൻ
ഇന്ന് ഭാര്യാഭർത്താക്കന്മാരായ ദിലീപും കാവ്യ മാധവനും ഒരുകാലത്ത് വെള്ളിത്തിരയിലെ പ്രേക്ഷകർ ഏറ്റവും കൂടുതൽ ഇഷ്ടപ്പെട്ടിരുന്ന പ്രണയജോഡികളായിരുന്നു . മീശമാധവൻ , സദാനന്ദന്റെ സമയം തുടങ്ങി നിരവധി ചിത്രങ്ങളിൽ ഇവർ ജോഡികളായി വെള്ളിത്തിരയിൽ എത്തിയിട്ടുണ്ട് .
10 . നിവിൻ പോളി – നസ്രിയ
നിവിൻ പോളിയും നസ്രിയയും ആദ്യം ജോഡികളായി ഒരുമിച്ചെത്തിയത് നേരം എന്ന ചിത്രത്തിലൂടെ ആയിരുന്നു . പിന്നീട് അവർ ഒന്നിച്ചഭിനയിച്ച ഓം ശാന്തി ഓശാന, യുവ തുടങ്ങിയ സിനിമകൾ അവരെ പ്രേക്ഷകരുടെ ഇഷ്ടജോഡികളാക്കി മാറ്റുകയായിരുന്നു .
Comments