ലോകത്തിലെ ഏറ്റവും ഉയരമുള്ള ശിവക്ഷേത്രമായ തുങ്കനാഥ് ക്ഷേത്രം അഞ്ച് പഞ്ച കേദാർ ക്ഷേത്രങ്ങളിൽ ഏറ്റവും ഉയരമുള്ള ക്ഷേത്രമാണ് . ഭാരതത്തിലെ സംസ്ഥാനമായ ഉത്തരാഖണ്ഡിലുള്ള രുദ്രപ്രയാഗ് ജില്ലയിലെ തുങ്കനാഥ് പർവ്വതനിരകളിലാണ് ഈ ക്ഷേത്രം സ്ഥിതി ചെയ്യുന്നത് .തുങ്കനാഥ് എന്ന വാക്കിന്റെ അർത്ഥം തന്നെ പർവ്വതങ്ങളുടെ ഈശ്വരൻ എന്നാണ് . ആയിരം വർഷമെങ്കിലും പഴക്കമുള്ള ഈ ക്ഷേത്രം പഞ്ച കേദാർ ക്ഷേത്രങ്ങളിൽ ത്രിതീയ സ്ഥാനത്താണുള്ളത് . മഹാഭാരതത്തിലെ പഞ്ച പാണ്ഡവരുമായി ഈ ക്ഷേത്രത്തിന് വളരെയധികം ബന്ധമുണ്ട് .
ശിവ ഭക്തനോ , പ്രകൃതി സ്നേഹിയോ , സാഹസം ഇഷ്ടപെടുന്ന വ്യക്തിയോ ആകട്ടെ , ഏവർക്കും ഒരുപോലെ ആനന്ദം നൽകുന്ന ക്ഷേത്രമാണ് തുങ്കനാഥ് ക്ഷേത്രം . പ്രകൃതിയുടെ മനോഹാരിത നിറഞ്ഞു നിൽക്കുന്ന പ്രദേശത്ത് സ്ഥിതി ചെയ്യുന്ന ഈ ക്ഷേത്രം പാണ്ഡവരാണ് പണി കഴിപ്പിച്ചെതെന്നും , ശിവഭഗവാന്റെ കൈകൾ വിശ്രമിക്കുന്നത് ഇവിടെയാണ് എന്നും ക്ഷേത്രലിഖിതങ്ങൾ സാക്ഷ്യം വഹിക്കുന്നു .
ഈ ക്ഷേത്രത്തിന്റെ ഐതിഹ്യം ഇപ്രകാരമാണ് . വേദ വ്യാസന്റെ ഉപദേശപ്രകാരം മഹാഭാരത യുദ്ധത്തിൽ തന്റെ സഹോദരങ്ങളായ കൗരവരെയും ഗുരു തുല്യരെയും വധിച്ചതിന്റെ പാപത്തിൽ നിന്ന് മോചനം നേടുവാനായി ശിവ ഭഗവാനെ സന്തോഷിപ്പിക്കാൻ വേണ്ടി പഞ്ച പാണ്ഡവർ ഭഗവാനെ തേടിയുള്ള യാത്ര ആരംഭിച്ചു . എന്നാൽ പാണ്ഡവരുടെ തെറ്റ് ക്ഷമിക്കാൻ തയ്യാറാവാതെ അവരുടെ മുന്നിൽ പ്രത്യക്ഷപെടാതിരിക്കുകയും , ഗുപ്താക്ഷിയിൽ അഭയം പ്രാപിക്കുകയും കാളയുടെ രൂപം സ്വീകരിക്കുകയും ചെയ്തു .
എന്നാൽ പഞ്ചപാണ്ഡവർ ശിവ ഭഗവാനെ കണ്ടെത്തുകയും , അദ്ദേഹത്തിന്റെ കാളയുടെ രൂപത്തിൽ ഉള്ള ശരീരത്തിന്റെ അഞ്ചു ഭാഗങ്ങൾ അഞ്ചു സ്ഥലങ്ങളിലായി കണ്ടെത്തുകയും അവിടെ ക്ഷേത്രങ്ങൾ പണിയുകയും ചെയ്തു . ഇവയാണ് പഞ്ച കേദാർ ക്ഷേത്രങ്ങൾ എന്നറിയപ്പെടുന്നത് .
എല്ലാ സമയങ്ങളിലും പ്രകൃതിസൗന്ദര്യത്താൽ മനോഹരിയായ പ്രദേശം ജീവിതത്തിൽ ഒരിക്കലെങ്കിലും കണ്ടിരിക്കേണ്ട ഒന്നാണ് .
