രോഗങ്ങൾക്കും , അണുബാധകൾക്കും എതിരെ പ്രതിരോധം സൃഷ്ടിക്കാൻ സഹായിക്കുന്ന ധാരാളം പഴങ്ങളും , പച്ചക്കറികളും , ഔഷധസസ്യങ്ങളും നമ്മുക്ക് ചുറ്റും ഉണ്ട് . രോഗപ്രതിരോധ ശേഷി വർദ്ധിപ്പിക്കേണ്ട ഈ അവസരത്തിൽ പ്രകൃതി നമ്മുക്ക് നൽകിയിരിക്കുന്ന ഈ വസ്തുക്കളുടെ ഗുണം ഉപയോഗിക്കാതിരിക്കുന്നത് ഒരുതരത്തിൽ പറഞ്ഞാൽ മണ്ടത്തരം ആയി പോകും .
ഇഞ്ചിയും , ആപ്പിളും , കാരറ്റും ധാരാളം പോഷകഗുണങ്ങൾ നിറഞ്ഞ ഭക്ഷ്യവസ്തുക്കൾ ആണെന്നുള്ളത് ഏവർക്കും അറിയാവുന്ന കാര്യമാണ് . ഇഞ്ചിയിൽ ശരീരത്തിനുണ്ടാകുന്ന വീക്കം തടയാനും , ആന്റി ഓക്സിഡന്റ് ഗുണങ്ങളും അടങ്ങിയിരിക്കുന്നതിനാൽ , ശരീരത്തിന്റെ ആരോഗ്യം സംരക്ഷിക്കാൻ ദിനവും അല്പം ഇഞ്ചി കഴിക്കുന്നത് ഉത്തമമാണ് .
ആപ്പിൾ ആണെങ്കിൽ ധാരാളം നാരുകളും വിറ്റാമിൻ സിയും അടങ്ങിയിരിക്കുന്ന ഒരു പഴവർഗ്ഗമാണ് . ആപ്പിളിൽ ധാരാളം നാരുകൾ അടങ്ങിയിരിക്കുന്നതിനാൽ , ഇത് കഴിക്കുമ്പോൾ വയർ നിറഞ്ഞ പ്രതീതി ഉണ്ടാവുന്നതിനാൽ , അധികമായി ഭക്ഷണം കഴിക്കുന്നത് തടയുകയും , ശരീര ഭാരം കുറക്കാൻ സഹായിക്കുകയും ചെയ്യും .
അന്നജം, നാരുകൾ, ദോഷകരമല്ലാത്ത പഞ്ചസാര എന്നിവ അടങ്ങിയ ഭക്ഷ്യ വസ്തുവാണ് കാരറ്റ് . കൂടാതെ ഇതിൽ കൊഴുപ്പിന്റെ അംശം വളരെയധികം കുറവുമാണ് . കാരറ്റ് വിറ്റാമിൻ എ , വിറ്റാമിൻ ബി , വിറ്റാമിൻ കെ , പൊട്ടാസ്യം എന്നിവ ധാരാളമായി അടങ്ങിയിരിക്കുന്ന ഭക്ഷണ വസ്തു കൂടിയാണ് .
ഇത്രയും ഗുണങ്ങൾ ഉള്ള ഇഞ്ചിയും , ആപ്പിളും , കാരറ്റും ചേർത്ത് ഉണ്ടാക്കുന്ന ജ്യുസ് ശരീരത്തിന്റെ ആരോഗ്യവും രോഗപ്രതിരോധ ശേഷി വർദ്ധിപ്പിക്കുന്നതിലും എത്രത്തോളം ഗുണം ചെയ്യും എന്നുള്ളത് ചിന്തിക്കാൻ കഴിയുന്ന ഒരു വസ്തുതയാണ് .
ഇഞ്ചി – ആപ്പിൾ – കാരറ്റ് ജ്യുസ് തയ്യാറാക്കാൻ വേണ്ടുന്ന സാധനങ്ങൾ
ആപ്പിൾ ചെറുതായി അരിഞ്ഞത് : ഒന്ന്
കാരറ്റ് ചെറുതായി അരിഞ്ഞത് : ഒന്ന്
ഇഞ്ചി തൊലി കളഞ്ഞു ചെറുതായി അരിഞ്ഞത് : ഒന്ന്
പഞ്ചസാര ആവശ്യത്തിന്
ജ്യൂസ് തയ്യാറാക്കേണ്ടുന്ന വിധം
ചേരുവകൾ എല്ലാം ചേർത്ത് നന്നായി ഒരു ജ്യൂസറിൽ ഇട്ട് അടിച്ചെടുക്കുക . അരച്ചെടുത്തു കഴിയുമ്പോൾ കുറുകിയതായി തോന്നുകയാണെങ്കിൽ അല്പം വെള്ളം കൂടി ചേർത്ത് അടിച്ചെടുക്കുക .
രുചികരവും പോഷകസമൃദ്ധവുമായ ഇഞ്ചി – ആപ്പിൾ – കാരറ്റ് ജ്യുസ് തയ്യാർ .
