വായനശാല എന്ന് കേൾക്കുമ്പോൾ നമ്മുടെ മനസ്സിലേക്ക് ഓടി വരുന്ന ഒരു ചിത്രമുണ്ട് . ഇഷ്ടിക കൊണ്ട് കെട്ടിയ ഒരു കെട്ടിടവും , തടി കൊണ്ടുള്ള മേശയും കസേരയും , പുസ്തകങ്ങൾ നിരനിരയായി അടുക്കി വെച്ചിരിക്കുന്ന പൊടി പിടിച്ച ഷെല്ഫുകളും ,നിശബ്ദത പാലിക്കുക എന്നെഴുതി വെച്ചിരിക്കുന്ന ബോർഡും , കണ്ണാടി മൂക്കത്ത് വെച്ചിരിക്കുന്ന കണിശക്കാരനായ ലൈബ്രേറിയൻ എന്നിവയൊക്കെയാണ് ആ ചിത്രത്തിൽ തെളിയാറുള്ളത് . എന്നാൽ ഇതിൽ നിന്നെല്ലാം വിഭിന്നമായി ഒരു ഗ്രന്ഥശാലയെ എത്രത്തോളം മനോഹരവും ആകർഷകവുമാക്കാം എന്ന് ലോകത്തിലെ ചില ഗ്രന്ഥശാലകൾ വിളിച്ചു പറയുന്നു .
1 . ബർമിംഗ്ഹാമിലെ ലൈബ്രറി
2013 ൽ ആരംഭിച്ച ഗ്രന്ഥശാല രൂപകല്പന ചെയ്തിരിക്കുന്നത് ഡച്ച് സ്റ്റുഡിയോ മെക്കാനൂ ആണ് . യൂറോപ്പിലെ ഏറ്റവും വലിയ പബ്ലിക് ലൈബ്രറി ആണ് ബർമിംഗ്ഹാമിലെ ലൈബ്രറി.
2 . ചെക്ക് റിപ്പബ്ലിക്കിന്റെ ദേശീയ ലൈബ്രറി
ഒരിക്കൽ സന്യാസിമാർക്കായിട്ടുള്ള ബോര്ഡിങ് സ്കൂൾ ആയിരുന്നു ഇന്നത്തെ ചെക്ക് റിപ്പബ്ലിക്കിന്റെ ദേശീയ ലൈബ്രറി.1700 മുതലാണ് ഇവിടം ഒരു ലൈബ്രറി ആയി പ്രവർത്തിച്ചു തുടങ്ങിയത് . പഴയകാല രീതിയിലുള്ള മാതൃകയും , മ്യൂറൽ ചിത്രങ്ങളും , ലൈബ്രറിക്ക് ചരിത്രത്തിന്റെ നിറം നൽകുകയും പ്രാഗിന്റെ അഭിമാനം ആകുകയും ചെയ്യുന്നു .
3 . അഡ്മോണ്ട് ആബി ലൈബ്രറി
ബറോക്ക് വാസ്തുവിദ്യ ഉപയോഗിച്ച് 1776 ൽ നിർമ്മിച്ചതാണ് ലോകത്തിലെ ഏറ്റവും വലുതും പുരാതനവുമായ ഓസ്ട്രിയയിൽ ഉള്ള അഡ്മോണ്ട് ആബി ലൈബ്രറി. സ്വർണ്ണവും വെള്ളയും കലർന്ന നിറവും , സൂര്യപ്രകാശം കടക്കുവാനായി നിർമ്മിച്ചിട്ടുള്ള നാല്പത്തിയെട്ട് ജാലകങ്ങളും ഈ ഗ്രന്ഥശാലയെ മനോഹരവും വ്യത്യസ്തവും ആക്കുന്നു .
4 . പബ്ലിക് ലൈബ്രറി സ്റ്റട്ട്ഗാർട്ട്
ജർമനിയിലെ സ്റ്റട്ട്ഗാർട്ടിലുള്ള ഈ ലൈബ്രറി ക്യൂബ് ആകൃതിയിൽ ,നടുഭാഗത്ത് വിശാലമായ ഹാളും ചുറ്റും നിറയെ പുസ്തകങ്ങളുടെ തട്ടുകളുമായി അഞ്ചു നിലകളിൽ നിർമ്മിച്ചിട്ടുള്ള ഒന്നാണ് .പുരാതന പന്തീയോന്റെ രൂപകൽപന അടിസ്ഥാനമാക്കിയാണ് ഇത് നിർമ്മിച്ചിട്ടുള്ളത് .
5 . വെന്നസ്ല ലൈബ്രറി ആൻഡ് കൾച്ചർ ഹൗസ്
ആർക്കിടെക്റ്റുകളായ ഹെലനും ഹാർഡും ചേർന്ന് നോർവേയിൽ നിർമ്മിച്ച ഒന്നാണ് ഈ ലൈബ്രറി . നഗരത്തിൽ ഉള്ള ഒരു ഗ്രന്ഥശാലയെയും കമ്മ്യൂണിറ്റി സെന്ററിനെയും മനോഹരമായി ചേർത്ത് വെച്ചാണ് ഇവർ ഈ മനോഹരമായ ലൈബ്രറി രൂപകല്പന ചെയ്തിരിക്കുന്നത് .
