2020 ഓസ്ട്രിയൻ ലോക ഉച്ചകോടിയുടെ ഭാഗമായി അർനോൾഡ് ഷ്വാർസെനഗറുമായുള്ള വീഡിയോ കോൺഫറൻസ് ചാറ്റിൽ സംവിധായകൻ ജെയിംസ് കാമറൂൺ വരാനിരിക്കുന്ന അവതാർ സിനിമകളെക്കുറിച്ചുള്ള വിശദാംശങ്ങൾ വെളിപ്പെടുത്തുകയുണ്ടായി .
സൂപ്പർഹിറ്റ് ചിത്രമായ ഹോളിവുഡ് ചിത്രത്തിന്റെ രണ്ടും മൂന്നും ഭാഗങ്ങളാണ് വരാനിരിക്കുന്നത് . സംവിധായകൻ ജെയിംസ് കാമറൂൺ , അവതാർ 2 വിന്റെ ചിത്രീകരണം പൂർത്തിയായെന്നും , അവതാർ 3 ന്റെ ചിത്രീകരണം തൊണ്ണൂറ്റി അഞ്ച് ശതമാനം പൂർത്തിയായി എന്നും അറിയിക്കുകയുണ്ടായി .
അവതാർ സിനിമയുടെ വരാൻ ഇരിക്കുന്ന രണ്ടു ഭാഗങ്ങളുടെയും ചിത്രീകരണം ന്യൂസിലാന്റിൽ വെച്ചാണ് നടക്കുന്നത് . മഹാമാരി മൂലം ഉണ്ടായിട്ടുള്ള പ്രശ്നങ്ങൾ ഈ രാജ്യത്ത് തീവ്രമാകുന്നതിന് മുൻപ് തന്നെ ചിത്രീകരണം ആരംഭിച്ചുവെന്നും കാമറൂൺ പറഞ്ഞു . ജൂണിലാണ് സിനിമയുടെ ചിത്രീകരണം ന്യൂസിലാന്റിൽ വെച്ച് ആരംഭിച്ചത് .
എല്ലാവരെയും ബാധിച്ചത് പോലെ തന്നെ കൊറോണ ഞങ്ങളെയും ബാധിച്ചു എന്നും അതിനാൽ തന്നെ സിനിമയുടെ നിർമ്മാണ പ്രവർത്തനങ്ങൾ ഏകദേശം നാലരമാസത്തോളം നീണ്ടു പോയെന്നും അദ്ദേഹം വ്യക്തമാക്കി . അതിനാൽ തന്നെ ചിത്രങ്ങൾ 2022 ൽ മാത്രമേ തീയേറ്ററുകളിൽ എത്തുകയുള്ളൂ . ഇതിനർത്ഥം ഞങ്ങൾക്ക് സിനിമ പൂർത്തീകരിക്കാൻ പിന്നെയും ഒരു വർഷം വേണമെന്നല്ല എന്നും അവതാർ 2 തീയേറ്ററുകളിൽ എത്തുമ്പോൾ തന്നെ അവതാർ 3 ന്റെ പ്രവർത്തനങ്ങൾ ആരംഭിക്കുമെന്നും അദ്ദേഹം കൂട്ടി ചേർത്തു .
ഇപ്പോൾ ഞങ്ങൾ ചിത്രത്തിന്റെ ബാക്കിയുള്ള ഭാഗങ്ങൾ ചിത്രീകരിക്കാൻ ന്യൂസിലാന്റിൽ തന്നെയാണ് ഉള്ളത് എന്നും പത്തു ശതമാനം കൂടി പൂർത്തീകരിക്കാൻ ഉണ്ട് എന്നും അദ്ദേഹം വ്യക്തമാക്കി .ഈ സ്ഥലം ചിത്രീകരണത്തിനായി വർഷങ്ങൾക്ക് മുൻപ് തന്നെ തിരഞ്ഞെടുത്തത് ഭാഗ്യമായി എന്നും അദ്ദേഹം കൂട്ടി ചേർത്തു .
അവതാർ 2 ഇപ്പോൾ 2022 ഡിസംബർ 16 നും, അവതാർ 3 ന് 2024 ഡിസംബർ 20 നും റിലീസ് ചെയ്യും എന്നാണ് റിപ്പോർട്ടുകൾ പറയുന്നത് .
