ആരോഗ്യ സംരക്ഷണം എന്ന് പറയുമ്പോൾ ശാരീരികമായ ആരോഗ്യത്തിനാണ് പൊതുവെ ആളുകൾ മുൻതൂക്കം കൊടുക്കാറുള്ളത്.എന്നാൽ ശാരീരിക ആരോഗ്യം പോലെ അല്ലെങ്കിൽ അതിനേക്കാൾ മേലെ മനുഷ്യർക്ക് വേണ്ട ഒന്നാണ് മാനസികാരോഗ്യം. മനസിന് സുഖമില്ലാതെയായാൽ പിന്നെ ജീവിതത്തിന്റെ മൂല്യവും അർത്ഥവും നമ്മളിൽ നിന്നകലും. ഇത് വിഷാദ രോഗത്തിലേക്കും, ആത്മഹത്യയിലേക്കും വരെ കൊണ്ടെത്തിച്ചേക്കാം. അതുകൊണ്ട് ഈ മേഖലയിൽ പുരോഗമനം വേണ്ടതും, മാനസികാരോഗ്യ സേവനങ്ങൾ കൂടുതൽ ഊർജസ്വലമാക്കേണ്ടതും ഒരു പ്രധാനപ്പെട്ട ആവശ്യം തന്നെയാണ്.
‘എല്ലാവര്ക്കും മാനസികാരോഗ്യം, കൂടുതല് നിക്ഷേപം, കൂടുതല് പ്രാപ്യം ഏവര്ക്കും എവിടെയും’ എന്നതാണ് ഈ വർഷത്തെ മാനസികാരോഗ്യ ദിനത്തിന്റെ വിഷയം. മനസിന് വിഷമതകൾ ഉള്ളവർക്ക് വേണ്ട രീതിയിലുള്ള ചികിത്സകൾ, ജനങ്ങളിൽ കൂടുതൽ അവബോധം വർധിപ്പിക്കൽ തുടങ്ങിയവയാണ് ഈ ദിനത്തിന്റെ പ്രധാന ആശയങ്ങൾ. പലപ്പോഴും മാനസികമായി ബുദ്ധിമുട്ടുകൾ നേരിടുന്ന വ്യക്തികൾ എന്നും സമൂഹത്തിൽ ഒറ്റപ്പെടാറുണ്ട്. രോഗമുള്ള പലരും കൃത്യമായ ചികിത്സ പോലും നേടുന്നില്ലെന്നതാണ് വാസ്തവം. മാനസികാരോഗ്യ വിദഗ്ധരുടെ എണ്ണത്തിലുള്ള കുറവും ഇതിനൊരു കാരണമാണ്.
കൊറോണ കാലത്തേ തുടർന്ന് കുട്ടികൾ മുതൽ മുതിർന്നവർക്ക് വരെ പല അസ്വസ്ഥതകൾ ഉണ്ടായിട്ടുണ്ട്. വിഷാദരോഗവും ഏറ്റവും കൂടുതൽ ഉണ്ടായിട്ടുള്ളത് ഈ കാലഘട്ടത്തിലാണ്. തുറന്ന് സംസാരിക്കാൻ ഒരു കൂട്ടുണ്ടെങ്കിൽ ഒരുപരിധി വരെ ഇത്തരം അസ്വസ്ഥതകളിൽ നിന്ന് വിട്ടുനിൽക്കാൻ സാധിക്കും. എന്നാൽ മനസിന് വല്ലാതെ വിഷമതകൾ അനുഭവിക്കുന്നവർക്ക് കൃത്യമായ ചികിത്സ രീതി ഉറപ്പാക്കണം. പ്രാഥമിക തലത്തിൽ തന്നെ മാനസികാരോഗ്യ സേവനങ്ങൾ ലഭിക്കുക എന്നതാണ് ഇതിനൊരു പോംവഴി. അതുപോലെ മാനസികാരോഗ്യ രംഗത്തെ പഠനങ്ങൾ കൂടുതൽ നടത്തേണ്ടതും ആവശ്യമാണ്. ഒപ്പം പൊതു ജനങ്ങളെ മാനസികാരോഗ്യത്തെ കുറിച്ച് കൂടുതൽ ബോധവാന്മാരാക്കുക.
