ദുബായ്: ഐപിഎല്ലില് ഇന്ന് നടക്കുന്ന ആദ്യ മത്സരത്തില് സണ്റൈസേഴ്സ് ഹൈദരാബാദും രാജസ്ഥാന് റോയല്സും നേര്ക്കുനേര്. പോയിന്റ് പട്ടികയില് ഹൈദരാബാദ് അഞ്ചാം സ്ഥാനത്തും രാജസ്ഥാന് ഏഴാം സ്ഥാനത്തുമായതിനാല് ഇന്നത്തെ മത്സരം രണ്ട് ടീമുകള്ക്കും നിര്ണായകമാണ്. ദുബായിയില് ഇന്ത്യന് സമയം വൈകീട്ട് 3.30നാണ് മത്സരം.
ടൂര്ണമെന്റിന്റെ തുടക്കത്തില് കളിച്ച രണ്ട് മത്സരങ്ങളില് രാജസ്ഥാന് ജയിച്ചിരുന്നു. എന്നാല് പിന്നീട് അങ്ങോട്ട് മൂന്ന് തുടര് തോല്വികളാണ് രാജസ്ഥാനെ കാത്തിരുന്നത്. ആദ്യ രണ്ട് മത്സരങ്ങളില് മികച്ച പ്രകടനം പുറത്തെടുത്ത മലയാളി താരം സഞ്ജു സാംസണ് പിന്നീട് തീര്ത്തും നിറം മങ്ങി. ബാറ്റിംഗ് നിര നിരാശപ്പെടുത്തുന്നതാണ് രാജസ്ഥാന്റെ
പ്രധാന പ്രശ്നം. സ്റ്റീവ് സ്മിത്ത്, ജോസ് ബട്ലര്, സഞ്ജു സാംസണ് എന്നിവര് പുറത്തായാല് ടീം തോല്ക്കുമെന്ന അവസ്ഥയാണുള്ളത്. ക്വാറന്റെയ്ന് പൂര്ത്തിയാക്കി ബെന് സ്റ്റോക്സ് മടങ്ങിയെത്തുന്നത് ടീമിന് ആത്മവിശ്വാസം നല്കും.
ആദ്യ മത്സരങ്ങളില് തോല്വികള് ഏറ്റുവാങ്ങിയെങ്കിലും സണ്റൈസേഴ്സ് ഹൈദരാബാദ് ശക്തമായി തിരിച്ചെത്തിയിരിക്കുകയാണ്. ഓപ്പണിംഗില് ജോണി ബെയര്സ്റ്റോയും ഡേവിഡ് വാര്ണറും ഫോമിലേയ്ക്ക് തിരിച്ചെത്തി. മനീഷ് പാണ്ഡെയും കെയ്ന് വില്യംസണും ഏത് ബൗളിംഗ് നിരയ്ക്കും വെല്ലുവിളി ഉയര്ത്താന് കഴിയുന്നവരാണ്. ഭുവനേശ്വര് കുമാറിന്റെ അഭാവം ഹൈദരാബാദിനെ ഒട്ടും ബാധിച്ചിട്ടില്ല. റാഷിദ് ഖാന് റണ്സ് വിട്ടുകൊടുക്കുന്നതില് പിശുക്ക് കാട്ടി വിക്കറ്റുകള് വീഴ്ത്തുന്നതും ഹൈദരാബാദിന് പ്രതീക്ഷയ്ക്ക് വകനല്കുന്നുണ്ട്.
