എല്ലാ വീട്ടമ്മമാരും നേരിടുന്ന ഒരു സാധാരണ പ്രശ്നമാണ് പാചകം ചെയ്യുമ്പോൾ ഭക്ഷണം കരിയുന്നതും പാത്രത്തിൽ ഒട്ടിപിടിക്കുന്നതും കറുത്ത പാടുകൾ ഉണ്ടാവുന്നതും . വിവിധതരത്തിലുള്ള ശ്രമങ്ങൾക്കൊടുവിലായിരിക്കും പാത്രങ്ങളിൽ നിന്ന് ഇവ നീക്കം ചെയ്യാനും വൃത്തിയാക്കാനും സാധിക്കുക . അതിനാൽ തന്നെ എളുപ്പത്തിൽ പാത്രത്തിൽ പറ്റി പിടിച്ചിരിക്കുന്ന കരിഞ്ഞ ഭക്ഷണങ്ങൾ നീക്കം ചെയ്യാനും വൃത്തിയാക്കാനും സഹായകമാകുന്ന ചില എളുപ്പ വഴികൾ ചുവടെ ചേർക്കുന്നു
ഭക്ഷണം കരിഞ്ഞു ഒട്ടിപ്പിടിച്ച പാത്രത്തിൽ അല്പം വെള്ളം ഒഴിച്ച് ചെറു തീയിൽ ചൂടാക്കുക . ഒട്ടിപിടിച്ചിരിക്കുന്ന ഭക്ഷണപദാർത്ഥങ്ങൾ എളുപ്പം തന്നെ ഇളകി പോരാൻ ഇത് സഹായകമാകും .
പാത്രത്തിൽ കരിഞ്ഞു പറ്റിപ്പിടിച്ചിരിക്കുന്ന ഭക്ഷണപദാർത്ഥങ്ങൾ എളുപ്പത്തിൽ നീക്കം ചെയ്യാൻ സഹായിക്കുന്ന ഒരു വസ്തുവാണ് സവാളയുടെ തൊലി . ഭക്ഷണം കരിഞ്ഞു ഒട്ടിപിടിച്ചിരിക്കുന്ന പാത്രത്തിൽ അല്പം വെള്ളം എടുക്കുക . എന്നിട്ട് ഇതിലേക്ക് കുറച്ചു സവാള തൊലിയിട്ട് അടച്ചു വെച്ച് മുപ്പത് മിനിറ്റ് തിളപ്പിക്കുക . പാത്രം തണുത്തതിന് ശേഷം തേച്ചു കഴുകിയാൽ അഴുക്കു പെട്ടെന്ന് തന്നെ ഇളകി പോരും .
മറ്റൊരു വിദ്യ ബേക്കിംഗ് സോഡ ഇട്ട് കരിഞ്ഞ പാത്രത്തിൽ വെള്ളം തിളപ്പിക്കുക എന്നതാണ് . ഭക്ഷണപദാർത്ഥം കരിഞ്ഞു ഒട്ടിപ്പിടിച്ച പാത്രത്തിൽ ആവശ്യത്തിന് വെള്ളവും ബേക്കിംഗ് സോഡയും ചേർത്ത് ചെറു തീയിൽ തിളപ്പിക്കുക . തണുത്തതിനു ശേഷം കഴുകിയാൽ പാടും കറകളും അപ്പാടെ തന്നെ ഇളകി പോരും .
മറ്റൊന്ന് ഭക്ഷണം കരിഞ്ഞ പാത്രത്തിൽ അല്പം വിനാഗിരി വെള്ളത്തിൽ ചേർത്ത് ഒഴിച്ച് രാത്രി മുഴുവൻ വെച്ചതിന് ശേഷം , പിറ്റേന്ന് കഴുകിയെടുത്താൽ കറകൾ എല്ലാം പോയി പാത്രം നല്ല വൃത്തിയായി കിട്ടും .
