ഷാര്ജ: ഐപിഎല്ലില് അവിശ്വസനീയമായ വിജയക്കുതിപ്പ് തുടര്ന്ന് റോയല് ചലഞ്ചേഴ്സ് ബാംഗ്ലൂര്. കൊല്ക്കത്ത നൈറ്റ് റൈഡേഴ്സിനെ മുട്ടുകുത്തിച്ചതോടെ സീസണിലെ അഞ്ചാം ജയമാണ് ബാംഗ്ലൂര് സ്വന്തമാക്കിയത്. ഇതോടെ 7 കളികളില് 5 ജയവുമായി ബാംഗ്ലൂര് മൂന്നാം സ്ഥാനത്തെത്തി.
നിശ്ചിത 20 ഓവറില് 195 റണ്സ് വിജയലക്ഷ്യവുമായി ഇറങ്ങിയ കൊല്ക്കത്തയ്ക്ക് 9 വിക്കറ്റ് നഷ്ടത്തില് 112 റണ്സ് നേടാനെ സാധിച്ചുള്ളൂ. കൊല്ക്കത്ത ബാറ്റ്സ്മാന്മാരെ അക്ഷരാര്ത്ഥത്തില് ബാംഗ്ലൂര് ബൗളര്മാര് വരിഞ്ഞുമുറുക്കി. മൂന്ന് പേര്ക്ക് മാത്രമാണ് രണ്ടക്കം കടക്കാനായത്. 34 റണ്സെടുത്ത ഓപ്പണര് ശുഭ്മാന് ഗില്ലാണ് കൊല്ക്കത്തയുടെ ടോപ് സ്കോറര്. ആന്ദ്രെ റസലും രാഹുല് ത്രിപാഠിയും 16 റണ്സ് വീതമെടുത്തു. ബാംഗ്ലൂരിന് വേണ്ടി ക്രിസ് മോറിസും വാഷിംഗ്ടണ് സുന്ദറും 2 വിക്കറ്റുകള് വീതം വീഴ്ത്തി. നവ്ദീപ് സൈനി, മൊഹമ്മദ് സിറാജ്, യുസ്വേന്ദ്ര ചഹല്, ഇസ്രു ഉഡാന എന്നിവര് ഓരോ വിക്കറ്റ് വീതവും സ്വന്തമാക്കി.
ടോസ് നേടി ബാറ്റിംഗ് തെരഞ്ഞെടുത്ത കോഹ്ലിയുടെ തീരുമാനം ശരിവെക്കുന്ന തുടക്കമാണ് ഓപ്പണര്മാരായ മലയാളി താരം ദേവ്ദത്ത് പടിക്കലും(32) ആരോണ് ഫിഞ്ചും(47) നല്കിയത്. ഒന്നാം വിക്കറ്റില് ഇരുവരും ചേര്ന്ന് 67 റണ്സ് കുറിച്ചു. മൂന്നാമനായെത്തിയ നായകന് വിരാട് കോഹ്ലി(33*) നിലയുറപ്പിച്ചപ്പോള് എബി ഡിവില്യേഴ്സിന്റെ പ്രകടനമാണ് നിര്ണായകമായത്. 33 പന്തില് 73 റണ്സ് നേടിയ എബിഡി പുറത്താകാതെ നിന്നു. 5 ബൗണ്ടറികളും 6 സിക്സറുകളുമാണ് എബിഡിയുടെ ബാറ്റില് നിന്നും പിറന്നത്. തന്റെ പ്രകടനം തനിക്ക് തന്നെ വിശ്വസിക്കാന് കഴിഞ്ഞില്ലെന്നാണ് ഡിവില്യേഴ്സ് മത്സര ശേഷം പ്രതികരിച്ചത്.
