അപൂർവ്വങ്ങളും ചരിത്രത്തോട് ചേർന്ന് നിൽക്കുന്നവയും , ഐതിഹ്യങ്ങൾ നിറഞ്ഞതുമായ ക്ഷേത്രങ്ങൾ കുടികൊള്ളുന്ന ജില്ലയാണ് കേരളത്തിലെ ആലപ്പുഴ . ഒട്ടധികം പ്രത്യേകതകൾ നിറഞ്ഞ വിശ്വാസങ്ങൾ കാത്ത് സൂക്ഷിക്കുന്നവരാണ് ആലപ്പുഴ ജില്ലക്കാർ . ഇത്തരത്തിൽ ആലപ്പുഴക്കാർ ഏറെ പ്രാധാന്യത്തോട് കൂടി കണ്ടു വരുന്ന വളരെ പുരാതനമായ ഒരു ക്ഷേത്രമാണ് ഏവൂർ കണ്ണമ്പള്ളി ദേവി ക്ഷേത്രം .
ആയിരത്തിലധികം പഴക്കമുള്ള ഈ ക്ഷേത്രത്തിൽ കേരളത്തിന്റെ വിവിധ ജില്ലകളിൽ നിന്നാണ് ഭക്തർ ഇവിടെ എത്തി ചേരുന്നത് . ഭുവനേശ്വരി സങ്കല്പത്തിൽ ഉള്ള പ്രതിഷ്ഠയാണ് ക്ഷേത്രത്തിൽ ഉള്ളതെങ്കിലും , ദേവി രണ്ടു ഭാവത്തിലാണ് കുടികൊള്ളുന്നത് എന്നും സങ്കല്പമുണ്ട് .
ഈ ക്ഷേത്രത്തിന്റെ പ്രത്യേകത ഒരു ശ്രീകോവിലിൽ തന്നെ അഞ്ച് പ്രതിഷ്ഠകൾ ഉണ്ട് എന്നുള്ളതാണ് . ക്ഷേത്രത്തിന്റെ പ്രധാന ശ്രീകോവിലിൽ ഗണപതി , ശാസ്താവ് , വിഷ്ണു , ദുർഗ്ഗ എന്നിവരുടെ പ്രതിഷ്ഠയും , ദുർഗ്ഗ ദേവിയുടെ പിൻവശത്തായി പടിഞ്ഞാറ് തെക്കായി ശിവന്റെയും ദേവിയുടെയും വിഗ്രഹങ്ങളും പ്രതിഷ്ഠിച്ചിരിക്കുന്നു . കൂടാതെ ചുറ്റമ്പലത്തിനുള്ളിൽ തന്നെ ഏറെ പ്രാധാന്യത്തോടെ യക്ഷിയുടെ പ്രതിഷ്ഠയും കുടികൊള്ളുന്നു എന്നുള്ളത് വലിയ ഒരു സവിശേഷത ആണ് .
കേരളത്തിൽ മറ്റൊരു ക്ഷേത്രത്തിലും കാണാൻ സാധിക്കാത്ത വളരെ പ്രത്യേകത നിറഞ്ഞ പ്രതിഷ്ഠയുള്ള ക്ഷേത്രം കൂടിയാണ് ഏവൂർ കണ്ണമ്പള്ളി ക്ഷേത്രം . ഉപദേവതയായ കാക്കാത്തിയമ്മ ഗർഭിണി സങ്കല്പത്തിൽ കുടികൊള്ളുന്നു എന്നുള്ളതാണ് ഈ ക്ഷേത്രത്തിന്റെ പ്രത്യേകത . ഇവിടെ വഴിപാട് നടത്താനായി നാനാ ദിക്കിൽ നിന്നാണ് ആളുകൾ എത്തി ചേരുന്നത് . ക്ഷേത്രത്തിന്റെ അടുത്ത് നിന്ന് ഏകദേശം നൂറടി മാറിയാണ് കാക്കാത്തിയമ്മയുടെ കോവിൽ സ്ഥിതി ചെയ്യുന്നത് . വിളിച്ചാൽ വിളിപ്പുറത്തെന്നുന്ന കാക്കാത്തിയമ്മ എല്ലാ സങ്കടങ്ങളിൽ നിന്നും കാത്തു രക്ഷിക്കും എന്നാണ് വിശ്വാസം .
നാലടി പൊക്കത്തിൽ പ്ലാവിൻ തടിയിലാണ് കാക്കാത്തിയമ്മയുടെ വിഗ്രഹം നിർമ്മിച്ചിരിക്കുന്നത് . തലയിൽ ഉള്ള കൊട്ട ഒരു കയ്യ് കൊണ്ട് താങ്ങി പിടിച്ചു , മറു കയ്യ് അല്പം നീട്ടി കൊണ്ട് ഗർഭിണിയുടെ രൂപത്തിൽ ആണ് കാക്കാത്തിയമ്മയുടെ വിഗ്രഹം പണി കഴിപ്പിച്ചിരിക്കുന്നത് . കാക്കാത്തിയമ്മയുടെ പ്രതിഷ്ഠയെക്കുറിച്ചുള്ള ഐതിഹ്യം ഇപ്രകാരമാണ് .
അനേകം വർഷങ്ങൾക്ക് മുൻപ് ഒരു കാക്കാത്തി ഒരുന്നത കുലജാതനിൽ നിന്ന് ഗർഭം ധരിക്കുകയും , നാണക്കേട് ഭയന്ന് അയാൾ കാക്കാത്തിയമ്മയെ തീ വെച്ച് കൊല്ലുകയും ഇതിനു ദൃക്സാക്ഷിയായ ഒരു അന്തർജ്ജനത്തെ കൂടി കൊല്ലുകയും ചെയ്തു എന്നും , രണ്ടു പേരുടെയും ആത്മാക്കൾ ചേർന്ന് ആ ഭാഗത്ത് അനിഷ്ടങ്ങൾ ഉണ്ടാക്കുകയും , വാഴപ്പള്ളിൽ തറവാട്ടിലെ വല്യച്ചന്മാർ അവരെ ആവാഹിച്ചു ഈ ക്ഷേത്രത്തിൽ ദേവിയുടെ സമീപത്തായി കുടിയിരുത്തി എന്നും വിശ്വാസം .
ഈ ക്ഷേത്രത്തിൽ ഉപദേവതയുടെ കോവിലിൽ കയറി വഴിപാട് നടത്താമെന്നുള്ളതും മറ്റെങ്ങും കാണാൻ സാധിക്കാത്ത പ്രത്യേകതയാണ് . കളമെഴുത്ത് , പാട്ടിൻകൊട്ടു , കാപ്പൊലിച്ചു താലപ്പൊലി , ഗുരുതി എന്നിവയാണ് ഇവിടത്തെ പ്രധാന വഴിപാടുകൾ .
Comments