ഇന്ന് നാം ജീവിക്കുന്ന ലോകം വളരെ വേഗത്തിൽ സഞ്ചരിക്കുന്ന ഒന്നാണ് . ഒരു വിവരം അല്ലെങ്കിൽ ഒരു വിശേഷം അതുമല്ലെങ്കിൽ പുതിയ ഒരു അറിവ് മറ്റൊരാളുമായി പങ്കു വെക്കുക എന്നത് വിരൽത്തുമ്പിൽ വിളയാടുന്ന കാലമാണ് . ഒരു നിമിഷം പോലും എടുക്കാതെ മറുവശത്തിരിക്കുന്ന ആളെ തേടി സന്ദേശം എത്തുന്നു എന്നുള്ളത് ഇന്ന് വളരെ സാധാരണമായ കാര്യമാണ് . നാളെ ഒരുപക്ഷെ സാങ്കേതിക വിദ്യ നമ്മളെ കൊണ്ടെത്തിക്കുന്നത് മറ്റൊരു ലോകത്തായിരിക്കും .
ഇത്രയൊക്കെ ആണെങ്കിലും ഇന്നും പ്രിയപ്പെട്ടവർക്ക് എഴുത്തും ആശംസകളും പഴയ രീതിയിൽ തപാൽ മുഖേന അയക്കുന്നവരുണ്ട് . ഈ രീതി നമ്മുക്ക് സമ്മാനിക്കുന്ന ഒരു ഗൃഹാതുരത്വം ഉണ്ട് . അതൊരിക്കലും വാക്കാൽ പറഞ്ഞറിയിക്കാൻ സാധിക്കാത്ത ഒരു വികാരമാണ് . അതുപോലെ തന്നെയാണ് ചില പോസ്റ്റ് ഓഫീസുകളും . ഒട്ടേറെ വ്യത്യസ്തതകളും വിചിത്രവുമായ രീതിയിൽ പ്രവർത്തിക്കുകയും നിലനിൽക്കുകയും ചെയ്യുന്ന ലോകത്തിലെ ചില പോസ്റ്റ് ഓഫീസുകൾ ഇവയൊക്കെയാണ്
ഹിക്കിം പോസ്റ്റ് ഓഫീസ്
4,400 മീറ്റർ (14,400 അടി) ഉയരത്തിൽ സ്ഥിതിചെയ്യുന്ന ലോകത്തിലെ ഏറ്റവും ഉയർന്ന പോസ്റ്റോഫീസാണ് ആണ് ഹിമാചൽ പ്രദേശിലെ ഹിക്കിമിൽ ഉള്ളത് . ഈ ഒറ്റപ്പെട്ട പ്രദേശത്ത് സ്ഥിതി ചെയ്യുന്ന ഗ്രാമങ്ങളെ ലോകത്തിന്റെ വിവിധ ഭാഗങ്ങളുമായി ഈ പോസ്റ്റ് ഓഫീസ് ബന്ധിപ്പിക്കുന്നു .കത്തുകൾ അയക്കാനും , സ്വീകരിക്കാനുമാണ് ഈ പോസ്റ്റ് ഓഫീസ് കൂടുതൽ ആളുകൾ ഉപയോഗിക്കുന്നത് . കൂടാതെ ഇവിടത്തെ ഗ്രാമവാസികൾ തങ്ങളുടെ സമ്പാദ്യം നിക്ഷേപിക്കുവാനും ഈ പോസ്റ്റ് ഓഫീസ് തിരഞ്ഞെടുക്കുന്നു . സഞ്ചാരികൾ ഈ പോസ്റ്റ് ഓഫീസ് തേടി പിടിച്ചെത്തി , ലോകത്തിലെ ഏറ്റവും ഉയർന്ന പോസ്റ്റ് ഓഫീസിൽ നിന്ന് തങ്ങളുടെ പ്രിയപ്പെട്ടവർക്ക് ആശംസകൾ അയക്കുക എന്നതും ഒരു പതിവാണ് . വർഷത്തിൽ ആറ് മാസം മാത്രം പ്രവർത്തിക്കുന്ന ഈ പോസ്റ്റ് ഓഫീസിന് ഇന്റർനെറ്റ് ഒക്കെ വെറും സ്വപ്നം മാത്രമാണ് .
ദക്ഷിൺ ഗംഗോത്രി പോസ്റ്റ് ഓഫീസ്
ഭാരതത്തിന് വെളിയിൽ സ്ഥിതി ചെയ്യുന്ന ഇന്ത്യൻ പോസ്റ്റ് ഓഫീസ് ആണ് അന്റാർട്ടിക്കയിലെ ദക്ഷിണ ഗംഗോത്രിയിൽ സ്ഥിതി ചെയ്യുന്ന പോസ്റ്റ് ഓഫീസ് . 1984 ഫെബ്രുവരി 24 നാണ് ഈ പോസ്റ്റ് ഓഫീസ് പ്രവർത്തനമാരംഭിച്ചത് .അന്റാർട്ടിക്കയിലേക്കുള്ള മൂന്നാമത്തെ ഇന്ത്യൻ പര്യവേഷണ വേളയിലാണ് ഇത് സ്ഥാപിതമായത്.
ഈഫൽ ടവറിൽ സ്ഥിതി ചെയ്യുന്ന പോസ്റ്റ് ഓഫീസ്
ഒരിക്കൽ ലോകത്തിലെ ഏഴു മഹാത്ഭുതങ്ങളുടെ ഭാഗമായിരുന്നു ഒരിക്കൽ ഈഫൽ ടവർ . പാരീസ് സന്ദർശിക്കുന്നവർ തീർച്ചയായും സന്ദർശിക്കുന്ന ഒന്നാണ് ഈ ടവർ . പാരീസിന്റെ അഭിമാനമായ ഈഫൽ ടവറിൽ സ്ഥിതി ചെയ്യുന്ന പോസ്റ്റ് ഓഫീസ് സഞ്ചാരികൾക്ക് ഏറ്റവും പ്രിയങ്കരമാണ് . കാരണമെന്താണ് എന്ന് വെച്ചാൽ തങ്ങൾ ഈഫൽ ടവർ സന്ദർശിച്ചു എന്ന് പ്രിയപെട്ടവരെ അറിയിക്കാൻ വിനോദ സഞ്ചാരികൾ ഇവിടെ വന്ന് കത്തുകൾ പോസ്റ്റ് ചെയ്യുന്നത് പതിവുള്ള കാര്യമാണ് .
കടലിനടിയിൽ സ്ഥിതി ചെയ്യുന്ന പോസ്റ്റ് ഓഫീസ്
കടലിനടിയിൽ പോസ്റ്റ് ഓഫീസോ ? കേൾക്കുമ്പോൾ തന്നെ അത്ഭുതം തോന്നുന്ന ഒന്നാണിത് . എന്നാൽ ഇങ്ങിനെ ഒരു പോസ്റ്റ് ഓഫീസ് ഉണ്ട് എന്നുള്ളത് വാസ്തവം തന്നെയാണ് . ഹവായ് ദ്വീപിലെ റിപ്പബ്ലിക്ക് ഓഫ് വന്യാടുവിലാണ് ഈ പോസ്റ്റ് ഓഫീസ് സ്ഥിതി ചെയ്യുന്നത് .കടലിൽ ഒൻപതടി താഴെ സ്ഥിതി ചെയ്യുന്ന പോസ്റ്റ് ഓഫീസിലെ ജോലിക്കാരൻ ഒരു സ്കൂബ ഡൈവർ ആണെന്നുള്ളതും അത്ഭുതാവഹമായ കാര്യമാണ് .
