വാഷിംഗ്ടണ്‍: ചൈനയ്‌ക്കെതിരെ ആഞ്ഞടിച്ച് മൈക്ക് പോംപിയോ വീണ്ടും രംഗത്തെത്തി. അമേരിക്കന്‍ തെരഞ്ഞെടുപ്പില്‍ സ്വാധീനം ചെലുത്താന്‍ ചൈന ശ്രമിക്കുന്നുവെന്ന വാര്‍ത്തയ്‌ക്ക് പിന്നാലെയാണ് സ്‌റ്റേറ്റ് സെക്രട്ടറിയുടെ രൂക്ഷ വിമര്‍ശനം. എല്ലാവര്‍ക്കുമേലും നടന്നുകയറാന്‍ ചൈനീസ് കമ്യൂണിസ്റ്റ് പാര്‍ട്ടിയ്‌ക്ക് അവസരം ഒരുക്കികൊടുത്തതില്‍ അമേരിക്കന്‍ നേതാക്കള്‍ ഖേദിക്കണമെന്ന് മൈക്ക് പോംപിയോ പറഞ്ഞു.
ചൈന വ്യാപാരരംഗത്തുമാത്രമല്ല കയറിക്കൂടിയത്. കണ്‍ഫ്യൂഷ്യസ് ആശയഗതിക്കനുസരിച്ച് വിദ്യാഭ്യാസ മേഖലയിലൂടെ നമ്മുടെ കുട്ടികളുടെ മനസ്സിനെ സ്വാധീനിച്ചിരിക്കുന്നു. അവരുടെ പല പ്രചാരണങ്ങളും കുട്ടികളുടെ ചിന്തകളെപ്പോലും അപകടത്തിലാക്കുകയാണ്. വിദ്യാഭ്യാസ പദ്ധതികളുടെ പേരില്‍പോലും ഇനി ഒരു തരത്തിലുള്ള സൗകര്യങ്ങളോ സാമ്പത്തിക സഹകരണമോ സിസിപിയുമായി നടത്തുന്നത് ദീര്‍ഘകാലത്തേക്ക് ദോഷകരമാണ്. നയങ്ങളെല്ലാം പുന:പ്പരിശോധിക്കണം. കാരണം നമ്മുടെ ജനാധിപത്യ നയത്തെ നിയന്ത്രിക്കാന്‍ ഒരു സൈനിക ഏകാധിപത്യരാജ്യമാണ് ശ്രമിക്കുന്നതെന്ന് മുന്നറിയിപ്പും പോംപിയോ നല്‍കി.
‘ചൈനയുടെ ഭീഷണി എന്നത് തികച്ചും യാഥാര്‍ത്ഥ്യമാണ്. കഴിഞ്ഞ 40 വര്‍ഷം കൊണ്ടാണ് ചൈന ഈ നിലയിലേക്ക് വളര്‍ന്നത്. എന്നാലത് ഒരു രാഷ്‌ട്രീയ വളര്‍ച്ചയല്ല. വളരെ ആസൂത്രിതമായി അവര്‍ ദൂരെനിന്ന് റിമോട്ട് കണ്‍ട്രോളുപയോഗിച്ച് നമ്മളെ നിയന്ത്രിക്കുകയായിരുന്നു. റിപ്പബ്ലിക്കന്‍ പ്രസിഡന്റുമാരേയും, റിപ്പബ്ലിക്കന്‍ കോണ്‍ഗ്രസ്സുകളേയും ഡെമോക്രാറ്റുകളേയും അവര്‍ സ്വാധീനിച്ചിരുന്നു. നമ്മള്‍ മുട്ടുമടക്കികൊടുത്തു എന്നത് ആദ്യം സമ്മതിക്കണം. അവര്‍ നമുക്ക് മുകളിലൂടെ കടന്നുകയറാന്‍ നാം തന്നെ അവസരം നല്‍കി. ഏതായാലും പ്രസിഡന്റ് ട്രംപ് ഈ കപ്പല്‍ നേരായ ദിശയില്‍ കൊണ്ടുപോവുകയാണ്. അമേരിക്കയുടെ തൊഴില്‍ ലഭ്യത സംരക്ഷിക്കാനും വര്‍ദ്ധിപ്പിക്കാനും ഈ നയം ആവശ്യമാണ്’ പോംപിയോ വ്യക്തമാക്കി.
