ഭഗവാന്റെ വിശ്വരൂപ ദർശന മഹോത്സവം കൊണ്ടാടുന്ന പ്രസിദ്ധമായ ക്ഷേത്രമാണ് മധ്യ തിരുവിതാംകൂറിലെ ശ്രീപുരുഷമംഗലം ശ്രീകൃഷ്ണ ക്ഷേത്രം. അത്ഭുതങ്ങൾ നിറഞ്ഞ ഈ ശ്രീകൃഷ്ണ ക്ഷേത്രത്തിലെ ഏറ്റവും വലിയ പ്രത്യേകത ക്ഷേത്രക്കുളത്തിൽ പടിഞ്ഞാറേ ഭാഗത്തായി പ്രത്യക്ഷപ്പെടുന്ന സ്വർണ വർണ്ണമുള്ള ആമയാണ്. 2016 സെപ്തംബർ നാലിനാണ് ഈ ആമയെ ക്ഷേത്ര കുളത്തിൽ ആദ്യമായി കാണുന്നത്. ക്ഷേത്ര ദർശനത്തിനു വരുന്ന ഭക്തജനങ്ങൾ ആമയെ കാണുവാൻ വരുമ്പോൾ ഈ ആമ വെള്ളത്തിന് മുകളിലെത്തി ഭക്തർക്ക് ദർശനം നൽകുന്നു. ഭഗവാന്റെ കൂർമ്മാവതാരാമായാണ് ഈ സ്വർണ നിറത്തിലുള്ള ആമയെ സങ്കല്പിച്ചിരിക്കുന്നത്.
ഭക്തരെ സംബന്ധിച്ചിടത്തോളം ക്ഷേത്രത്തിലെ ഏറ്റവും വലിയ അത്ഭുതം ക്ഷേത്രക്കുളത്തിൽ പ്രത്യക്ഷപ്പെടുന്ന ഈ ആമ തന്നെയാണ്. ക്ഷേത്രോല്പത്തിക്ക് കാരണഭൂതനായ മഹാദിവ്യയോഗിയാണ് കൂര്മ്മത്തിന്റെ രൂപത്തില് ക്ഷേത്രകുളത്തില് കാണപ്പെടുന്നതെന്നും വിശ്വാസം ഉണ്ട്. ധനാഭിവൃദ്ധിക്കും, ഐശ്വര്യത്തിനുമായി ആദികൂര്മ്മ പൂജ ഇവിടെ ചെയ്തുവരുന്നു. വർഷത്തിൽ പതിനെട്ട് ദിവസങ്ങളിൽ മാത്രമാണ് ഇവിടെ ഭഗവാൻ വിശ്വരൂപത്തിൽ ദർശനം നൽകുന്നത്. കുരുക്ഷേത്ര യുദ്ധം നടന്നത് പതിനെട്ട് ദിവസങ്ങളിലായതിനാൽ കുരുക്ഷേത്രയുദ്ധത്തിൽ നടന്ന ഓരോ സംഭവങ്ങളെയും ആസ്പദമാക്കിയാണ് ഈ പതിനെട്ട് ദിവസങ്ങളിൽ ക്ഷേത്രത്തിൽ ചടങ്ങുകൾ നടത്തുന്നത്.
ദദ്ദ്യാനമാണ് ക്ഷേത്രത്തിലെ പ്രധാന വഴിപാട്. കുരുക്ഷേത്ര യുദ്ധത്തിന് മുൻപ് ശ്രീകൃഷ്ണനും പാണ്ഡവരും ദദ്ദ്യാനം കഴിച്ചിരുന്നു എന്നാണ് സങ്കല്പം. ഏതു രോഗം അലട്ടുന്നവർക്കും ഭഗവാന്റെ ഈ നിവേദ്യം കഴിച്ചാൽ രോഗശമനമുണ്ടാകുമെന്നാണ് വിശ്വാസം. വിശ്വരൂപ ദര്ശനമുള്ള പതിനെട്ട് ദിവസങ്ങളിൽ മാത്രമാണ് ഈ വഴിപാടുള്ളത്. മാത്രവുമല്ല ഈ പതിനെട്ട് ദിവസങ്ങളിൽ ക്ഷേത്ര ദർശനം നടത്തിയാൽ ജീവിതത്തിലെ ഏതു ബുദ്ധിമുട്ടുകളും വഴിമാറി കിട്ടുമെന്നും ഭക്തർ വിശ്വസിക്കുന്നു.
Comments