കഴുത്തിലെ ചുളിവുകൾ ഇല്ലാതാക്കാൻ ചില എളുപ്പവഴികൾ

പ്രായമാകുന്തോറും ചർമ്മത്തിലുണ്ടാകുന്ന മാറ്റങ്ങളിൽ പ്രധാനമാണ് കഴുത്തിലെ ചുളിവുകളും. കഴുത്തിന് ചുറ്റും കറുത്ത നിറത്തിൽ, വൃത്താകൃതിയിൽ കാണുന്ന ചുളിവുകൾക്കുള്ള ചില പ്രതിവിധികൾ നോക്കാം.

പാലിൽ ചെറുനാരങ്ങ പിഴിഞ്ഞ് ചേർത്തതിന് ശേഷം കഴുത്തിന് ചുറ്റും പുരട്ടുക. ഉണങ്ങിയതിന് ശേഷം വെള്ളം ഉപയോഗിച്ച് കഴുകി കളയുക.

തക്കാളി പേസ്റ്റ്, മിൽക്ക് ക്രീം എന്നിവയിൽ ഏതെങ്കിലും ഒന്ന് കടലമാവുമായി ചേർത്ത് കഴുത്തിന് ചുറ്റും പതിവായി പുരട്ടുന്നതും നല്ലതാണ്. പതിവായി ഈ മിശ്രിതം പുരട്ടുന്നതിലൂടെ കഴുത്തിന് ചുറ്റുമുള്ള മാറ്റം നിങ്ങൾക്ക് സ്വയം മനസ്സിലാക്കാവുന്നതാണ്.

ചർമ്മ സംരക്ഷണത്തിന് ഏറ്റവും മികച്ച ഒന്നാണ് വൈറ്റമിൻ ഇ. വൈറ്റമിൻ ഇ ഓയിൽ കഴുത്തിന് ചുറ്റും പുരട്ടിയതിന് ശേഷം മസ്സാജ് ചെയ്യുന്നത് നല്ലതാണ്. വൈറ്റമിൻ ഇ യുടെ നല്ലൊരു ഉറവിടം ആണ് ബദാം ഓയിൽ. കറ്റാർ വാഴയുടെ ജെൽ ഉപയോഗിക്കുന്നതും നല്ലതാണ്. ഇവ ഉപയോഗിച്ച് കഴുത്തിന് ചുറ്റും മസ്സാജ് ചെയ്യുന്നതിലൂടെ ചർമ്മം കൂടുതൽ മിനുസമുള്ളതും മനോഹരമായതും ആകുന്നു.

ചർമ്മ സംരക്ഷണത്തിൽ എടുത്ത് പറയേണ്ട മറ്റൊന്നാണ് മുട്ടയുടെ വെള്ള ഭാഗം. മുട്ടയുടെ വെള്ള ഭാഗത്തിലേക്ക് ഒരു സ്പൂൺ ഗ്ലിസറിൻ അല്ലെങ്കിൽ തേൻ ചേർത്തതിന് ശേഷം കഴുത്തിൽ 30 മിനിറ്റ് നേരം പുരട്ടി വെക്കുക. ശേഷം കഴുകുക.

മുട്ടയുടെ വെള്ളയുമായി ഓട്ട്‌സ് ചേർത്തും ചർമ്മ സംരക്ഷണത്തിനുള്ള മിശ്രിതം തയ്യാറാക്കാവുന്നതാണ്. ആദ്യം ഓട്ട്‌സ് വേവിക്കുക. ഇത് തണുത്തതിന് ശേഷം മുട്ടയുടെ വെള്ള, ഒരു നാരങ്ങയുടെ നീര് എന്നിവ ചേർക്കുക. ഈ മിശ്രിതം 15 മിനിറ്റ് നേരം കഴുത്തിൽ പുരട്ടുക. ശേഷം തണുത്ത വെള്ളം ഉപയോഗിച്ച് കഴുകി കളയുക.

പപ്പായ പൾപ്പ്, ഉടച്ചെടുത്ത വാഴപ്പഴം എന്നിവയിൽ ഏതെങ്കിലും മുട്ടയുടെ വെള്ളയോടൊപ്പം ചേർത്ത് കഴുത്തിൽ പുരട്ടുന്നതും നല്ലതാണ്.