കൊറോണയിൽ നിന്നും രോഗമുക്തി നേടിയെങ്കിലും ലക്ഷണങ്ങൾ തുടർന്നേക്കാമെന്ന് പഠനം. ബ്രിട്ടണിലെ ഓക്സ്ഫർഡ് സർവ്വകലാശാലയാണ് ഇത് സംബന്ധിച്ച പഠനം നടത്തിയത്. രോഗമുക്തി നേടിയെങ്കിലും മാസങ്ങളോളം ചിലരിൽ വൈറസ് ബാധയുടെ ലക്ഷണങ്ങൾ കാണിച്ചുവെന്നാണ് പഠനത്തിൽ വ്യക്തമാക്കുന്നത്. കൊറോണ വൈറസിന്റെ ദീർഘകാല പ്രത്യാഘാതത്തെ കുറിച്ചാണ് പഠനം നടത്തിയത്.
കൊറോണ മുക്തി നേടിയിട്ടും മൂന്ന് മാസത്തോളം രോഗത്തിന്റെ ലക്ഷണങ്ങളായ ശ്വാസതടസം, ക്ഷീണം, ഉത്കണ്ഠ എന്നിവ രോഗമുക്തർക്ക് അനുഭവപ്പെട്ടു. കൂടാതെ ചിലരിൽ ഒന്നിലധികം അവയവങ്ങൾക്ക് തകരാറും നീരും കണ്ടെത്തിയെന്നും പഠനത്തിൽ പറയുന്നു.
ലോകത്തിലെ വിവിധ ഭാഗങ്ങളിൽ നിന്നുള്ള ഗവേഷകർ കൊറോണ വൈറസിനെ കുറിച്ചുള്ള പഠനങ്ങൾ നടത്തി കൊണ്ടിരിക്കുകയാണ്. കൊറോണ എന്ന മഹാമാരിക്കെതിരെയുള്ള വാക്സിൻ കണ്ടെത്താൻ ഇത്തരത്തിലുള്ള പഠനങ്ങൾ പ്രയോജന പ്രദമാകുമെന്നാണ് ഗവേഷകരുടെ വിലയിരുത്തൽ.
