ഒന്റാറിയോ: ഇന്ത്യന് സ്ക്വാഷിന് അഭിമാന നിമിഷം സമ്മാനിച്ച് അനഹത് സിങ് ലോക ജൂനിയര് സ്ക്വാഷ് ചാമ്പ്യന്ഷിപ്പിന്റെ ഫൈനലില് കടന്നു. 2005-ല് ജോഷ്ന ചിനപ്പയ്ക്ക് ശേഷം ഈ നേട്ടം കൈവരിക്കുന്ന ആദ്യ ഇന്ത്യന് താരമെന്ന ചരിത്രമാണ് ഡല്ഹി സ്വദേശിനിയായ 17-കാരി സ്വന്തം പേരില് കുറിച്ചത്. ഇനി ഒരു ജയം മാത്രം നേടിയാല് ലോക ജൂനിയര് സ്ക്വാഷ് കിരീടം ഉയര്ത്തുന്ന ആദ്യ ഇന്ത്യന് താരമെന്ന അപൂര്വ നേട്ടവും അനഹത്തിനെ കാത്തിരിക്കുന്നു.
ഒന്റാറിയോയില് നടന്ന സെമിഫൈനലില് ഈജിപ്തിന്റെ മൂന്നും നാലും സീഡായ ബാര്ബ് സമേഹിനെ 11-3, 8-11, 11-4, 11-6 എന്ന സ്കോറിനാണ് ടൂര്ണമെന്റിലെ ഒന്നാം സീഡായ അനഹത് തോല്പ്പിച്ചത്. ആദ്യ ഗെയിം അനായാസം സ്വന്തമാക്കിയ അനഹത് രണ്ടാം ഗെയിം നഷ്ടപ്പെടുത്തിയെങ്കിലും തുടര്ന്ന് മികച്ച തിരിച്ചുവരവാണ് നടത്തിയത്. ആക്രമണവും പ്രതിരോധവും ഒരുപോലെ മികവുറ്റതാക്കി മത്സരം നാല് ഗെയിമില് അവസാനിപ്പിക്കുകയായിരുന്നു.
ലോക റാങ്കിങ്ങില് നിലവില് 20-ാം സ്ഥാനത്തുള്ള അനഹത് കഴിഞ്ഞ വര്ഷം സെമിഫൈനലില് പുറത്തായതിന്റെ നിരാശ ഇത്തവണ മറികടന്നിരിക്കുകയാണ്. നാല് തവണ ലോക ജൂനിയര് ചാമ്പ്യന്ഷിപ്പില് കളിച്ചിട്ടും ഫൈനലിലെത്താന് കഴിഞ്ഞിരുന്നില്ല. ഇത്തവണ ആ കടമ്പ കടന്നതിന്റെ സന്തോഷവും താരം പങ്കുവെച്ചു.
‘ബ്രിട്ടീഷ് ജൂനിയര് ഓപ്പണില് ബാര്ബിനെതിരെ നേരത്തെ കളിച്ച അനുഭവം ഉണ്ടായിരുന്നു. അതുകൊണ്ട് തന്നെ കടുത്ത മത്സരം പ്രതീക്ഷിച്ചിരുന്നു. ഇന്നലെ മികച്ച പ്രകടനം പുറത്തെടുക്കാന് കഴിഞ്ഞിരുന്നില്ല. അതിനാല് ഇന്ന് എന്റെ ഏറ്റവും മികച്ച കളി പുറത്തെടുക്കണമെന്നുറപ്പിച്ചാണ് കോര്ട്ടിലിറങ്ങിയത്. ഫൈനലിലെത്തിയത് മാതാപിതാക്കള്ക്കും പരിശീലകര്ക്കും വലിയ സന്തോഷമാണ്. പക്ഷേ എന്റെ ലക്ഷ്യം ഇതുവരെ പൂര്ത്തിയായിട്ടില്ല,’ അനഹത് മത്സരശേഷം പറഞ്ഞു.
ഞായറാഴ്ച നടക്കുന്ന ഫൈനലില് രണ്ടാം സീഡായ ഈജിപ്തിന്റെ റുകയ്യ സലേമിനെയാണ് അനഹത് നേരിടുക. ഇന്ത്യയുടെ സ്ക്വാഷ് ചരിത്രത്തില് പുതിയ അധ്യായം കുറിക്കാന് ഇനി ഒരു വിജയം മാത്രം അകലെയാണ് യുവതാരം.
