ഒരു സിനിമ എത്രത്തോളം വിജയം കാണുന്നുവോ അത്രത്തോളം പ്രിയപ്പെട്ടതാകുന്നു അതിലെ ഓരോ കഥാപാത്രങ്ങളും. എന്നാല് സിനിമയിലെ പ്രധാന കഥാപാത്രങ്ങളാണ് കൂടുതല് ശ്രദ്ധിക്കപ്പെടാറുളളത്. ഭരത് ചന്ദ്രന് ഐപിഎസ്, ആടു തോമ, മംഗലശ്ശേരി നീലകണ്ഠന്, ആനക്കാട്ടില് ചാക്കോച്ചി എന്നിങ്ങനെയുള്ള നായക കഥാപാത്രങ്ങള് പ്രേക്ഷക മനസ്സില് ഇന്നും മായാതെ നില നില്ക്കുന്നു. എന്നാല് സിനിമയില് ഒന്നോ രണ്ടോ സീനുകളില് മാത്രം വന്നു കൊണ്ട് സൂപ്പര് ഡയലോഗുകളിലൂടെ പ്രേക്ഷക മനസ്സില് സ്ഥാനം പിടിച്ച ചില കഥാപാത്രങ്ങളുണ്ട്. ആ സിനിമയുടെ മുഴുവന് വിജയവും സ്വന്തമാക്കിയവര്.
ഗഫൂര് കാ ദോസ്ത്… എന്ന ഒരു ഒറ്റ ഡയലോഗ് മതി സത്യന് അന്തിക്കാടിന്റെ നാടോടിക്കാറ്റ് എന്ന സിനിമ ഓര്ത്തിരിക്കാന്. മാമുക്കോയ ചെയ്ത ഗഫൂര് എന്ന കഥാപാത്രം ഇന്നും മലയാളി മനസ്സുകളില് മായാതെ കിടക്കുന്നു. ഒന്നോ രണ്ടോ സീനുകളില് മാത്രം പ്രത്യക്ഷപ്പെട്ട് ഗഫൂര് നാടോടിക്കാറ്റ് എന്ന സിനിമയിലെ താരമായി മാറി.
വെള്ളാനകളുടെ നാട് എന്ന ചിത്രത്തിലെ നമ്മുടെ താമരശ്ശേരി ചുരം.. എന്ന ആ ഡയലോഗ് മാത്രം മതി സുലൈമാന് എന്ന കഥാപാത്രത്തെ എന്നും ഓര്ത്തിരിക്കാന്. നര്മ്മ രംഗങ്ങളിലൂടെ സിനിമകളില് തിളങ്ങി നിന്ന കുതിരവട്ടം പപ്പുവാണ് ഈ മോഹന്ലാല് ചിത്രത്തില് സുലൈമാനായി എത്തിയത്. വളരെ കുറച്ച് രംഗങ്ങള് മാത്രമേ ഉള്ളൂ എങ്കിലും ചിത്രത്തില് ഏല്ലാവരും ഓര്ക്കുന്ന ഒരു രംഗമാണ് ഇത്.
കമല് സംവിധാനം ചെയ്ത ചിത്രമായിരുന്നു ഉള്ളടക്കം. മാനസിക ആരോഗ്യ കേന്ദ്രത്തിലെ ഒരു ഡോക്ടറുടെ കഥാപാത്രമായിരുന്നു ചിത്രത്തില് മോഹന്ലാലിന്റേത്. ഈ ഡോക്ടറുടെ അടുത്തേക്ക് താന് ഒരു കുതിരയെ വിഴുങ്ങി എന്നു പറഞ്ഞു വരുന്ന ജഗതിയുടെ കഥാപാത്രം ആരും മറക്കാനിടയില്ല. ഒരുപാട് സിനിമകളില് തമാശ കഥാപാത്രങ്ങളിലൂടെ ജഗതി ശ്രീകുമാര് എന്ന അതുല്യ നടന് നമുക്ക് മുന്നില് എത്തിയിട്ടുണ്ടെങ്കിലും, ഈ ചിത്രത്തിലെ കഥാപാത്രത്തെ എന്നും ഓര്ത്തിരിക്കും.
സത്യന് അന്തിക്കാട് സംവിധാനം ചെയ്ത മോഹന്ലാല് ചിത്രമാണ് സന്മനസ്സുള്ളവര്ക്ക് സമാധാനം. മോഹന്ലാലിനെ വീട്ടില് നിന്നും ഒഴിപ്പിക്കാനായി ബോംബെയില് നിന്നെത്തിയ ദാമോദര്ജിയെ പെട്ടെന്നൊന്നും ആരും മറക്കാന് ഇടയില്ല. വളരെ ഗൗരവമുള്ള കഥാപാത്രമായി പ്രത്യക്ഷപ്പെട്ട് നര്മ്മം നിറഞ്ഞ രീതിയില് ആ കഥാപാത്രത്തെ അവതരിപ്പിച്ചത് തിലകനായിരുന്നു.
ഈ കഥാപാത്രങ്ങളെല്ലാം തന്നെ സിനിമയിലെ ചില സീനുകളില് മാത്രമാണ് വന്നു പോയത്. എന്നാല് ഈ സിനിമകളുടെ പേര് കേള്ക്കുമ്പോള് ആദ്യം നമ്മുടെ മനസ്സിലേക്ക് ഓടി വരുന്നതും ഈ കഥാപാത്രങ്ങള് തന്ന ആയിരിക്കും.
Comments