പാരീസ്: ചാമ്പ്യന്സ് ലീഗിലെ ഗ്രൂപ്പ് പോരാട്ടത്തില് സ്വന്തം മൈതാനത്ത് പി.എസ്.ജിയ്ക്ക് തോല്വി. ഗ്രൂപ്പ് എച്ചിലെ മത്സരത്തില് മാഞ്ചസ്റ്റര് യുണൈറ്റഡാണ് ഒന്നിനെതിരെ രണ്ടുഗോളുകള്ക്ക് പി.എസ്.ജിയെ തോല്പ്പിച്ചത്. കളിയുടെ ആദ്യ പകുതിയിലാണ് യുണൈറ്റഡിന്റെ ഗോള്വീണത്. 23-ാം മിനിറ്റിലെ പെനാല്റ്റി ബ്രൂണോ ഫെര്ണാണ്ടസാണ് വലയിലെത്തിച്ചത്. ഇതിനിടെ രണ്ടാം പകുതിയില് ചെമ്പട ഒരു പിഴവ് വരുത്തിയത് പി.എസ്.ജിയ്ക്ക് ഗുണമായി. 55-ാം മിനിറ്റില് ആന്റണി മാര്ഷ്യല്സിന്റെ സെല്ഫ് ഗോള് പി.എസ്.ജിയ്ക്ക് സമനില നേടിക്കൊടുത്തു.
കളിയുടെ അവസാന നിമിഷമാണ് നിര്ണ്ണായക ഗോളിലൂടെ റാഷ്ഫോഡ് ഇംഗ്ലീഷ് ക്ലബ്ബിനായി വിജയഗോള് നേടിയത്. 87-ാം മിനിറ്റിലാണ് ഗോളടിച്ചത്. കളിയുടെ മുക്കാല് സമയത്തും പന്ത് കൈവശം വയ്ക്കുന്നതില് പി.എസ്.ജി വിജയിച്ചിട്ടും മാഞ്ചസ്റ്ററിന്റെ പ്രതിരോധം തകര്ക്കാനായില്ല. 14 ഷോട്ടുകള് വീതം ഇരുടീമുകളും അടിച്ചിട്ടും ഗോളായില്ല. രണ്ടു ടീമുകളുടേയും ഈ സീസണിലെ ആദ്യമത്സരമാണ് നടന്നത്. ലീപ്സിഗും ഇസ്റ്റാന്ബുള്ളുമാണ് ഗ്രൂപ്പിലെ മറ്റ് ടീമുകള്. ആകെ 8 ഗ്രൂപ്പുകളിലായി 32 ടീമുകളാണ് ചാമ്പ്യന്സ് ലീഗില് മാറ്റുരയ്ക്കുന്നത്. ആറു മത്സരം വീതമാണ് ഗ്രൂപ്പില് എല്ലാ ടീമുകളും കളിക്കുക. കഴിഞ്ഞ സീസണില് ഗ്രൂപ്പിലെ 6 മത്സരങ്ങളും ജയിച്ച ബയേണാണ് കിരീടം ചൂടിയത്.
