മിലാന്: ഇറ്റാലിയന് ലീഗിലെ കരുത്തരായ യുവന്റസും സ്പാനിഷ് ലീഗിലെ വമ്പന്മാരായ ബാഴ്സലോണയും ചാമ്പ്യന്സ് ലീഗില് നാളെ ഏറ്റുമുട്ടും. ക്രിസ്റ്റ്യാനോ റൊണാള്ഡോയുടെ കൊറോണ പരിശോധനാ ഫലം നെഗറ്റീവായാല് സീസണിലെ ആദ്യ മെസ്സി-ക്രിസ്റ്റ്യാനോ പോരാട്ടമാണ് ആരാധകരെ കാത്തിരിക്കുന്നത്.
റയല് മാഡ്രിഡിനോട് തോറ്റ ശേഷമാണ് ബാഴ്സലോണ യുവന്റസിനെതിരെ ഇറങ്ങുന്നത്. ലാ ലീഗയിലെ ബാഴ്സയുടെ തോല്വി 3-1നായിരുന്നു. എന്നാല് ചാമ്പ്യന്സ് ലീഗില് തൊട്ടുമുമ്പത്തെ കളിയില് ഫെറെന്കാറോസിനെ 5-1ന് തകര്ത്ത ബാഴ്സയ്ക്കാണ് മുന്തൂക്കം. മെസ്സിക്ക് തുണയായി ആന്സു ഫാത്തിയും കുടിഞ്ഞോയും ഡെബലേയും കളംനിറഞ്ഞാല് യുവന്റസിന്റെ പ്രതിരോധ നിര വിഷമിക്കും.
യുവന്റസ് സമനിലകളില് കുരുങ്ങിയാണ് നീങ്ങുന്നത്. ഇറ്റാലിയന് ലീഗായ സിരി ഏയില് വെറോണയോടും ക്രോട്ടോണയോടും സമനില വഴങ്ങിയ ലീഗ് ചാമ്പ്യന്മാര് മികച്ച കളിയിലേക്ക് ഇതുവരെ എത്തിയിട്ടില്ല. ചാമ്പ്യന്സ് ലീഗിലെ കഴിഞ്ഞ മത്സരത്തില് ഡൈനാമോ കിവിനെ 2-0ന് തോല്പ്പിച്ചതിന്റെ മികവിലാണ് യുവന്റസ് ഇറങ്ങുക. റൊണാള്ഡോയുടെ ക്ഷീണം തീര്ക്കുന്ന അല്വാരോ മൊറാത്തയിലാണ് പ്രതീക്ഷ.
