ബലോത്ര (രാജസ്ഥാന്‍): രാജസ്ഥാനില്‍ ഏകദേശം 1.06 ലക്ഷം കോടി രൂപ ചെലവില്‍ നടപ്പാക്കുന്ന വിവിധ വികസന പദ്ധതികള്‍ക്ക് പ്രധാനമന്ത്രി നരേന്ദ്ര മോദി തുടക്കമിട്ടു. ഊര്‍ജം, വ്യോമഗതാഗതം, ഗതാഗതം, ജലവിതരണം തുടങ്ങിയ മേഖലകളിലെ പദ്ധതികളുടെ ഉദ്ഘാടനവും ശിലാസ്ഥാപനവും പ്രധാനമന്ത്രി നിര്‍വഹിച്ചു. രാജസ്ഥാന്‍ റിഫൈനറി, ജോധ്പൂര്‍ വിമാനത്താവളത്തിലെ പുതിയ ടെര്‍മിനല്‍ കെട്ടിടം, കേന്ദ്ര സര്‍ക്കാരിന്റെ പ്രാദേശിക വ്യോമഗതാഗത പദ്ധതിയായ ‘വിക്‌സിത് ഉഡാന്‍’ പദ്ധതിയുടെ പുതിയ ഘട്ടം എന്നിവയാണ് പ്രധാന പദ്ധതികള്‍.
പൊതുസമ്മേളനത്തെ അഭിസംബോധന ചെയ്ത പ്രധാനമന്ത്രി, ഈ പദ്ധതികള്‍ രാജസ്ഥാനിലെ അടിസ്ഥാന സൗകര്യ വികസനത്തിന് വലിയ കരുത്താകുമെന്നും ജനങ്ങളുടെ ജീവിതനിലവാരം ഉയര്‍ത്താന്‍ സഹായിക്കുമെന്നും പറഞ്ഞു. ജോധ്പൂര്‍ വിമാനത്താവളത്തിലെ പുതിയ ടെര്‍മിനല്‍ ടൂറിസത്തിനും വ്യാപാരത്തിനും കൂടുതല്‍ ഉത്തേജനം നല്‍കുന്നതിനൊപ്പം മേഖലയില്‍ തൊഴില്‍ അവസരങ്ങള്‍ കൂടുമെന്നും പ്രധാനമന്ത്രി വ്യക്തമാക്കി. സമീപകാല ആഗോള പ്രതിസന്ധികള്‍ക്കിടയിലും ഇന്ത്യ 21-ാം നൂറ്റാണ്ടിലെ ഏറ്റവും വലിയ ഊര്‍ജ പ്രതിസന്ധിയെ വിജയകരമായി അതിജീവിച്ചുവെന്നും പ്രധാനമന്ത്രി അവകാശപ്പെട്ടു.
സമയോചിതമായ നയതീരുമാനങ്ങള്‍, വിവിധ രാജ്യങ്ങളില്‍ നിന്ന് ഇന്ധനം ലഭ്യമാക്കിയ നടപടി, നയതന്ത്ര ഇടപെടലുകള്‍ എന്നിവയാണ് ഇതിന് കാരണമായതെന്നും അദ്ദേഹം പറഞ്ഞു. ഊര്‍ജ പ്രതിസന്ധിക്കിടെ ഇന്ത്യ ഇന്ധന ഇറക്കുമതി ചെയ്യുന്ന രാജ്യങ്ങളുടെ എണ്ണം 2526ല്‍ നിന്ന് 40-ലേറെ രാജ്യങ്ങളായി വര്‍ധിപ്പിച്ചെന്നും ഇന്ധനവില വര്‍ധനയുടെ ആഘാതത്തില്‍ നിന്ന് ജനങ്ങളെ സംരക്ഷിക്കാന്‍ സര്‍ക്കാര്‍ ഇടപെട്ടെന്നും മോദി വ്യക്തമാക്കി. ആഭ്യന്തര എല്‍പിജി ഉല്‍പാദനം വര്‍ധിപ്പിക്കല്‍, പൈപ്പ് ഗ്യാസ് കണക്ഷനുകളുടെ വ്യാപനം, ആഗോള വിതരണ പ്രതിസന്ധിക്കിടയിലും വളം ലഭ്യത ഉറപ്പാക്കല്‍ തുടങ്ങിയ നടപടികളും സര്‍ക്കാര്‍ സ്വീകരിച്ചതായി അദ്ദേഹം പറഞ്ഞു.
ഷേഖാവതി മേഖലയിലെ കുടിവെള്ള പദ്ധതിയുടെ പുരോഗതിയും പ്രധാനമന്ത്രി പ്രഖ്യാപിച്ചു. രാജസ്ഥാനും ഹരിയാനയും തമ്മിലുള്ള ധാരണപ്രകാരം ഹത്നികുണ്ട് ബാരേജില്‍ നിന്ന് ഭൂഗര്‍ഭ പൈപ്പ് ലൈനിലൂടെ വെള്ളം എത്തിക്കുന്ന പദ്ധതിയാണ് നടപ്പാക്കുന്നത്. സിക്കര്‍, ചുരു, ജുന്‍ജുനു ഉള്‍പ്പെടെയുള്ള പ്രദേശങ്ങളിലെ ജനങ്ങള്‍ക്ക് ഇത് ഗുണകരമാകുമെന്ന് അദ്ദേഹം പറഞ്ഞു. പുനരുപയോഗ ഊര്‍ജ പദ്ധതികളുടെ വികസനം, ജയ്പൂര്‍ മെട്രോ രണ്ടാംഘട്ട പദ്ധതി ഉള്‍പ്പെടെയുള്ള വിവിധ അടിസ്ഥാന സൗകര്യ വികസന പ്രവര്‍ത്തനങ്ങളും രാജസ്ഥാന്റെ ദീര്‍ഘകാല വികസനത്തിന് ശക്തിപകരുമെന്ന് പ്രധാനമന്ത്രി കൂട്ടിച്ചേര്‍ത്തു.
