ഷാര്ജ: നിര്ണായക മത്സരത്തില് നിലവിലെ ചാമ്പ്യന്മാരായ മുംബൈ ഇന്ത്യന്സിനെ അനായാസം മറികടന്ന് സണ് റൈസേഴ്സ് ഹൈദരാബാദ്. മുംബൈ ഉയര്ത്തിയ 150 റണ്സ് വിജയലക്ഷ്യം ഒറ്റ വിക്കറ്റ് പോലും നഷ്ടപ്പെടാതെയാണ് ഹൈദരാബാദ് മറികടന്നത്. ഇതോടെ കൊല്ക്കത്തയെ മറികടന്ന് ഹൈദരാബാദ് പ്ലേ ഓഫിലേയ്ക്ക് യോഗ്യത നേടി.
ഓപ്പണര്മാരായ വൃദ്ധിമാന് സാഹയും നായകന് ഡേവിഡ് വാര്ണറും മികച്ച ഫോമിലായിരുന്നു. മുംബൈ ബൗളിംഗ് നിരയ്ക്കെതിരെ സമ്മര്ദ്ദമില്ലാതെ ബാറ്റ് വീശിയ ഇരുവരും അര്ദ്ധ സെഞ്ച്വറി നേടി. 58 പന്തില് 85 റണ്സ് നേടിയ വാര്ണര് 10 ബൗണ്ടറികളും ഒരു സിക്സറുമാണ് പറത്തിയത്. 45 പന്തില് 7 ബൗണ്ടറികളുടെയും ഒരു സിക്സറിന്റെയും അകമ്പടിയോടെ സാഹ 58 റണ്സ് നേടി.
മത്സരത്തിന്റെ ഒരു ഘട്ടത്തില്പ്പോലും മുംബൈ ബൗളര്മാര്ക്ക് ഹൈദരാബാദ് ബാറ്റ്സ്മാന്മാരെ പ്രതിരോധത്തിലാക്കാന് കഴിഞ്ഞില്ല. പവര് പ്ലേ അവസാനിക്കും മുന്പ് തന്നെ ഇരുവരും ചേര്ന്ന് അര്ദ്ധ സെഞ്ച്വറി കൂട്ടുകെട്ടാണ് പടുത്തുയര്ത്തിയത്. ജയത്തോടെ ഹൈദരാബാദ് കൊല്ക്കത്തയെ മറികടന്ന് പ്ലേ ഓഫിന് യോഗ്യത നേടി. റണ്റേറ്റിന്റെ പിന്ബലത്തില് ബാംഗ്ലൂരിനെ മറികടന്ന ഹൈദരാബാദ് മൂന്നാം സ്ഥാനവും സ്വന്തമാക്കി. പരാജയപ്പെട്ടെങ്കിലും മുംബൈ പോയിന്റ് പട്ടികയില് ഒന്നാം സ്ഥാനത്ത് തുടരുകയാണ്.
നവംബര് 5ന് നടക്കുന്ന ആദ്യ ക്വാളിഫയറില് മുംബൈ ഇന്ത്യന്സും ഡല്ഹി ക്യാപിറ്റല്സും ഏറ്റുമുട്ടും. 6ന് നടക്കുന്ന എലിമിനേറ്ററില് ബാംഗ്ലൂരാണ് ഹൈദരാബാദിന്റെ എതിരാളികള്. ഞായറാഴ്ചയാണ് രണ്ടാം ക്വാളിഫയര് നടക്കുക. നവംബര് 10ന് ദുബായിയാണ് കലാശപ്പോരാട്ടത്തിന് വേദിയാകുക.
