ദുബായ്: ആദ്യ ക്വാളിഫയറില് ഡല്ഹി ക്യാപിറ്റല്സിനെതിരെ മുംബൈ ഇന്ത്യന്സിന് കൂറ്റന് സ്കോര്. ടോസ് നഷ്ടപ്പെട്ട് ആദ്യം ബാറ്റ് ചെയ്ത മുംബൈ നിശ്ചിത 20 ഓവറില് 5 വിക്കറ്റ് നഷ്ടത്തില് 200 റണ്സെടുത്തു. ഇഷന് കിഷന്റെയും സൂര്യകുമാര് ജാദവിന്റെയും അര്ദ്ധ സെഞ്ച്വറികളാണ് മുംബൈയ്ക്ക് മികച്ച സ്കോര് സമ്മാനിച്ചത്.
നേരിട്ട ആദ്യ പന്തില് തന്നെ നായകന് രോഹിത് ശര്മ്മ പുറത്തായിരുന്നു. എന്നാല് മികച്ച ഫോമില് ബാറ്റ് വീശിയ ക്വിന്റണ് ഡീകോക്ക് 25 പന്തില് 40 റണ്സെടുത്തു. സൂര്യകുമാര് യാദവ് 38 പന്തില് 51 റണ്സ് നേടി. 30 പന്തില് 55 റണ്സ് നേടി പുറത്താകാതെ നിന്ന ഇഷന് കിഷന്റെയും അവസാന നിമിഷം ആഞ്ഞടിച്ച ഹര്ദ്ദിക് പാണ്ഡ്യയുടെയും പ്രകടനമാണ് മുംബൈയുടെ സ്കോര് 200ല് എത്തിച്ചത്. 14 പന്തില് 5 സിക്സറുകള് പറത്തിയ പാണ്ഡ്യ 37 റണ്സെടുത്തു.
ഡല്ഹിയ്ക്ക് വേണ്ടി രവിചന്ദ്രന് അശ്വിന് 4 ഓവറില് 29 റണ്സ് വഴങ്ങി 3 വിക്കറ്റ് വീഴ്ത്തി. ആന്റിച്ച് നോര്ച്ചെ, മാര്ക്കസ് സ്റ്റോയിനിസ് എന്നിവര് ഓരോ വിക്കറ്റ് വീതം സ്വന്തമാക്കി.
മറുപടി ബാറ്റിംഗില് ഡല്ഹി ക്യാപിറ്റല്സിന്റെ തുടക്കം തകര്ച്ചയോടെയായിരുന്നു. ഒടുവില് വിവരം ലഭിക്കുമ്പോള് ഡല്ഹി 8 ഓവറില് 5 വിക്കറ്റ് നഷ്ടത്തില് 42 റണ്സ് എന്ന നിലയിലാണ്. ഓപ്പണര്മാരായ പൃഥ്വി ഷാ, ശിഖര് ധവാന്, മൂന്നാമനായെത്തിയ അജിങ്ക്യ രഹാനെ എന്നിവര് റണ്സൊന്നുമെടുക്കാതെയാണ് പുറത്തായത്. നായകന് ശ്രേയസ് അയ്യര് 12 റണ്സുമായി മടങ്ങി. 3 റണ്സെടുത്ത ഋഷഭ് പന്തിന്റെ വിക്കറ്റാണ് ഡല്ഹിയ്ക്ക് ഒടുവില് നഷ്ടമായിരിക്കുന്നത്.
Comments