ദീപാവലിയെ സമ്പന്നമാക്കി വിപണിയില്‍ സജീവമായി രുചിയൂറും മധുര വിഭവങ്ങള്‍. നന്മയുടെയും പ്രകാശത്തിന്റേയും സന്തോഷത്തിന്റേയും പ്രതീകമായ ദീപങ്ങളുടെ ഉത്സവമായ ദീപാവലിയ്‌ക്കായി മധുര വിഭവങ്ങളാണ് വിപണിയില്‍ ഒരുക്കിയത്. ലഡു, ജിലേബി, ഹല്‍വ, മൈസൂര്‍ പാക്ക്, റവ ലഡു, മില്‍ക്ക് പാക്ക്, മില്‍ക്ക് പേഡ, ഫ്രൂട്ട് ബര്‍ഫി, ജാഗിരി, ബദാം ബര്‍ഫി, പിസ്ത ബര്‍ഫി, ഗീപാക്ക്, ബൂന്തി, തരിപ്പാക്ക് തുടങ്ങി വിവിധ തരത്തിലുളള മധുര പലഹാരങ്ങളാണ് ഇന്ന് സമ്മാനമായി നൽകുന്ന ദീപാവലി മിഠായി പെട്ടിയില്‍ സ്ഥാനം പിടിച്ചിട്ടുളളത്.
ഇതില്‍ വില കൂടിയതും കുറഞ്ഞതുമായി പല തരത്തിലുളള മിഠായികള്‍ പെട്ടികള്‍ വിപണിയില്‍ സജീവമാണ്. മില്‍ക് സ്വീറ്റ്സ്, കൊട്ട സ്വീറ്റ്സ്, റിച്ച് കാജു സ്വീറ്റ്സ്, ഓര്‍ഡിനറി, ബംഗാളി സ്വീറ്റ്സ്, കാജു സ്വീറ്റ്സ്, ഷുഗര്‍ലസ് സ്വീറ്റ്സ് എന്നിവയാണ് പ്രധാനം. പേരു പോലെ തന്നെ ഇതില്‍ റിച്ച് കാജുവാണ് ഏറ്റവും ഗുണമേന്മയുള്ളതും വിലകൂടിയതുമായ മിഠായി. കൂടാതെ ഇതിലെ കൊട്ട സ്വീറ്റ്സ് പുരാതന വിഭവമായി അറിയപ്പെടുന്നു. മധുര പലഹാരങ്ങള്‍ പ്രമേഹ രോഗികള്‍ക്ക് അത്ര ഗുണകരമല്ല.
അതുകൊണ്ട് തന്നെ അങ്ങിനെയുളള ആളുകള്‍ക്കായി പ്രത്യേകം തയ്യാറാക്കിയ ഷുഗര്‍ലസ് സ്വീറ്റ്സും ലഭ്യമാണ്. പാല്‍ കൊണ്ടുള്ള വിഭവങ്ങള്‍, വിവിധ തരം ലഡു, ഹല്‍വകള്‍, പേഡകള്‍ മൈസൂര്‍ പാക്ക് എന്നിവയാണ് ദീപാവലി വിപണിയില്‍ ഒന്നാം സ്ഥാനം ഉറപ്പിച്ച പ്രധാന വിഭവങ്ങള്‍. ദീപാവലി ആഘോഷങ്ങള്‍ക്ക് മാറ്റു കൂട്ടുന്നവയാണ് ഈ മധുര വിഭവങ്ങള്‍. വടക്കേ ഇന്ത്യയില്‍ നിന്നാണ് ഈ മധുര പലഹാരങ്ങളുടെ കടന്നു വരവ്. ദീപാവലി ആഘോഷങ്ങള്‍ക്കായുളള മധുര പലഹാരങ്ങള്‍ വീടുകളില്‍ നിര്‍മ്മിക്കുന്നവരും ധാരാളമാണ്.
Comments