പോര്ട്ട് ബ്ലെയര്: ഇന്ത്യ-സിംഗപ്പൂര് സംയുക്ത നാവിക പരിശീലന പരിപാടിയായ സിംപെക്സ്-20 ഇന്ന് അവസാനിക്കും. ആന്തമാന് കടലില് രണ്ടു ദിവസമായി നടക്കുന്ന ദ്വിരാഷ്ട്ര നാവിക സേനാ പരിശീലന പരിപാടികളാണ് ഇന്ന് പൂര്ത്തിയാകുന്നത്. അമേരിക്കയുമൊത്ത് ഇന്ത്യ നടത്തിയ മലബാര് 2020 നാവികാഭ്യാസത്തിന് തൊട്ടു പിന്നാലെയാണ് ഇന്ത്യ-സിംഗപ്പൂര് പരിശീലനങ്ങള് നടന്നത്. ഇതിന് പിന്നാലെ സിംഗപ്പൂരും-തായ്ലാന്റും പങ്കെത്ത സിറ്റ്മെക്സ്-2020 പരിശീലനം നടന്നു.
ഇന്ത്യന് നാവികസേനയുടെ എ.എസ്.ഡബ്ലൂ കവരത്തി, ഐ.എന്.എസ്.കമോര്ത്ത, ഐ.എന്.എസ്.കാര്മുക് എന്നീ യുദ്ധകപ്പലുകളാണ് പരിശീലനത്തിനുള്ളത്. സിംഗപ്പൂരിന്റെ ആര്.എസ്.എസ്. ഇന്റര്പിഡ്, ഇന്ഡെവര്, എന്ഡ്യൂറന്സ് എന്നീ യുദ്ധകപ്പലുകളും അണിനിരക്കുകയാണ്.
ഇരുരാജ്യങ്ങളുടേയും നാവികസേനകള് സജ്ജീകരിച്ചിരിക്കുന്ന ആയുധങ്ങളും നിരീക്ഷണ സംവിധാനങ്ങളും പരിശോധിച്ച് ഉറപ്പുവരുത്തലാണ് പരിശീലനത്തിന്റെ ഉദ്ദേശം. ഒപ്പം ആന്ഡമാന് കടലിലെ സുരക്ഷാ സംവിധാനങ്ങളില് ഇരു രാജ്യങ്ങളും ചേര്ന്ന് നടത്തേണ്ട സുരക്ഷാ ക്രമീകരണങ്ങളും സേനകള് പരസ്പരം പരിചയപ്പെടുമെന്നും നാവികസേന അറിയിച്ചു.
