പ്രകൃതിയോട് ഏറെ അടുത്തു നില്ക്കുന്നവയാണ് കേരളത്തിലെ മിക്ക ക്ഷേത്രങ്ങളും. അത്തരത്തില് കാവുകളുടെ പാരമ്പമ്പര്യം കാത്തുസൂക്ഷിച്ചു കൊണ്ട് കൊച്ചു വനത്തിനുള്ളില് സ്ഥിതി ചെയ്യുന്ന അതിപുരാതനമായ ദേവീക്ഷേത്രമാണ് ശ്രീ അടുക്കത്ത് ഭഗവതിക്ഷേത്രം. വിജനമായ ഒരു പ്രദേശത്തിന് നടുവിലായി ചുറ്റും നിറയെ മരങ്ങളാല് സമ്പന്നമായ ഒരു ക്ഷേത്രം. ക്ഷേത്രത്തിന് തെക്കു ഭാഗത്തായി നിരവധി ആമകളുള്ള ഒരു ആമക്കുളവും ഉണ്ട്. കാഴ്ചയില് തന്നെ വ്യത്യസ്തമയ ഒരനുഭവമാണ് ഈ ക്ഷേത്രത്തിലെത്തുന്നവര്ക്ക് ലഭിക്കുന്നത്. കാസര്ഗോഡ് ജില്ലയിലെ ബേഡടുക്ക ഗ്രാമപഞ്ചായത്തിലെ ബേഡകം ഗ്രാമത്തിലാണ് ഈ ക്ഷേത്രം സ്ഥിതി ചെയ്യുന്നത്. നാല് തൃക്കൈകളിലായി ശംഖ്, ചക്രം, വില്ല്, അമ്പ് എന്നീ ദിവ്യായുധങ്ങള് ധരിച്ച്, കിരീടമണിഞ്ഞ്, മഹിഷാസുരന്റെ തലയില് ചവിട്ടി നില്ക്കുന്ന രൂപത്തിലുള്ള ദുര്ഗ്ഗ ദേവിയാണ് ഇവിടത്തെ പ്രതിഷ്ഠ.
മഹിഷാസുരമര്ദ്ദിനിയായിട്ടാണ് അടുക്കത്ത് ഭഗവതിയെ ഇവിടെ സങ്കല്പിച്ചിരിക്കുന്നത്. അതുകൊണ്ട് തന്നെ മഹിഷാസുരനെ വധിച്ച ദേവിയ്ക്ക് മഹര്ഷിമാര് ബഹുമാനപുരസ്സരം സ്ഥാനം നല്കി ആരാധിച്ച പുണ്യസങ്കേതങ്ങളില് ഒന്നാണ് ശ്രീ അടുക്കത്ത് ഭഗവതി ക്ഷേത്രം. അടുക്ക എന്നു പേരുളള ആദിവാസി സ്ത്രീ പുല്ല് വെട്ടാന് പോയ സമയത്ത് ഭഗവതി വിഗ്രഹം കണ്ടെത്തുകയും കാമലോന് തറവാട്ടില് വിവരമറിയിക്കുകയും തുടര്ന്ന് അവിടെ ക്ഷേത്ര നിര്മ്മാണം നടത്തിയെന്നും അങ്ങനെയാണ് അടുക്കത്ത് ഭഗവതി ക്ഷേത്രം ഉണ്ടായതെന്നുമാണ് ഐതിഹ്യം. സാമന്തന്മാരുടെ കുലപരദേവതയായിരുന്നു ശ്രീ അടുക്കത്ത് ഭഗവതി.
കവയനാട്ടായി രവാന് എന്ന സ്ഥാനപ്പേരോടു കൂടിയ മലയാളത്ത് കാമലോന് എന്ന സാമന്തന്മാരുടെ അധീനതയിലായിരുന്നു, കവയനാട് സ്വരൂപം എന്ന പേരില് അറിയപ്പെട്ടിരുന്ന ബേഡകം പ്രദേശവും ഇവിടുത്തെ ക്ഷേത്രങ്ങളും. പിന്നീട് സാമന്ത കുടുംബക്കാര്ക്ക് സന്താനമില്ലാതെ ക്ഷയിക്കാനിടയായ സാഹചര്യത്തില് ഈ ക്ഷേത്രം അടുക്കത്ത് വാര്യര് എന്ന കുടുംബത്തിന്റെ അധീനതയിലായി. സന്താനമില്ലാതായ സാമന്ത കുടുംബക്കാര് ബല്ലാള് കുടുംബത്തില് നിന്നും ഒരു ബല്ലാള് സ്ത്രീയെ ദത്തെടുക്കുകയും അതിലുണ്ടായ സന്തതി പരമ്പരകള് നായന്മാരുടെ സമ്പ്രദായം സ്വീകരിച്ച് തങ്ങളുടെ പൂര്വികരുടെ സ്ഥലമായ ബേഡകത്ത് എത്തിച്ചേരുകയും പ്രബലന്മാരായി വാഴുകയും, പിന്നീട് അടുക്കത്ത് വാര്യര് കുടുംബത്തില് നിന്നും ക്ഷേത്രഭരണം ബേഡകം കാമലോന് വലിയവീട് തറവാട്ടിലേക്ക് തിരിച്ചുവരികയും ചെയ്തു എന്നാണ് പറയപ്പെടുന്നത്.
Comments