തിരക്കു പിടിച്ച കോഴിക്കോട് നഗരത്തിന്റെ ഹൃദയ ഭാഗത്തായി ആളുകള്ക്ക് ആശ്വാസം നല്കുന്നൊരിടമാണ് മാനാഞ്ചിറ സ്ക്വയര്. നഗര ഹൃദയത്തിലെ ഈ പച്ചപ്പിന്റെ തണല് പറ്റാത്തവര് കുറവാണ്. മിക്ക ആളുകളുടെ വൈകുന്നേരങ്ങളെ സമ്പന്നമാക്കുന്നതില് മാനാഞ്ചിറയുടെ പങ്ക് ചെറുതൊന്നുമല്ല. കൊച്ചു കുട്ടികള് മുതല് പ്രായമായവര് വരെ മാനാഞ്ചിറയില് അല്പ നേരമെങ്കിലും സമയം ചെലവഴിക്കാനായി എത്താറുണ്ട്. പച്ചപ്പുല് മൈതാനിയില് ഓടിക്കളിക്കുന്ന കുട്ടികളും, കൂട്ടം കൂടിയിരുന്നു സൊറ പറയുന്ന സുഹൃത്തുക്കളും, കൈകള് ചേര്ത്തു പിടിച്ച് പതിയെ നടന്നു നീങ്ങുന്ന കമിതാക്കളും. ജോലിഭാരം കാരണം വിരസതയിലേക്കി വീണു പോകുന്നവരുമെല്ലാമായി നിരവധി ആളുകള്ക്ക് ആശ്വാസ കേന്ദ്രമായിരുന്നു മാനാഞ്ചിറ.
കുട്ടികള്ക്കായുള്ള കളിസ്ഥലങ്ങളും ഊഞ്ഞാലുകളും ഇരിപ്പിടങ്ങളും ഉള്പ്പെടെ നിരവധി നൂതന മാറ്റങ്ങള് മാനാഞ്ചിറയില് നടത്തിയിട്ടുണ്ട്. അമ്മമാര്ക്കുളള ഫീഡിങ് റൂമും, ബാത്റൂമും തുടങ്ങിയവയുടെ പണി നടന്നു കൊണ്ടിരിക്കെയാണ് കൊറോണയുടെ പശ്ചാത്തലത്തില് മാനാഞ്ചിറ അടച്ചത്. എന്നാലിപ്പോള് സൗന്ദര്യവും സൗകര്യവും കൂട്ടി മാനാഞ്ചിറ സന്ദര്ശകര്ക്കായി ഒരുങ്ങി കഴിഞ്ഞിരിക്കുന്നു. മങ്ങിയ വെളിച്ചത്തില് നിന്നും നഗരത്തിന്റെ പ്രകാശ കേന്ദ്രമായി മാറിയിരിക്കുകയാണ് കോഴിക്കോട് മാനാഞ്ചിറ സ്ക്വയര്. വര്ഷങ്ങളായി അണഞ്ഞു കിടന്നിരുന്ന ലൈറ്റുകളും തൂണുകളുമെല്ലാം നീക്കി പുതിയത് സ്ഥാപിച്ചു.
പഴയ മഞ്ഞ നിറത്തിലുള്ള ബള്ബുകള് എല്ലാം മാറ്റി അലങ്കാര വിളക്കുകളെല്ലാം വിവിധ വര്ണ്ണത്തില് പ്രകാശിക്കുന്ന എല്ഇഡി വിളക്കുകളായി മാറി. ചിറയ്ക്കു ചുറ്റുമായി തെളിഞ്ഞു നില്ക്കുന്ന ഈ ബള്ബുകള് അലങ്കാരത്തിനൊപ്പം വഴിവിളക്കു കൂടിയാണ്. നവീകരിച്ച മാനാഞ്ചിറയുടെ രാത്രി കാഴ്ച അതിമനോഹരമാണ്. നഗരത്തിലെത്തുന്ന ആരേയും ആകര്ഷിക്കുന്ന തരത്തില് അതിസുന്ദരിയായി ഒരുങ്ങി കഴിഞ്ഞു. മാനാഞ്ചിറ സ്ക്വയര് ഇപ്പോഴിതാ പൊതുജനങ്ങള്ക്കായി തുറന്നു നല്കി. കവാടത്തിനരികില് നിന്നും തിരിച്ചു പോകാതെ ആളുകള്ക്ക് ആസ്വദിക്കാം എന്നാല് കൊറോണ മാനദണ്ഡങ്ങള് പാലിക്കേണ്ടത് അത്യാവശ്യമാണ്.
