കണ്ണൂർ : തദ്ദേശ തെരഞ്ഞെടുപ്പ് പ്രചാരണത്തിന്റെ ആദ്യ നാളുകളിൽ മുഖ്യമന്ത്രി പിണറായി വിജയൻ പ്രചാരണത്തിനിറങ്ങിയിരുന്നില്ല . പിണറായി പ്രചാരണത്തിനു വന്നാൽ വോട്ട് നഷ്ടപ്പെടുമോയെന്ന് ഭയന്ന് സ്ഥാനാർത്ഥികൾ തന്നെ ഒഴിവാക്കിയതാകാമെന്ന റിപ്പോർട്ടുകളും വന്നിരുന്നു .
തദ്ദേശ തെരഞ്ഞെടുപ്പ് പ്രചാരണത്തിന്റെ ആദ്യാവസാനം പ്രതിപക്ഷം ഉയർത്തിയ വിഷയമായിരുന്നു മുഖ്യമന്ത്രി പിണറായി വിജയന്റെ അസാന്നിധ്യം. ഒരു ഘട്ടത്തിലും പ്രചാരണ രംഗത്ത് സജീവമാകാതിരുന്ന അദ്ദേഹം തെരഞ്ഞെടുപ്പ് പ്രചാരണത്തിന് നേതൃത്വം കൊടുത്തത് തന്റെ മണ്ഡലമായ ധർമ്മടത്ത് മാത്രമായിരുന്നു.
അത് തന്നെയാണ് ധർമ്മടത്തെ തെരഞ്ഞെടുപ്പിന്റെ സവിശേഷതയും. മൂന്നാം ഘട്ട തെരഞ്ഞെടുപ്പിന്റെ ശ്രദ്ധാകേന്ദ്രമായി ധർമ്മടം മണ്ഡലം മാറി. എന്നാൽ ഫലം വന്നപ്പോൾ സ്ഥാനാർത്ഥികളുടെ ഭയം അസ്ഥാനത്തായില്ല . ധർമ്മടം മണ്ഡലത്തിൽ ഉൾപ്പെട്ട കടമ്പൂർ പഞ്ചായത്തിൽ യുഡിഎഫ് വിജയിച്ചു. മുഴപ്പിലങ്ങാട് പഞ്ചായത്തിലും എൽ ഡി എഫ് പരാജയപ്പെട്ടു.
കഴിഞ്ഞ ഒൻപത് ദിവസമായി മുഖ്യമന്ത്രി കണ്ണൂരിൽ ഉണ്ടായിരുന്നു . ഇന്നാണ് അദ്ദേഹം തലസ്ഥാനത്തേക്ക് മടങ്ങുന്നത് . അതും കണ്ണൂർ കോർപ്പറേഷനിൽ ഇതാദ്യമായി ബിജെപി സീറ്റ് നേടുന്നതും കണ്ടിട്ടാണ് മടക്കം . പള്ളിക്കുന്ന് ഡിവിഷനിൽ ബിജെപി സ്ഥാനാർത്ഥി വി.കെ ഷൈജുവാണ് ചരിത്ര വിജയം നേടിയത്. യുഡിഎഫിന്റെ സിറ്റിംഗ് സീറ്റാണ് ബിജെപി പിടിച്ചെടുത്തത്.
