കശ്മീര്: ജമ്മു കശ്മീരിലെ ബുദ്ഗാം ജില്ലയില് സുരക്ഷാ സേനയും ഭീകരരും തമ്മിലുണ്ടായ ഏറ്റുമുട്ടലില് ഒരു ഭീകരനെ വധിച്ചതായി ഉദ്യോഗസ്ഥര്. അഷ്ദര് ഗാലി വനമേഖലയില് വെള്ളിയാഴ്ചയാണ് ഏറ്റുമുട്ടലുണ്ടായത്. കൊല്ലപ്പെട്ട ഭീകരന്റെ വ്യക്തിത്വം ഇതുവരെ സ്ഥിരീകരിച്ചിട്ടില്ല. പുല്വാമയിലെ പഖേര്പോരയില് നിന്ന് ബുദ്ഗാമിലെ യൂസ്മാര്ഗിലേക്ക് ഒരു ഭീകരസംഘം നീങ്ങുന്നതായി ലഭിച്ച രഹസ്യവിവരത്തിന്റെ അടിസ്ഥാനത്തിലാണ് സുരക്ഷാ സേന ഓപ്പറേഷന് ആരംഭിച്ചത്. ഇന്ത്യന് സൈന്യം, ജമ്മു കശ്മീര് പൊലീസ്, സിആര്പിഎഫ് എന്നിവ സംയുക്തമായാണ് പരിശോധന നടത്തിയത്.
വനമേഖലയില് സംശയാസ്പദമായ നീക്കം ശ്രദ്ധയില്പ്പെട്ടതിനെ തുടര്ന്ന് സുരക്ഷാ സേന പ്രദേശം വളയുകയായിരുന്നു. തുടര്ന്ന് ഭീകരരുടെ ഭാഗത്തുനിന്ന് വെടിവയ്പ്പുണ്ടായതോടെ ഏറ്റുമുട്ടല് ആരംഭിച്ചു. ഏറ്റുമുട്ടലിനിടെ ഒരു ഭീകരനെ വധിച്ചതായാണ് ഉദ്യോഗസ്ഥര് അറിയിച്ചത്. സ്ഥലത്തുനിന്ന് എകെ റൈഫിളും കണ്ടെത്തി. മേഖലയില് മറ്റൊരു ഭീകരന് കൂടി ഒളിച്ചിരിക്കുന്നതായി സംശയിക്കുന്നതിനാല് സുരക്ഷാ സേന തിരച്ചില് തുടരുകയാണ്. ഇതോടെ ഓപ്പറേഷന് ഇതുവരെ അവസാനിച്ചിട്ടില്ല. കൂടുതല് ഭീകരരുടെ സാന്നിധ്യമുണ്ടോയെന്ന് പരിശോധിച്ചുവരികയാണ്.
വ്യാഴാഴ്ച ആരംഭിച്ച ഭീകരവിരുദ്ധ ഓപ്പറേഷനാണ് വെള്ളിയാഴ്ച രണ്ടാം ദിവസത്തിലേക്ക് കടന്നത്. ദൂദ്പത്രി ഉള്പ്പെടെയുള്ള പ്രദേശങ്ങളില് ഓപ്പറേഷന് തുടരുന്നതിനാല് ഇനിയൊരു ഉത്തരവുണ്ടാകുന്നതുവരെ വിനോദസഞ്ചാരികള് വിനോദസഞ്ചാര കേന്ദ്രം സന്ദര്ശിക്കരുതെന്ന് അധികൃതര് നിര്ദേശം നല്കിയിട്ടുണ്ട്.
