തുരുമ്പെടുത്ത വീല്‍ചെയര്‍ ഇനി മാറ്റാം; പ്രമോദിന് ഇലക്ട്രിക് വീല്‍ചെയര്‍ നല്‍കി മോഹന്‍ലാൽ

പാലക്കാട്: ജന്മനാ പോളിയോ ബാധിച്ച് ഇരു കൈകാലുകളും തളർന്ന് ജീവിതം വീൽ ചെയറിലായ പാലക്കാട് എലപ്പുളി സ്വദേശി പ്രമോദിന് ഇലക്ട്രിക് വീൽ ചെയർ നൽകി നടൻ മോഹൻലാൽ. പ്രമോദിന്റെ ജീവിതത്തെ കുറിച്ചുള്ള മാദ്ധ്യമ വാർത്ത ശ്രദ്ധയിൽപ്പെട്ടതോടെയാണ് മോഹൻലാലും വിശ്വശാന്തി ഫൗണ്ടേഷനും പ്രമോദിന് സഹായ ഹസ്തവുമായി രംഗത്തെത്തിയത്.

പേപ്പർ പേനകൾ നിർമ്മിച്ചാണ് അദ്ദേഹം ഉപജീവനം നടത്തുന്നത്. പ്രകൃതി സംരക്ഷണത്തിന് മുൻതൂക്കം നൽകിയാണ് പ്രമോദിന്റെ പേന നിർമ്മാണം. ഉപയോഗിച്ച് ഉപേക്ഷിക്കുന്ന പേനയിൽ നിന്നു പോലും പ്രകൃതി സംരക്ഷണം ഉറപ്പാക്കുകയാണ് അദ്ദേഹം തന്റെ ജീവിതത്തിലൂടെ. പേനകൾക്കുള്ളിൽ വിത്തുകൾ നിറച്ചാണ് പ്രമോദ് പേപ്പർ പേനകൾ നിർമ്മിക്കുന്നത്. ഉപയോഗിച്ച ശേഷം ഉപേക്ഷിക്കുന്ന പേനകൾ വഴി ഭൂമിയുടെ സംരക്ഷണത്തിന് തന്നാലാകുവിധം അദ്ദേഹം സംഭാവന നൽകുകയാണ്.

നല്ലൊരു വിൽചെയർ പോലും ഇല്ലാതെ ദുരിതം അനുഭവിച്ചിരുന്ന പ്രമോദിന്റെ അവസ്ഥയെ കുറിച്ച് ജനംടീവിയും വാർത്ത പുറത്ത് വിട്ടിരുന്നു. തുരുമ്പെടുത്ത് തകർന്ന ഒരു വീൽചെയർ ആയിരുന്നു അദ്ദേഹത്തിന്റേത്. പ്രമോദിന്റെ അധ്വാനവും അദ്ദേഹം അനുഭവിക്കുന്ന പ്രയാസവും ജനം ടിവി റിപ്പോർട്ട് ചെയ്തു. വാർത്ത ശ്രദ്ധയിൽപ്പെട്ട നടൻ മോഹൻലാലും വിശ്വശാന്തി ഫൗണ്ടേഷനും പ്രമോദിനെ നേരിൽ കണ്ട് കഴിഞ്ഞദിവസം ഒരു ഇലക്ട്രിക് വീൽചെയർ നൽകി.

അട്ടപ്പാടി സ്വാമി വിവേകാനന്ദ മെഡിക്കൽ മിഷനിലെ ഡോക്ടർ നാരായണന്റെ നേതൃത്വത്തിലായിരുന്നു പ്രമോദിന് വീൽചെയർ കൈമാറിയത് ലോക്ക് ഡൗൺ സമയത്ത് ഉൾപ്പെടെ നിർമ്മിച്ച പ്രമോദിന്റെ പേപ്പർ പേനകൾ മുഴുവനും താൻ വാങ്ങാം എന്ന ഉറപ്പു നൽകിയ മോഹൻലാൽ ഇത്തരത്തിൽ ദുരിതമനുഭവിക്കുന്നവർക്ക് തങ്ങളാൽ കഴിയുന്ന സഹായം വിശ്വശാന്തി ഫൗണ്ടേഷൻ നൽകുമെന്നും പറഞ്ഞു. തന്റെ പ്രയാസമറിഞ്ഞ് പിന്തുണയുമായി രംഗത്തെത്തിയ ലാലേട്ടന് പ്രമോദും നന്ദിപറഞ്ഞു.