മൂന്നാറിന്റെ സൗന്ദര്യം ആസ്വദിക്കാനെത്തുന്ന സഞ്ചാരികള്‍ക്കായി കെഎസ്ആര്‍ടിസി പുതിയ ബസ് സര്‍വീസ് ആരംഭിച്ചു. സൈറ്റ് സീയിങ് എന്ന പേരിലുള്ള ബസ് പഴയ മൂന്നാര്‍ ഡിപ്പോയില്‍ നിന്നുമാണ് സര്‍വീസ് ആരംഭിച്ചത്. ദിവസവും രാവിലെ ഒന്‍പത് മണിയ്ക്ക് ഡിപ്പോയില്‍ നിന്ന് ആരംഭിക്കുന്ന സര്‍വീസ് ആദ്യം ടോപ് സ്റ്റേഷനില്‍ എത്തും. പിന്നീട് അവിടെ നിന്നും കുണ്ടള, എക്കോ പോയിന്റ്, മാട്ടുപ്പട്ടി, ഹണി ട്രീ, റോസ്ഗാര്‍ഡന്‍ എന്നിവിടങ്ങള്‍ സന്ദര്‍ശിച്ച ശേഷം അഞ്ചുമണിയോടെ ട്രിപ്പ് അവസാനിപ്പിക്കും. ഒരോ പോയന്റിലും ഒരു മണിക്കൂറോളം ചെലവഴിക്കുന്നു. ഇതുകൂടാതെ ഭക്ഷണം കഴിക്കുന്നതിനുള്ള സൗകര്യവും ഒരുക്കിയിട്ടുണ്ട്.
മൂന്നാറിലെ പ്രകൃതി സൗന്ദര്യം ആസ്വദിച്ച് കറങ്ങി ഒരുദിവസം ചെലവഴിക്കുന്നതിന് ഒരാള്‍ക്ക് ഇരുന്നൂറ്റി അന്‍പത് രൂപയാണ് യാത്ര ചിലവ്ആദ്യ ദിവസം മുപ്പത് യാത്രക്കാരാണ് ബസില്‍ ഉണ്ടായിരുന്നത്. അതില്‍ ഭൂരിഭാഗം പേരും മലയാളികള്‍ ആയിരുന്നു. വിനോദ സഞ്ചാരത്തിനായി ആളുകള്‍ ഏറ്റവും കൂടുതല്‍ തെരഞ്ഞെടുക്കുന്ന ഒരിടമാണ് മൂന്നാര്‍. കേരളത്തിന് അകത്തും പുറത്തും നിന്നുമായി നിരവധി പേരാണ് നിത്യേന ഇടുക്കി ജില്ലയിലെ ഈ മലയോര പ്രദേശത്തേയ്ക്ക് വന്നെത്തുന്നത്.
അതുകൊണ്ട് തന്നെ സഞ്ചാരികള്‍ക്ക് ഏറെ സഹായകമാണ് ഈ പുതിയ സര്‍വ്വീസ്. ഇതുകൂടാതെ രാജമല, മറയൂര്‍ വഴി കാന്തല്ലൂര്‍ക്ക് ഉടന്‍ തന്നെ പുതിയ സര്‍വീസും ആരംഭിക്കും.കൊറോണ കാലത്ത് നിയന്ത്രണങ്ങള്‍ വന്നതോടെ സഞ്ചാരികളുടെ വരവ് നിലച്ചെങ്കിലും. ഇപ്പോള്‍ മാനദണ്ഡങ്ങള്‍ പാലിച്ചു കൊണ്ട് വീണ്ടും ആളുകള്‍ മൂന്നാറിലേയ്ക്ക് തുടങ്ങിയിരിക്കുന്നു. പച്ചപ്പാല്‍ ചുറ്റപ്പെട്ട് പ്രകൃതിയോട് അത്രയ്ക്കും ചേര്‍ന്ന് നില്‍ക്കുന്ന മനോഹരമായ പ്രദേശമാണ് മൂന്നാര്‍. പുല്‍മേടുകളും, ഷോലക്കാടുകളും തേയിലത്തോട്ടങ്ങളുമാണ് ഇവിടം സമ്പന്നമാക്കുന്നത്.
Comments